BUKA NI TAKOHA 8
8
Têtê viteana na maneraha
1Ti ki maratorana na enoni ni takoha mataha? Ti nikâ ki girara i ramatenigi na marâ hato? Na enoni ni takoha mataha ki bâbâ hagagara renia na maana. Na maana ki bâbâ ni vagevageha, suria na takoha mataha ki hatungia na bâbauana.
2Mu têtê viteana na maneraha, suria i maana God igamu kamu bani tohe vigamu têtê viteana. 3Na maneraha ki girara i katogi na ani mavê na tarani i obanigi. Siana kamu magu vigamu oga i pasina ma kamu aganaria hete. 4Na tamasinga iana na maneraha ka na ramata. Ti ki girara i suria tenia? 5Manga mu ototo surigi na ramata iana, igamu kamu page gâga tatara. Na enoni ni takoha mataha ki girara, manga i he ki katoa vikana ma i na keta. 6Na ara ni marâ ka nahunigi na mateni tange ma manga i he ka katogi. Ma igia, na giraraha iaka ki sisite ngavê! 7I asa ta na hitangika ge girara vi na ta kani page akê me ma ki asa ta na enoni vige hagarongogia renia. 8I asa ta na enoni ge girara vige herepusia na roga. I asa ta na enoni vige gurua akê na tangiana iana i page meme igê. Na hearihatana ngekê ki asa iaka vige gavatenia. Henaka go uhungia ko totora pusigo maremu, i asa vigu page tahi.
Na enoni era ma na enoni koro
9Na tarani hato ngegana inê kê bâsigi, matena gê haharirigi na tauhata na enoni i maveta ikê. I maveta ikê tani na enoni ka nahuni ramoha ma ka hagamamasiagara na enoni i ruguhata. 10Inê kê bâsira na enoni ga torea na gahuana na eragani nuni, hanana ga bagia. Matena ga bagia hato, ka aporo i ruma, ngaira ka hagarahasia ma ka bonotenigi na bagatauhana. Na tarana ngekana ki oga hagâbo ma.
11Tanu hega na enoni ka agana ka oga sutaga? Suria na hagaitangiha ki hagarihu vige tarahura. 12Na manero ki tahitahi, henaka i bani katogi na tangarê na bagatauhana ga erataga ngavê. Ua, inê kê bani girara ga vivi: Manga vigo têtê viteana God, na ara ni marâ hato ka page tavoraha maninga tangago 13ma tanga na manero ki mareha. Na ogaha iana ki manga na mamarugana na vaha i hatani riri tare. Ngaia ki meme buna, suri i haritohea God. 14Na tamasinga vikana ki bekabekaga ngavê. Bâ, ta na matena na hagaitangiha ki tarahura na enoni koro parera na manero, ma na manero ka torea na vuriha parera na enoni koro. Be vi tangagamu nikâ: I oga hagâbo ma. 15Tahema inê kê takusia vi na enoni ki ararira viga vagevagesia na ogaha iata. I ararira, viga ngêngê ka totono ma ka vagevagesia na ogaha iata. Ngaia ma ngekana ka na vagevageha ga nahunia, matena ga tagara bâraha suria na kere ogaha abubu iata, God i naka tangara.
16Matena gê uhungia hanana vi ve tako mataha ma be aitangisigi na tauhata na enoni i maveta ikê, inê kê tahetara, vi bara tanga na enoni, henaka vi ngaia ki hagesuringenigi surigi na bungiani ma na tangiani. 17I asa iana vige aitangisigi na tauhana God. Henaka vigu uhungia ku uhungia, i asa iamu vigu aitangisigi. Henaka tani na enoni ni takoha mataha ka vi vari, vi ngaira ka aitangisigi, ma ki bara ngavê tangara nogata.
Currently Selected:
BUKA NI TAKOHA 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
