Psalmen 118

118

De Kjennich dankt fa Gott siene Help

1Dankt dän Harn, wiels hee es soo goot un siene truhoatje Leew es eewich. #Psa 106,1

2Lot Israel sajen: Siene truhoatje Leew es eewich. 3Lot Aaron sien Famielje Staum sajen: Siene truhoatje Leew es eewich. 4Lot dee, dee dän Harn ferchten, sajen: Siene truhoatje Leew es eewich.

5Aus ekj veläajen wia, roopt ekj nom Harn. De Har auntwuad mie un stald mie frie. 6De Har es met mie; ekj woa mie nich ferchten. Waut kjennen Menschen mie doonen? #Psa 56,5; Reema 8,31; Heb 13,6 7De Har es met mie, mie to halpen. Ekj woa seenen, woo miene Fiend unjen ligjen. 8Daut es bäta Help biem Harn to sieekjen aus sikj opp Menschen to veloten. #(8 un 9) Psa 146,3 9Daut es bäta Help biem Harn to sieekjen aus sikj opp Aumtslied to veloten.

10Väle Velkja wieren rom mie, oba derch dän Harn sienen Nomen muak ekj een Enj doamet. 11Dee omrinjden mie von aule Sieden, jo, von aule Sieden omrinjden see mie, oba derch dän Harn sienen Nomen muak ekj een Enj doamet. 12Dee schwoarmden rom mie soo aus Bieen, un flaumden aus een Stachelstruckfia. Oba derch dän Harn sienen Nomen muak ekj een Enj doamet. 13Ekj wort trigjeschupst, daut ekj faulen sull, oba de Har holp mie. 14De Har es miene Krauft un mien Psalm, un es miene Radunk jeworden. #2Mo 15,2

15Horcht woo de jerajchte en äare Zelten Dankleeda sinjen fa äare Radunk: Dän Harn siene rajchte Haunt haft jewaultje Dinja jedonen. 16Dän Harn siene rajchte Haunt woat huachjehoolen. Dän Harn siene rajchte Haunt deit jewaultje Dinja. 17Ekj woa nich stoawen oba läwen un vetalen, waut de Har jedonen haft. 18De Har haft mie hoat jestroft, oba haft mie nich dän Doot hanjejäft. #2Kor 6,9

19Moakt mie de Jerajchtichkjeits Puaten op. Ekj woa doa derchgonen un woa dän Harn danken. 20Daut es dän Harn siene Puat, wuaderch de jerajchte nenn gonen sellen. #Jes 26,2 21Ekj woa die danken, daut du mie auntwuaten deetst. Du best miene Radunk jeworden.

22De Steen, dän de Bulied wajchjeschmäten haben, es de Akjsteen jeworden. #(22 un 23) Jes 28,16; Mat 21,42 23Daut haft de Har jedonen un es een Wunda ver onse Uagen. 24Dit es de Dach dän de Har jemoakt haft; well wie ons freien un froo sennen. 25Oo Har, rad ons! Oo Har, lot ons daut jlekjen! 26Jesäajent es wäa en dän Harn sien Nomen kjemt; wie haben junt jesäajent, dee jie vom Gotteshus sent. #Mat 21,9; 23,39 27De Har es Gott, un hee haft sien Licht äwa ons jebrocht. Met Asta en de Henj, got met de Fastjast toop, bat aun de Hienna aum Aultoa. #2Mo 27,1-2

28Du best mien Gott, un ekj woa die danken; du best mien Gott, un ekj woa die lowen. 29Dankt dän Harn, wiels hee es goot, un siene truhoatje Leew es eewich.

Currently Selected:

Psalmen 118: PB

Highlight

Compare

Copy