Spricha 11
11
Dee waut frie jäwen, woaren emma rikja
1De Har es veläajen met een vestaldet Jewicht,
oba hee freit sikj to een vollet Jewicht. #3Mo 19,35-36
2Wan Stolt kjemt, kjemt uk Schaund,
oba met Deemoot kjemt uk Weisheit. #Spr 16,18
3Wäa opprechtich es, woat opp dän rajchten Wajch bliewen.
De hinjarigjsche komen om derch äa onopprechtjet Läwen.
4Rikj sennen bewoat nich jäajen Gott siene Strof,
jerajcht sennen rat vom Doot. #Spr 10,2; Luk 12,20
5Dän frommen sien jerajcht sennen moakt sien Wajch jlikj,
oba däm gottloosen sien beeset Läwen brinjt am en de Grunt.
6De fromme woaren sikj raden derch jerajcht sennen,
oba eena opp däm nich to veloten es, woat von sien Janka faustjenomen.
7Wan een ojjerajchta Mensch stoaft, es siene Hopninj veloaren,
un daut wuamet de ojjerajchta räakjent, haft daut dan een Enj. #Spr 10,28
8De jerajchta Mensch woat ut siene Noot jerat,
oba däm ojjerajchten traft dee.
9Met waut de gottloosa sajcht, brinjt hee sienen Noba en de Grunt;
oba de jerajchta es kluak, un kaun sikj raden.
10Wan de jerajchte Jlekj un Säajen haben, freit de Staut sikj,
un wan de ojjerajchte omkomen, sent de Menschen froo.
11Derch de Opprechtje äa Säajen kjricht eene Staut Iea,
oba derch de ojjerajchte äa Mul kjemt eene Staut äa vedoawen. #Spr 28,12
12Wäa sienen näakjsten dol rant, es een Noa,
een vestendja Maun weet wan daut Tiet es stell to sennen. #Psa 15,3
13Een Pludasak kaun nich een Jeheemnis stell hoolen,
oba wäa em Hoat tru es, woat daut fa sikj hoolen.
14Wua nich Rot es, jeit een Volkj unja,
oba wua väl Rotjäwa sent, jeit daut goot too.
15Wäa fa eenen framden bircht, woat Schoden haben,
oba wäa sikj heeden deit fa eenen aundren to birjen, es secha. #Spr 6,1-2
16Een jenstjet Frumensch woat jeieet,
oba ruchloose Menschen mieren bloos äa Goot.
17Metleet haben es uk goot fa eenem selfst,
oba wäa sikj nich erboarmt, brinjt sikj selfst em Trubbel.
18Eenen ojjerajchten siene Oabeit woat schlajcht beloont;
wäa oba daut jerajchte seit, woat eenen secharen Loon haben.
19Soo aus jerajcht sennen toom Läwen fieet,
soo sieekjt dee sien Doot, dee daut beese nojeit. #Spr 19,23
20Däm Harn es een vekjieedet Hoat jäajenaun,
oba hee freit sikj aun dee, dee dän rajchten Wajch gonen.
21Lot die daut jesajcht sennen: de gottloose woaren nich onen jestroft wajchkomen,
oba de jerajchte woaren frie gonen.
22Eene schmocke Fru, dee nich vestendich es,
es soo aus een Schwien met eenen goldnen Rinkj en de Näs. #Spr 31,30
23Waut de jerajchte sikj wenschen, deent an toom gooden,
oba de ojjerajchte äare Hopninj brinjt an Strof.
24Eena jeft rikjlich un kjricht emma mea;
een aundra jiezt, wua hee jäwen sull, un woat doch emma oama. #(24 un 25) Mat 25,29; 2Kor 9,6
25Eene mildjäwaje Seel woat rikj woaren,
un wäa aundre to drinkjen jeft, woat selfst to drinkjen kjrieen.
26Wäa Jeträajd trigjhelt, wan de Lied daut fält, däm flieekjen de Menschen,
oba Säajen kjemt äwa däm, dee daut vekjaft.
27Wäa no daut goode sieekjt, finjt Gonst bie de Menschen.
Wäa aundre vesieekjt em Trubbel to brinjen, brinjt sikj selfst un Trubbel.
28Wäa sikj opp sien Rikjtum velat, woat faulen aus een drieejet Blaut,
oba de jerajchte woaren jalsta stonen aus eene jreene Plaunt. #Psa 52,9-10
29Wäa siene Famielje Trubbel moakt, woat Wint oawen;
een Noa woat de Weise äa Deena sennen.
30De jerajchte sent soo aus läwenbrinjende Beem;
wäa aundre halpen, dän rajchten Wajch to gonen, sent weis. #Spr 3,18
31Wan de jerajchte hia oppe Ieed äaren Loon kjrieen,
wooväl sechra dan de ojjerajchte un Sinda. #1Pet 4,17-18
Currently Selected:
Spricha 11: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
