Spricha 1
1
Waut wie von dit Buak lieren kjennen
1Dit sent Sprechwieed von Salomo, David sienen Sän, Kjennich von Israel. #1Kjen 5,9-12 2De Sprechwieed sent doatoo jeschräwen, daut wie weeten waut Weisheit es, un woo wie ons belieren kjennen. Dee halpen ons Wieed to vestonen, dee eenen deepen Enhault haben 3un dee kluak, jerajcht, rajcht un opprajcht sent. 4Dee halpen de onbedochte kluak to sennen, un de junge vestendich un veninftich to woaren. 5Wäa weis es, woat doano horchen un sikj bätren, un een weisa Maun woat von dee lieren 6Sprechwieed to vestonen, un soo uk de Weise äare Räd, un äare Rotsels un Biespels. 7Forcht fa däm Harn es de Aunfank von Vestentnis. De onbedochte veachten Weisheit un loten sikj nich belieren. #Hiob 28,28; Psa 111,10; Spr 8,13; 9,10
Woarnunk jäajen schlajchte Jesalschoft
8Mien Kjint, horch doano waut dien Voda die jelieet haft,
un vejat diene Mutta äare Wieed nich; #5Mo 21,18-21; Spr 6,20; 13,1
9daut es fa die soo aus een schmocka Hoot opp däm Kopp
un eene straume Kjäd om dän Hauls.
10Mien Kjint, wan Frind die locken toom schlajchtet doonen, dan go nich met. #5Mo 13,7-9; Spr 16,29
11Wan dee sajen: “Komm met ons. Wie wellen opp de Lua ligjen un wäm auntsied schaufen.
Well wie em Vestäakj ligjen un de oschuldje onen Uasoak äwafaulen.
12Well wie dee läwendich auntsied schaufen, soo aus daut Grauf wäm oppschlukt,
un de fromme daut soo loten gonen, aus wan wäa unjen en de Gruft nenfoat.
13Wie woaren aulahaunt wieetvolle Sachen finjen;
well wie ons dee tooieejnen, bat wie onse Hiesa voll haben.
14Woag daut met ons. Well wie aules toopschmieten
un aulatoop eene Jelttausch haben.”
15Mien Kjint, go nich met opp äaren Wajch;
lot dienen Foot nich opp äaren Stich nopp gonen.
16Dee äare Feet ranen no daut beese,
un spooden sikj Bloot to vejeeten.
17Daut es bestemt vejäfs een Voagelnat opptostalen, wan de Väajel daut seenen;
soo bliew du uk vom beesen wajch un lot die nich jriepen.
18De beese Menschen ligjen opp de Lua no äa ieejnet Bloot,
un stonen sikj selfst nom Läwen.
19Soo jeit daut eenem jiedren dee fa sikj Jewenst toopjiezt;
daut nemt dän Ieejendeema nohäa selfst daut Läwen.
De Weisheit woarnt
20Weisheit roopt buten lud, dee lat sikj opp de Gaussen hieren. #(20 un 21) Spr 8,1-3
21See schricht doa wua Menschen toopkomen;
dee haft waut bie daut Stautspuat to sajen.
22Woo lang well jie oschuldje oschuldich bliewen,
un jie Spetta eene Freid haben aum spotten,
un jie onbedochte jäajen junt belieren sennen?
23Paust opp wan ekj vemonen doo; kjikjt emol,
ekj woa junt weeten loten woo ekj denkj,
daut jie vestonen kjennen waut ekj saj.
24Ekj roopt un jie wieren jäajenaun,
ekj strakjt miene Haunt ut un kjeena kjemmad sikj doarom. #Jes 65,2.12
25Jie veachten aul mienen Rot,
un wullen junt nich von mie belieren loten.
26Doawäajen woa ekj lachen wan jun Ojjlekj kjemt;
ekj woa äwa daut spotten waut junt enjst. #5Mo 28,63
27Wan june Forcht soo aus een Storm äwa junt kjemt,
un jun vedoawen soo kjemt aus een Wintkjriesel,
wan Angst un Noot äwa junt kjemt,
28dan woaren see no mie roopen, oba ekj woa nich auntwuaten;
dee woaren sea no mie sieekjen, oba woaren mie nich finjen. #Jes 59,2; Micha 3,4
29Wiels see jäajen daut lieren wieren,
un däm Harn nich ferchten wullen;
30wiels see nuscht von mienen Rot weeten wullen,
un äwa aul miene Belierunk lastaden,
31doawäajen sellen see daut utäten, waut see sikj enjerieet haben,
un äwasaut woaren von äare ieejne Rotschläaj. #Jes 3,10-11
32Waut de onvestendje jelesten deed, brinjt an dän Doot,
un de onbedochte äa Jlekj brinjt an om.
33Wäa oba no mie horcht, woat secha bliewen;
dee woat jenuach haben un kjeen Ojjlekj ferchten.
Currently Selected:
Spricha 1: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
