Spricha 5
5
Woarnunk fa Ehebruch
1Mien Kjint, moakj miene Weisheit un horch waut ekj die von miene Ensecht to lieren hab,
2daut du lieescht tweschen rajcht un orrajcht to unjascheeden,
un daut du lieescht vestendich to räden.
3Eene onbandje Fru äare Wieed sent seet aus Honnich,
un waut see rät es glauta aus Eelj, #(3-6) Spr 2,16-19
4oba aum latsten Enj es see soo betta aus Wormfros,
un schoap aus een dobbelt schniedjet Schwieet.
5Äare Feet ranen rauf nom Doot; äa Gank fieet em Grauf nenn.
6See jeit nich jlikj opp däm Läwens Wajch;
see waundat doa rauf un woat nich en, waut doa passieet.
7Dan jehorcht mie nu, miene Kjinja, un vejät nich waut ekj junt jesajcht hab.
8Blieft wiet wajch von soone Fru,
un got nich dicht bie äare Husdäa,
9daut du diene Iea nich aundre jefst
un de ruchloose die nich wajchweschen,
10daut sikj de framde nich von daut näaren, waut dient es,
un daut, waut du toopjeoabeit hast, en eenen framden sien Hus kjemt,
11un daut du truarich opp däm Stoawbad lichst un stänst,
wan du dienen Kjarpa met aules toop en de Grunt jebrocht hast,
12un dan sajchst: “Woo hab ekj mie nich belieren loten,
un woo haft mien Hoat de Woarnunk veacht?
13Ekj hab nich no miene Lierasch äare Stemm jehorcht,
un miene Uaren nich hanjehoolen no waut see mie lieeden.
14Ekj wia meist gaunz em Ojjlekj jeroden ver aule Lied un aulet Volkj.” #5Mo 22,28-29
15Sie tru to diene ieejne Fru, un jeff eensich ar aul diene Leew,
soo aus du dien Wota ut dienen ieejnen Borm nemst.
16Sie nich soo aus een Maun no däm irjent eene Fru komen kaun, soo aus no eenen Darpsborm.
17Hool aul diene Krauft fa diene ieejne Fru, un hab nich Jeschlajchtsvekjia met eene aundre.
18Sie jlekjlich met diene Fru, un hab aul diene Freid met dee,
dee du die en diene Jugent frieen deetst. #Liera 9,9
19Straum un leeftolich aus een Ree,
lot äa liebkoosen die jlekjlich moaken,
lot ar met äare Leew om die sennen.
20Mien Sän, wuarom sust du diene Leew een onmoralischet Frumensch jäwen?
Wuarom wurscht du die leewa aun eene aundre Fru erjazen?
21De Har sitt aule Menschen äare Wäaj,
wuaemma du han jeist, sitt hee waut du deist.
22De gottloosa woat sikj derch siene Sind en siene ieejne Faul faustranen,
un hee es en siene ieejne Sind jebungen.
23Hee kjemt to dood, wiels hee nich lieed sikj selfst to beharschen;
siene groote Dommheit brinjt am en daut Grauf.
Currently Selected:
Spricha 5: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
