Spricha 6
6
Vea Woarnungen
1Mien Kjint, wan du die fa eenen aundren siene Schult vebircht hast, un am doaropp diene Haunt jejäft hast, #(1 un 2) Spr 11,15; 20,16; 22,26 2un wan du die derch diene ieejne Wieed faustjerant hast, un best derch diene ieejne Wieed faustjenomen, 3dan doo dit, mien Kjint, un moak die frie, wiels du best dien näakjsten en de Henj jefollen; go un bieej die ver am, un pracha am die loostoloten. 4Lot diene Uagen nich schlopen un diene Uagenläda nich schleeprich woaren. 5Brinj die ut de Faul rut, soo aus een Ree ooda een Voagel sikj vom Jäaja wajchbrinjt.
6Go, du fula Pels, no de Eemskje, un kjikj emol woo dee läwen, un nemm Lia aun von dee. #Spr 10,4; 20,4 7Dee haben kjeenen Leida, kjeenen väaschta un kjeenem dee äwa an rejieet, 8un doch brinjen see äaren Väarot toom Winta aul em Somma nenn. 9Woo lang west du Fulenza die romligjen? Wanea west du entlich oppstonen? 10Du sajchst: Ekj well bloos noch een bät schlopen, ekj well mie de Henj toopfoten un utreiwen. #(10 un 11) Spr 24,33-34 11Oba noch wan du schlapst woat de Oamoot äwa die komen soo aus een Soldot, dee reed toom Kjrich es.
12Een beesa Mensch, dee to nuscht daucht, jeit rom Läajes vetalen. #Spr 10,31-32 13Dee plinkjt met de Uagen, moakt waut faksjet met de Feet un wiest met däm Finja toom junt veleiden. #Spr 10,10 14Un en sien vekjieedet denkjen plont hee dän tietäwa beeset, un recht Trubbel aun. 15Doawäajen woat sien vedoawen plazlich äwa am komen, un doa woat met eemol kjeene Help fa am sennen.
16Doa sent sas Dinja dee däm Harn jäajenaun sent. Nä, doa sent säwen: 17stolte Uagen, eene Tung dee Läajes rät, Henj dee oschuldje Menschen doot moaken, 18een Hoat daut beese Wäaj plont, Feet dee schwind nom beesen ranen, 19een Zeij dee faulschet Zeichnis jeft, un een Maun dee Oneenichkjeit tweschen Breeda aunrecht.
Ehebruch blift nich onen Foljen
20Mien Kjint, doo waut dien Voda die sajcht,
un vejat niemols waut diene Mutta die jelieet haft. #Spr 1,8
21Hool äare Wieed emma bie die em Hoat enjeschloten,
un henj die dee om dien Hauls.
22Wan du reisen deist, woaren dee die dän Wajch wiesen,
wan du schlapst, woaren dee die hoolen,
un wan du oppwakjst, woaren dee to die räden. #Psa 119,172
23Daut waut see lieren, es een dachet Licht;
äa trajchtwiesen kaun die lieren, woo du läwen saust.
24Daut kaun die von onbandje Frues
un von äare lockende Wieed wajch hoolen. #Spr 2,16
25Lot die daut em Hoat nich jelesten wan dee schmock lat,
un lot ar die nich jewennen met äa Uagen plinkjen.
26Derch eene onmoralische Fru kjemt een Maun soo wiet,
daut hee bloos eene Brootkjarscht haft,
un eene aundre Fru kjricht daut wieetvolle Läwen.
27Kaun een Maun Fia en de Schoot hoolen,
onen sikj de Kjleeda to vebrennen?
28Kaun eena opp heete Kolen gonen,
un sikj nich de Feet vebrennen?
29Soo jeit daut uk däm dee no sienen Noba siene Fru jeit.
Wäa sikj met ar aufjeft, woat siene Strof kjrieen. #Spr 5,8-14
30Menschen veachten eenen Stäla nich
wan hee stält sikj dän Hunga to stellen;
31un doch, wan hee jejräpen woat,
mott hee daut säwen dobbelt trigj tolen;
hee mach aules motten jäwen waut hee em Hus haft. #2Mo 21,37
32Wäa oba met eenen aundren Maun siene Fru de Ehe brakjt, brukt nich sien Vestaunt;
wäa daut deit, brinjt siene ieejne Seel en de Grunt.
33Dee woat Wunden un Schaund kjrieen,
un siene Schaund woat nich wajchjewescht woaren.
34Aufgonst reizt eene Fru äaren Maun toom Oaja,
doawäajen woat hee biem Rach eewen nich veschoonen.
35Hee lat sikj met nuscht bekjeepen,
un lat sikj uk nich tofräd stalen,
eendoont wooväl Jeschenkja du am jefst.
Currently Selected:
Spricha 6: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
