Psalmen 40

Dank un Vespräakjen

1Een Psalm von David, väatosinjen. 2Ekj luad jeduldich nom Harn; dan bekjt hee sikj un hieed mie schrieen. 3Hee trock mie ut daut jefäadelje Loch un ut dän Somp rut, un stald miene Feet opp een Steen, daut ekj secha go. 4Hee jeef mie uk een nieet Leet em Mul, een Leet onsen Gott to lowen. Nu woaren väle seenen, waut Gott fa mie jedonen haft, un am ferchten un sikj opp am veloten. #Psa 33,3 5Jesäajent es dee Mensch dee sikj opp däm Harn velat un sikj nich to de stolte jesalen deit, ooda to dee, dee met Läajes omgonen.

6De Wundawoakjen, dee du, mien Har un Gott, jedonen hast, sent väl, un soo uk diene Jedanken, dee du aun ons bewiesen deist. Doa es kjeena met die to vejlikjen. Wan ekj daut wudd bekauntmoaken un doavon räden, waut du jedonen hast, daut wudd väl mea sennen aus ekj opprieejen kunn. #Psa 139,17-18 7Opfa un Brauntopfa es nich waut du haben west; oba du hast mie de Uaren opjemoakt. Brauntopfa un Sindopfa velangst du nich. #1Sam 15,22; Psa 50,8-13; 51,18; Heb 10,5-10 8Dan säd ekj: Ekj sie reed to doonen waut von mie em Jesazbuak jeschräwen steit. 9Mie es daut eene Freid dien Wellen to doonen, mien Gott, un dien Jesaz hab ekj em Hoat. 10Ekj hab de groote Vesaumlunk met de Jerajchtichkjeit bekaunt jemoakt, un du, oo Har, weetst daut ekj nuscht trigjehoolen hab. 11Ekj hool diene Jerajchtichkjeit nich fa mie selfst; ekj hab von diene Woarheit jerät un woo du raden deist. Ekj hab daut en de groote Vesaumlunk jesajcht, woo tru un leeftolich du best.

12Du oba, oo Har, trakj dien Metleet nich trigj von mie; lot mie derch diene truhoatje Leew un diene Woarheit bewoat bliewen. 13Wiels ekj hab mea Trubbels aus ekj talen kaun. Miene Sinden haben mie to hoolen jekjräajen, daut ekj nich oppkjikjen kaun; dee sent mea aus ekj Hoa opp däm Kopp hab. Doawäajen haft mien Hoat aulen Moot veloaren. 14Har, lot die daut jefaulen, mie to raden. Spood die, Har, un komm halp mie! #(14-18) Psa 70,2-6 15Lot aul dee sikj schämen un toschaund woaren, dee miene Seel nostonen un mie ombrinjen wellen; lot dee trigj jejoacht un toschaund woaren, dee mie beeset jennen. 16Lot dee sikj en äare Schaund un Onjnod veloten feelen, dee äwa mie, Aha, Aha! schrieen. 17Oba muchten aul dee, dee die sieekjen, sikj en die freien un froo sennen; muchten dee, dee diene Radunk waut räakjnen, emma doavon räden, woo groot de Har es. 18Ekj sie oam un helploos, oba de Har sorcht fa mie. Du best daut, dee mie halpt un rat; mien Gott, siem nich!

Currently Selected:

Psalmen 40: PB

Highlight

Compare

Copy