Spricha 7
7
Lot die nich veleiden!
1Mien Kjint, vejat nich waut ekj säd,
un vejat niemols waut ekj säd du doonen sust.
2Doo waut ekj die jesajcht hab, dan woascht du läwen.
Bewoa miene Lia soo aus dän Kjikja em Uag.
3Binj die dee aum Finja un hool dee em Hoat, aus wan dee doljeschräwen sent.
4Saj to de Weisheit: Du best miene Sesta,
un nan de Kluakheit: dien notstet Frintschoft,
5daut dee die von de framde Fru wajchhelt,
von de onmoralische un glautmulje.
6Ekj wia emol en mien Hus un kjikjt toom Fensta rut. 7Ekj kjikjt no de onbedochte junge Mana un sach mank dee eenen dee sien Vestaunt nich brukt. 8Hee jinkj velenjd de Gaus, dicht bie dee Akj wua eene jewesse Fru wond, un jinkj no äa Hus opptoo, 9jäajen Owent em Tweediesta aus daut diesta wort. 10Dan kjeem de Fru rut am to bejäajnen. See wia aunjetrocken aus eene Hua un haud äaren Plon reed. 11(See es lud un haslich, äare Feet bliewen niemols tus. 12Nu es see opp de Gaus, nu opp däm Saumelplauz. See steit opp aule Akjen opp de Lua.) 13See kjrieech am to hoolen un kust am, un säd gaunz driest to am: 14“Ekj hab vondoag Dankopfa fa mie jebrocht un hab mien Vespräakjen ver Gott jehoolen. #3Mo 7,15-17 15Doawäajen kjeem ekj rut die to trafen; ekj socht no die un hab die jefungen. 16Ekj hab mien Bad met eene bunte Lienzeich Spreed von Ägipten bedakjt. 17Ekj hab mien Bad met scheenrikjende Mirren un Kerneel Eelj besprezt. 18Komm, well wie ons de nachtäwa goot sennen; well wie ons daut scheengonen loten. 19Mien Maun es nich tus; dee es opp eene lange Reis jefoaren. 20Hee neem siene Jelttausch voll Jelt met, un woat nich ea aus toom Volmon no Hus komen.” 21Soo veleid see am met scheene Wieed un jewonn am met äa glautmuljet Schmeichlen. 22Met eemol jinkj hee ar hinjaraun, soo aus een Oss nom Schlachta, soo aus een Ree en de Schlenj nenn staupt, 23bat am een Feil derch de Läwa stuak. Soo aus een Voagel em Nat nenn flicht, un nich weet daut am daut sien Läwen kost.
24Nu, miene Säns, horcht no mie; nämt junt daut aun waut ekj saj. 25Lot soone Fru nich jun Hoat jewennen, un ert nich opp äare Wäaj nopp. 26See haft väl Mana en de Grunt jebrocht, un es mea toom Doot jewast aus eena talen kaun. 27Äa Hus es een Huachwajch nom Grauf, wua eena rauf en daut Doodenrikj nenn foat.
Currently Selected:
Spricha 7: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
