Spricha 2
2
De Weisheit es een Schauz un een Schutz
1Mien Kjint, nemm miene Lia aun,
un hool miene Jebooten aus eenen Schauz en die.
2Horch goot, no waut weis es, un bemieej die daut to vestonen.
3Wan du no Ensecht frajchst, un om Vestentnis bätst, #(3-6) Jak 1,5
4wan du doano sieekjst aus no Selwa,
un doano romforschst aus no eenen vestoaknen Schauz,
5dan woascht du lieren däm Harn to ferchten,
un woascht Gotteserkjantnis finjen.
6De Har jeft Weisheit;
waut de Har rät brinjt Erkjantnis un Vestentnis. #Dan 2,20-23
7Hee jeft de Opprechtje woare Weisheit;
hee es een Schilt fa dee, dee opprechtich waundlen. #Psa 7,11
8Hee woakt äwa dee, dee daut rajchte doonen,
un helt dee secha, dee tru to am sent.
9Dan woa jie daut jerajcht sennen, nom rajcht seenen,
fromm sennen un aule goode Wäaj vestonen.
10Wan die de Weisheit en daut Hoat kjemt,
un diene Seel eene Freid aun Erkjantnis lieren haft, #1Kor 1,30
11woat de Väasecht die bewoaren,
un dien Vestaunt woat die doabie hoolen.
12Daut woat die halpen von beeset Läwen wajch to bliewen,
un uk von däm Maun, dee vekjieede Dinja rät,
13von dee, dee dän opprechtjen Wajch veloten
un de diestre Errwäaj nogonen.
14Dee freien sikj to äa frajchet Läwen,
dee gonen beese un vekjieede Sachen no
15un sent kromm un hinjalestich.
16Weisheit bewoat von de Ehebräakjarin,
un de framde Fru äa glautmuljet schmeichlen,
17eene dee äaren jugentlichen Kommarod velat,
un äaren Bunt met Gott vejäten haft.
18Wäa no äa Hus jeit, finjt dän Doot;
äare Jenj fieren toom Doot.
19Dee, dee doahan gonen, komen niemols trigj,
un komen uk nich trigj opp dän Läwenswajch nopp.
20Soo kaust du met goode Menschen opp eenen Wajch gonen,
un een Läwen fieren daut jerajcht es.
21De Opprechtje woaren en daut Launt wonen,
un de fromme woaren doabennen bliewen. #Psa 37,9; Mat 5,5
22Oba de gottloose woaren äa Launt velieren,
un de hinjalestje woaren von doa utjerot woaren. #Psa 37,10
Currently Selected:
Spricha 2: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
