Psalmen 119

119

Een Leet om Gott sien Jesaz to lowen

1Seelich sent dee, dee oschuldich läwen, dee sikj em Waundel aun Gott sien Jesaz hoolen. #(1-3) Psa 112,1-2 2Seelich sent dee, dee sien Jesaz hoolen, un am von gaunzem Hoaten sieekjen. 3Dee doonen nuscht orrajchtet; dee waundlen en siene Wäaj. 4Du hast ons diene Väaschreften jejäft, daut wie ons gaunz doano rechten sellen. 5Oo daut mien Läwen bestendich diene Jebooten hoolen mucht! 6Dan wudd ekj nich toschaund woaren, wan ekj opp aul diene Jebooten achten wudd. 7Ekj sie jerajcht un von Hoaten opprechtich, un woa die danken wan ekj diene jerajchte Jerechten lieren woa. 8Ekj woa aul diene Väaschreften hoolen, soo aus du beschloten hast; doo mie bloos nich veloten.

9Woo kaun een junga Maun sien Läwen rein hoolen? Wan hee sikj doaraun helt, waut dien Wuat sajcht. 10Ekj sieekj die von gaunzem Hoaten; lot mie nich von diene Jebooten auferren. 11Ekj hool dien Wuat em Hoat, daut ekj nich jäajen die sindjen woa. 12Gott du saust jeloft woaren! Lia mie to doonen waut du velangst. #Psa 119,26.64.68 13Ekj woa räden von aul dee Jesazen von dee du jerät hast. 14Ekj hool met Freiden diene Jebooten, soo aus eena sikj to grooten Rikjtum freit. 15Ekj denkj äwa diene Jebooten no, un woa opp diene Wäaj achten. 16Ekj frei mie to diene Väaschreften, un woa dien Wuat nich vejäten.

III

17Doo dienen Kjnajcht goodet, daut ekj läwen kaun un dien Wuat hoolen. 18Moak mie de Uagen op, daut ekj de Wunda en dien Jesaz seenen kaun. 19Ekj sie een framda oppe Ieed; vestäakj diene Jebooten nich fa mie. #Psa 39,13 20Mien stendjet velangen no dien Jesaz es stoakj jenuach mie daut Hoat to bräakjen. 21Du schelst äwa de stolte dee veflucht sent, dee von diene Jebooten auferren. #5Mo 27,26; Gal 3,10 22Nemm aul äare Veachtunk un äaren Spott wajch von mie, wiels ekj hool dien Wuat. 23Soogoa de aunjestalde setten toop un räden jäajen mie, oba dien Kjnajcht denkjt äwa diene Jesazen no. 24Ekj hab eene Freid aun diene Jesazen, daut sent miene Rotjäwa.

25Miene Seel licht em Stoff; stoakj mien Läwen, soo aus dien Wuat vesprakjt. 26Ekj hab die aul miene Wäaj bekjant, un du hast mie jeauntwuat; lia mie diene Jesazen. 27Lot mie vestonen waut diene Väaschreften lieren, dan woa ekj äwa diene Wunda nodenkjen. 28Mien Hoat es von Sorjen bedrekjt; stoakj mie soo aus dien Wuat vesprakjt. 29Bewoa mie fa onopprechtje Wäaj; doo mie derch dien Jesaz Jnod bewiesen. #Psa 119,104.128 30Ekj hab mie entschloten bestendich en de Woarheit to waundlen; ekj hab dien Jesaz emma ver mie. 31Ekj hool aun dien Jesaz faust, oo Har; lot mie nich toschaund woaren. 32Ekj woa dän Wajch ranen, dän dien Jesaz lieet, wiels du woascht mie doarenn emma mea Vestentnis jäwen.

33Lia mie, oo Har, no dien Jesaz to läwen, dan woa ekj daut bat aum Enj hoolen. 34Jeff mie daut, dien Jesaz to vestonen, dan woa ekj daut bewoaren un von gaunzem Hoaten hoolen. 35Leid mie opp dän Stich von diene Jebooten, wiels doa finj ekj miene Freid. 36Jeff mien Hoat daut velangen dien Jesaz to jehorchen, leewa aus rikj woaren. 37Lenkj miene Uagen auf von nuzloose Dinja. Beläw mie met niee Krauft. 38Lot dien Kjnajcht dien Jeboot doafäa hoolen, daut et secha dien Wuat es, daut ekj die fercht. 39Nemm dän Spott wajch von mie, dän ekj fercht, wiels waut du aunordenst es goot. 40Kjikj emol, ekj hab een velangen no diene Väaschreften. Beläw mie met diene Jerajchtichkjeit.

41Lot mie erfoaren woo leeftolich du best, oo Har, un diene Radunk, soo aus du vesproaken hast. 42Dan woa ekj däm auntwuaten, dee äwa mie spotten deit, wiels ekj velot mie opp dien Wuat. 43Nemm mie daut woare Wuat nich gaunz wajch, wiels ekj hab miene Hopninj doaropp jesat. 44Ekj well dien Jesaz aulawäajen emma un eewich hoolen. 45Ekj woa en Frieheit waundlen, wiels ekj hab mie diene Väaschreften jesocht. 46Ekj woa ver Kjennichs von dien Jesaz räden, un woa mie nich schämen. #Mat 10,18 47Ekj hab miene Freid aun diene Jebooten dee ekj jieren hab. 48Ekj häw en Respakjt miene Henj opp diene Jebooten to ieren, dee ekj jieren hab, un ekj denkj no äwa diene Ordnungen.

VII

49Denkj doaraun, waut du to dienen Kjnajcht sätst, wiels daut haft mie eene Hopninj jejäft. 50Mien Troost en miene lieden es dit, daut du mie en dien Jesaz Läwen vesproaken hast. 51De stolte spotten äwa mie onen Moten, oba ekj bliew doawäajen bie dien Jesaz. 52Ekj denkj aun daut Jesaz ut oole Tieden, oo Har, un ekj finj Troost doabennen. 53Ekj oaja mie äwa de gottloose, dee dien Jesaz veloten haben. 54Ekj sinj von diene Jesazen em Hus, wua ekj een framda sie. 55Ekj denkj de Nacht aun dienen Nomen, oo Har, un ekj woa dien Jesaz hoolen. 56Ekj hab mie doarenn jeeeft, dien Jesaz to hoolen.

VIII

57Ekj säd aul: Har, du best aules waut ekj bruck, un dien Wuat woa ekj hoolen. 58Ekj pracha die von gaunzem Hoaten, sie mie jenstich, soo aus du en dien Wuat vesproaken hast. 59Ekj hab äwa miene Wäaj nojedocht, un hab omjewongen un well no diene Jesazen läwen. 60Ekj spood mie un siem nich, diene Jebooten to hoolen. 61Wan de gottloose mie uk met Strenj binjen, ekj woa dien Jesaz nich vejäten. 62Ekj sto medden en de Nacht opp, die fa dien jerajchtet Jesaz to danken. #Psa 42,9 63Ekj sie een Frint aun aule, dee die ferchten, aun aule, dee diene Väaschreften hoolen. 64Diene truhoatje Leew, oo Har, felt de gaunze Ieed. Lia mie diene Jesazen.

65Du hast dien Wuat jehoolen, oo Har, un hast dienen Kjnajcht goodet jedonen. 66Jeff mie Weisheit, rajcht to rechten, wiels ekj jleew aun diene Jebooten. 67Ea ekj en deemootjende Schwierichkjeiten jerod, erd ekj; nu oba hool ekj dien Wuat. 68Du best goot un frintlich; lia mie diene Väaschreften. 69Wan de stolte mie uk met Läajes beschmäat haben, ekj hool diene Befäle von gaunzem Hoaten. 70Äare Hoaten sent hoatkjarschtich un haben de Jefeelen veloaren; ekj, oba, frei mie to dien Jesaz. 71Fa mie wia daut goot, daut ekj em Älent kjeem, daut ekj diene Jesazen lieed. 72Daut Jesaz ut dien Mul es mie mea wieet aus dusende Stekja Selwa un Golt.

73Diene Henj muaken miene Jestault uk mien Jeschekj; jeff mie daut Vestentnis diene Jebooten to lieren. 74Dee, dee die ferchten, freien sikj wan see mie seenen, wiels ekj velot mie opp dien Wuat. 75Ekj weet, oo Har, daut dien Jerecht jerajcht es, un daut du tru wieescht, aus du mie en Schwierichkjeiten brochst. 76Mucht diene truhoatje Leew mien Troost sennen, soo aus du dienen Kjnajcht en dien Wuat vesproaken hast. 77Lot dien leeftoljet Metleet äwa mie komen, daut ekj läwen kaun, wiels ekj hab eene Freid aun dien Jesaz. 78Lot de stolte toschaund woaren, wiels dee mie onen Uasoak met Läajes unjadrekjen. Ekj, oba, woa äwa diene Väaschreften nodenkjen. 79Lot dee, dee die ferchten no mie komen, dee, dee diene Väaschreften kjanen. 80Mucht mien Hoat oschuldich bliewen jäajen diene Jesazen, daut ekj mie nich schämen bruck.

81Miene Seel velangt no diene Radunk, un ekj räakjen met dien Wuat. 82Miene Uagen strenjen sikj sea aun to seenen, waut du vesproaken hast, un sajen: Wanea woascht du ons treesten? 83Wan ekj uk soo sie aus eene ladane Wientausch em Ruak, ekj vejät diene Jesazen nich. 84Woo lang saul dien Kjnajcht noch luaren? Wanea woascht du dee strofen dee mie nostonen? 85De stolte growen Growes fa mie nenn to faulen, dee, dee jäajen dien Jesaz sent. 86Opp aul diene Jesazen es to veloten; halp mie, wiels Menschen vefoljen mie onen Uasoak. 87Dee hauden met mie hia oppe Ieed boolt een Enj jemoakt, oba ekj hab dien Jesaz nich unjaloten. 88Wiels du soo leeftolich best, bewoa mien Läwen; dan woa ekj mie doaraun hoolen, waut du jerät hast.

XII

89Dien Wuat, oo Har, es eewich, daut steit faust em Himmel. #Jes 40,8 90Opp die kjenn wie ons emma un emma wada veloten. Du hast de Ieed häajestalt, un dee blift stonen. 91Derch diene Ordnungen steit aules waut du jeschaufen hast bat vondoag dän Dach, wiels aules mott die deenen. 92Wan dien Jesaz mie nich haud froo jemoakt, wia ekj en mien Älent omjekomen. #Jer 15,16 93Ekj woa diene Jebooten niemols vejäten, wiels doaderch helst du mie aum läwen. 94Wiels du mie ieejenst, halp mie, wiels ekj vesieekj diene Jebooten to hoolen. 95De gottloose ligjen opp de Lua, mie omtobrinjen. Ekj oba hool mie aun diene Jebooten. 96Ekj hab jeseenen, woo aules een Enj haft, oba diene Jebooten rieekjen äwa aules wajch.

XIII

97Oo woo jieren hab ekj doch dien Jesaz! Ekj denkj aule Dach doaräwa no. #Psa 1,2 98Wiels diene Jebooten emma met mie sent, moaken dee mie weisa aus miene Fiend. 99Ekj sie hecha jelieet aus aul miene Liera, wiels ekj denkj äwa diene Väaschreften no. 100Ekj sie kjlieekja aus de oole, wiels ekj hool mie aun diene Väaschreften. 101Ekj hab miene Feet von aule beese Wäaj trigjehoolen, daut ekj mie aun dien Wuat hoolen kunn. 102Ekj hab diene Jesazen nich veloten, wiels du mie dee jelieet hast. 103Woo seet sent doch diene Wieed! Diene Wieed sent fa mie em Mul seeta aus Honnich. 104Derch dien Wuat vesto ekj diene Wäaj, doawäajen kaun ekj aule faulsche Wäaj nich lieden. #Psa 119,29

XIV

105Dien Wuat es eene Laump, mie dän Wajch to wiesen, uk een Licht, mie dän Stich to bedachen. #2Pet 1,19 106Ekj hab jeschwuaren, daut ekj diene jerajchte Jesazen hoolen woa. 107Ekj hab sea jeläden, oba bewoa mien Läwen, oo Har, soo aus du en dien Wuat vesproaken hast. 108Har, lot die daut friewelje Dankopfa ut mien Mul jefaulen, un lia mie diene Jesazen. #Psa 19,15 109Mien Läwen es emma en Doodesjefoa, un doch vejät ekj dien Jesaz nich. 110De gottloose haben eene Schlenj fa mie oppjestalt, oba ekj sie nich von dien Jesaz aufjeert. 111Diene Jesazen sent mien eewjet Oafgoot, un ekj frei mie von Hoaten dee to haben. 112Ekj hab mie em Hoat väajenomen, diene Jesazen emma un eewich to hoolen.

113Ekj kaun dee, dee nich weeten aun wäm siene Sied see sennen wellen, nich lieden, oba dien Jesaz es mie sea väl wieet. #1Kjen 18,21; Psa 31,7 114Du best mien Toofluchtsuat un mien Schilt. Ekj velot mie opp dien Wuat. 115Wajch von mie, jie onjehuarsome, daut ekj mien Gott siene Jebooten hoolen kaun. 116Hool mie soo aus dien Wuat vesprakjt, daut ekj läwen kaun, un lot mie met miene Hopninj nich toschaund woaren. 117Hool du mie. Dan woa ekj secha sennen, un ekj woa diene Väaschreften emma ieren. 118Du vestatst aul dee, dee von dien Jesaz auferren, wiels äa hinjat Licht fieren es sest nuscht aus Läajes. 119Du schmitst aule gottloose opp de Ieed wajch aus Aufgank, doawäajen sent mie diene Jesazen soo väl wieet. #Jes 1,25 120Ekj fercht mie schudahauft fa die; mie es angst fa dien jesazlichet Jerecht.

XVI

121Ekj hab jedonen waut rajcht un opprechtich es; jeff mie nich han no dee, dee mie wellen Jewault aundoonen. 122Moak du daut secha, daut dien Kjnajcht daut woat goot haben. Lot de stolte mie nich unjakjrieen. 123Ekj kjikj no diene Radunk, bat mie de Uagen meed woaren, un no diene Jerajchtichkjeit, dee du en dien Wuat vesproaken hast. 124Haundel met dien Kjnajcht doano aus du truhoatich leeftolich best, un lia mie diene Jebooten. 125Ekj sie dien Kjnajcht, jeff mie daut Vestentnis to weeten, waut diene Jebooten lieren. 126Daut es Tiet, oo Har, daut du waut doamet deist. Dee haben dien Jesaz jebroaken. 127Doawäajen hab ekj diene Jebooten leewa aus Golt, soogoa aus väl feinet Golt. 128Un wiels ekj aul diene Jesazen doafäa hool daut dee rajcht sent, kaun ekj aule faulsche Wäaj nich lieden. #Psa 119,29

XVII

129Diene Jesazen sent wundavoll; doawäajen hool ekj dee. 130Wan dien Wuat openboat woat, jeft daut Licht un moakt de eefache kluak, daut to vestonen. 131Ekj hab mien Mul wiet op un lekjmul no diene Jebooten, wiels ekj hab een velangen doano. 132Kjikj emol no mie un hab Metleet met mie, soo aus du emma to dee deist, dee dienen Nomen ieren. 133Lot mie secha gonen, soo aus dien Wuat lieet, un lot kjeene Sind äwa mie Macht haben. 134Rad mie von dee Menschen, dee mie unjadrekjen, daut ekj diene Jebooten hoolen kaun. 135Kjikj met Jefaulen opp dien Kjnajcht, un unjarecht mie en diene Jesazen. 136Miene Tronen streemen von miene Uagen, wiels Menschen diene Jebooten nich hoolen.

XVIII

137Du, oo Har, best jerajcht, un diene Jerechten sent rajcht. 138De Jesazen, dee du hanjelajcht hast, sent jerajcht; doaropp es voll to veloten. 139Ekj hab mie schia doot jeiewat, wäajen miene Jäajna dien Wuat veachten. #Psa 69,10 140Diene Vespräakjungen sent jrintlich utjeprooft worden, un dien Kjnajcht freit sikj doatoo. 141Wan ekj uk mau läach un veacht sie, ekj vejät diene Jesazen nich. 142Diene Jerajchtichkjeit es eewich, un dien Jesaz es Woarheit. 143Trubbel un Veläajenheiten sent äwa mie jekomen, oba diene Jebooten sent miene Freid. 144Diene Jesazen sent eewich rajcht; jeff mie daut, dee to vestonen, daut ekj läwen kaun.

XIX

145Ekj roop von gaunzem Hoaten: auntwuat mie, oo Har, un ekj woa diene Jebooten hoolen. 146Ekj roop die aun, mie to raden, un ekj woa diene Jebooten hoolen. 147Ekj sto noch bie Diesta opp un schrie no Help, wiels ekj velot mie opp dien Wuat. 148Ekj bliew de Nacht waka, äwa diene Vespräakjungen notodenkjen. 149Har, soo aus du truhoatich leeftolich best, soo horch nu uk no mie; en diene jerajchte Jerechten bewoa mien Läwen. 150Dee, dee mie met beese Aufsechten nostonen, komen emma noda, oba dee sent wiet auf von dien Jesaz. 151Oba du, oo Har, best dicht bie, un diene Jebooten sent aula Woarheit. 152Ekj hab aul lang trigj von diene Jebooten jelieet, daut du dee jejäft hast, eewich to bliewen.

153Kjikj emol no miene lieden un rad mie, wiels ekj hab dien Jesaz nich vejäten. 154Stried du fa miene Sach un rad mie. Bewoa mien Läwen, soo aus du en dien Wuat vesproaken hast. 155Radunk es fa de gottloose wiet auf, wiels dee sieekjen nich no diene Jesazen. 156Dien Metleet es groot, oo Har; en diene jerajchte Jerechten, bewoa mien Läwen. 157Ekj hab väl Fiend un Jäajna, dee mie vefoljen, oba ekj hab diene Jebooten nich veloten. 158Ekj see de ontrue veachta, bat mie daut äakjelt; see hoolen dien Wuat nich. 159Kjikj woo jieren ekj diene Jebooten hab. No diene truhoatje Leew no, Har, stoakj mien Läwen. 160Dien Wuat es sest nuscht aus Woarheit. Diene jerajchte Jesazen sent aula eewich. #Joh 17,17

XXI

161Rejierungsmana vefoljen mie onen Uasoak, oba ekj fercht sest nuscht aus dien Wuat. 162Ekj frei mie to dien Wuat soo aus eena, dee een grooten Schauz finjt. 163Mie äakjelt aule Faulschheit, un ekj kaun daut nich lieden; ekj hab dien Jesaz jieren. 164Ekj low die säwen mol dän Dach doafäa, daut diene Jebooten soo jerajcht sent. 165Groote Fräd haben dee, dee dien Jesaz ieren, un nuscht kaun dee tofaul brinjen. 166Ekj lua no diene Radunk, oo Har, un ekj doo waut diene Jebooten sajen. 167Ekj hool diene Jebooten, wiels ekj hab dee sea jieren. 168Ekj hool diene Väaschreften un diene Jebooten, wiels du kjanst aul miene Wäaj.

XXII

169Oo Har, hia mien kloagen. Jeff mie Ensecht, no dienem Wuat to läwen. 170Horch no mien prachren. Rad mie soo aus du en dien Wuat vesproaken hast. 171Ekj woa die lowen, wiels du lieescht mie diene Jebooten. 172Ekj woa von dien Wuat sinjen, wiels diene Jebooten sent aula jerajcht. 173Lot diene Haunt reed sennen mie to halpen, wiels ekj hab diene Jebooten fa mie jewält. 174Har, ekj hab een velangen no diene Radunk, un hab eene Freid aun dien Jesaz. 175Lot miene Seel läwen, daut ekj die lowen kaun. Mucht dien Jesaz mie opprajcht hoolen. 176Ekj sie soo aus een vebiestadet un veloarnet Schop; sieekj dienen Kjnajcht, wiels ekj hab diene Jebooten nich vejäten. #Jes 53,6

Currently Selected:

Psalmen 119: PB

Highlight

Compare

Copy