Spricha 12
12
Gott jehuarsom sennen brinjt Läwen
1Wäa sikj wellich belieren lat, woat kluak woaren,
wäa nich well Lia aunnämen, blift schoslich. #Spr 13,1.18
2Eenen gooden Maun lat de Har goodet tookomen,
oba hee vedaumt dee, dee schlajcht sent.
3Derch gottloos sennen, kjemt eena nich opp fausten Grunt,
oba eenen jerajchten siene Wartlen sent faust.
4Eene goode Fru es eene Kroon fa äaren Maun,
oba eene dee am schaund moakt, es soo aus vefulde Knoakes. #Spr 31,10-31
5Waut de jerajchte plonen, es opprechtich,
oba aun de ojjerajchte äa Rot schmäat eena sikj aun.
6Menschen woaren omjebrocht derch waut de ojjerajchte sajen,
oba waut de jerajchte räden, rat an.
7De gottloose woaren omjeschmäten un sent wajch,
oba de jerajchte bliewen met Famielje toop stonen. #Spr 10,25
8Een Maun woat doano jeloft aus hee weis es,
oba Menschen met vedreide Jedanken woaren toschaund.
9De jeweenelja Mensch met een Oabeida es bäta auf,
aus dee wäa väajeft groot to sennen un nich to äten haft.
10Een jerajchta erboarmt sikj uk äwa sien Vee,
oba de ojjerajchta es ommenschlich wan hee uk aul well veninftich sennen. #2Mo 23,5
11Wäa sien Launt beoabeit, woat jenuach Broot haben;
wäa no onnuzboare Dinja sträft, brukt nich sienen Vestaunt. #Spr 28,19
12De ojjerajchte freien sikj aun Schoden doonen,
oba de jerajchte wartlen sikj en un waussen.
13De beese ranen sikj faust en äare ieejne faulsche Wieed,
oba de jerajchte woaren veschoont vom Trubbel.
14Wäa goodet rät, kjemt väl goodet too;
eena vedeent doano aus eena met de Henj schauft. #Spr 18,20
15Een Schosel sitt siene Wäaj emma aus rajcht;
wäa oba Rot aunnemt, dee es weis.
16Een Schosel wiest sienen Oaja boolt,
wäa oba Beleidjunk äwasitt, es kluak.
17Wäa de Woarheit rät, es een gooda Zeij;
een faulscha Zeij rät Läajes.
18Onväasechtje Wieed spekjen aus een Schwieet,
oba de Weise räden heelsome Wieed. #Spr 13,3
19Opprechtje Leppen bestonen opp emma,
oba eene faulsche Tung besteit nich lang.
20Wäa beeset plont, haft een faulschet Hoat,
oba wäa Fräd moaken deit, brinjt Freid.
21Däm jerajchten traft kjeen Ojjlekj,
oba de gottloose kjrieen äare volle Mot doavon.
22Faulsche Miela sent däm Harn jäajenaun;
am jefaulen dee, dee tru haundlen.
23Een vestendja Maun sajcht nich aules waut hee weet,
een Schosel prolt met siene Dommheit.
24Wäa flietje Henj haft, woat rejieren,
oba däm Fulenza siene Henj motten Sklowenoabeit doonen.
25Wäa em Hoat beduat es, haft daut schwoa,
oba wäa jetreest woat, freit sikj. #Spr 16,24
26De jerajchta wält siene Frind väasechtich,
oba de ojjerajchte äa Wajch veleit eenem.
27Een Fulpelz reet nich emol sienen Broden wan hee jejäajat haft;
oba een flietja Maun freit sikj to daut, waut hee haft.
28Jerajcht sennen brinjt Läwen,
oba schlajcht sennen fieet nom Doot.
Currently Selected:
Spricha 12: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
