Spricha 3
3
Aunerkjanunk bie Gott un Menschen
1Mien Kjint, vejat mien Jesaz nich,
un hool miene Jebooten met dien gaunzet Hoat; #(1 un 2) 3Mo 18,5
2dee woaren die een langet Läwen un väl Joaren
un Fräd un Jlekj brinjen.
3Lot truhoatje Leew un Woarheit nich von die gonen;
henj die dee om daut Jenekj un hool dee em Hoat aus wan dee doljeschräwen sent. #5Mo 6,8; Jer 31,33
4Dan woascht du bie Gott un Menschen
goot aunjeseenen sennen un eenen gooden Nomen haben.
5Velot die opp däm Harn met dien gaunzet Hoat,
un velot die nich opp dien ieejnet Vestaunt.
6Denkj aun am en aules waut du deist,
un hee woat die dän rajchten Wajch wiesen.
7Hool die nich selfst fa weis; fercht däm Harn,
un bliew wajch von waut schlajcht es. #Jes 5,21
8Daut woat fa dienen Kjarpa jesunt sennen,
un woat diene Knoakes stoakj hoolen.
9Iea däm Harn met waut du hast,
un opfa am daut ieeschte Poat von aul diene Ennom. #2Mo 23,19
10Dan woaren diene Spikjasch voll woaren,
un diene Wien Krucken woaren äwaranen.
11Mien Kjint, veacht daut nich wan de Har die belieet,
un sie nich ojjeduldich wan hee die vemont; #(11 un 12) Heb 12,5-6; Hiob 5,17-19
12wäm de Har goot es, däm belieet hee,
soo aus een Voda sien Kjint deit, to däm hee sikj freit. #1Kor 11,32; Opb 3,19
Waut de Weisheit wieet es
13Woo jesäajent es doch een Mensch dee Weisheit finjt,
un een Mensch dee vestendich woat.
14Weisheit es am mea wieet aus Selwa,
un de Jewenst doaderch mea wieet aus Golt. #Spr 8,10
15Weisheit es mea wieet aus Parlen,
un es nich to vejlikjen met waut du die wenschen machst.
16En äare rajchte Haunt rieekjt Weisheit langet Läwen han,
un en äare linkje Haunt Rikjtum un Iea.
17Weisheit lieet ons aunjenäme Wäaj to gonen,
un aul äare Stiej sent Fräd.
18See es een Läwen jäwenda Boom fa dee, dee äa aunnämen,
un jesäajent sent aul dee, dee sikj aun Weisheit hoolen. #Spr 11,30; 13,12; 15,4
19Derch Weisheit läd de Har dän Grunt fa de Ieed,
hee vestunt de Himmel aum Plauz to stalen. #(19 un 20) Spr 8,22-31
20Derch siene Weisheit es de Ieed deep unjen opjebroaken,
un de Wolkjen loten dän Deiw faulen.
21Mien Kjint, hool die aun de Weisheit,
kjikj emma doano daut du Sachen vestonen kaust.
22Dee woat Läwen fa diene Seel un Straums fa dienen Hauls sennen.
23Dan woascht du secha dienen Wajch gonen
un woascht die nich de Feet steeten.
24Wan du die dolajchst, woascht du die nich enjsten;
jo, du woascht die dolajen un ruich schlopen. #Psa 3,6
25Fercht die nich, daut plazlich waut schrakjeljet komen woat,
uk nich wan de gottloose aus een Storm oppkomen.
26Opp däm Harn kaust du die veloten;
hee woat doano seenen, daut see die nich faustnämen. #Spr 10,29
Daut rajchte Vehoolen tweschen de Menschen
27Hool nich goodet trigj von däm, däm daut traft,
wan daut en diene Krauft steit goodet to doonen.
28Saj nich to dienen Noba:
“Go un komm trigj;
morjen woa ekj die daut jäwen,”
wan du daut aul bie die hast.
29Plon nich beeset jäajen dienen Noba,
dee em vetruen biesied die wont.
30Stried die nich met wäm onen Uasoak
wan hee die nuscht schlajchtet jedonen haft.
31Sie nich aufjenstich von eenen dee Jewault brukt,
un wäl die kjeene von siene Wäaj;
32daut es oppscheislich waut de vekjieede Menschen doonen,
oba de Har es de jerajchte sea noaun. #Psa 25,14
33Däm gottloosen sien Hus es vom Harn veflucht,
oba hee säajent de jerajchte äare Woninj.
34Hee veacht dee, waut veachtlich sent,
un es jenstich to dee, waut deemootich sent. #1Pet 5,5
35De Weise woaren Iea kjrieen,
oba de Noaren woaren Schaund arnten.
Currently Selected:
Spricha 3: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
