Spricha 10
10
Erfolch kjemt von Gott
1Dit sent Salomo siene Sprechwieed.
Aun eenen weisen Sän haft een Voda siene Freid,
oba een schoselja Sän moakt siene Mutta truarich. #Spr 15,20
2Derch ojjerajchtet Goot woat een Mensch nich verwoats komen,
oba jerajcht sennen rat vom Doot.
3De Har lat de jerajchte nich hungrich gonen
oba waut de gottloose velangen, woat hee tosied schmieten. #Psa 37,19.25
4Fule Henj moaken eenem oam,
oba flietje Henj moaken eenem rikj. #Spr 6,6
5Wäa em Somma de Arnt nenn brinjt, es een weisa Sän;
wäa oba em Eifst ful es un schlapt, woat beschämt.
6De jerajchte woaren met Säajnungen jekjreent,
oba de gottloose bedakjen äare Väahaben met Schmeichelwieed.
7Eena kjricht emma eenen Säajen, wan eena aun de jerajchte denkjt,
oba de gottloose äa Nomen woat veschwinjen. #Hiob 18,17; Psa 9,6
8Wäa von Hoaten weis es, woat sikj belieren loten,
oba een blaubamauzja Noa brinjt sikj en de Grunt.
9Wäa sikj nich veschulcht haft, woat secha gonen,
oba wäa kromme Wäaj jeit, woat utjefungen woaren.
10Wäa met schlajchte Aufsecht met de Uagen plinkjt, recht Trubbel aun,
un een blaubamauzja Noa brinjt sikj en de Grunt. #Spr 6,12-13
11Däm jerajchten sien Mul es eene Läwenskjwal,
oba de gottloose bedakjen äa Vebräakjen met Schmeichelwieed.
12Jäajenaun sennen brinjt strieden,
oba Leew bedakjt de Sind. #1Pet 4,8
13Opp de vestendje äare Leppen woat Weisheit jefungen,
oba de Stock es fa däm sienen Rigjen, dee sienen Vestaunt nich brukt.
14Weise Menschen vemieren de Lia,
oba Noaren brinjen sikj derch äa Jeblauba schia en de Grunt.
15De rikje äa Goot es äare sechre Staut,
oba Oamoot es de oame äa vedoawen. #Spr 18,11
16De jerajchte brucken äa Loon toom Läwen,
oba de gottloose brucken äare Ennom toom sindjen.
17Wäa sikj belieren lat, wiest aundre dän Wajch toom Läwen.
Wäa de Belierunk nich acht, veleit aundre.
18Wäa sienen Oaja toodakjt, haft Läajes opp de Leppen;
wäa doa pludat, es schoslich.
19Wua väl jerät woat, jeit daut onen Sind nich auf,
wäa oba weet wanea stell to sennen, es kluak.
20De Wieed dee eenen jerajchten siene Tung räden, sent soo aus ajchtet Selwa,
oba eenen gottloosen siene Jedanken sent weinich wieet.
21Derch eenen jerajchten siene Wieed woaren väle jeholpen,
oba Noaren woaren derch äare Dommheit to dood komen.
22Gott sien Säajen moakt eenem rikj,
eenem siene Mieej moakt daut nich mea. #Psa 127,2
23Een Noa haft sien Vejnieejen aun jäajenaun sennen,
oba een vestendja Maun haft siene Freid aun Weisheit.
24Waut de gottloose ferchten, woat äwa an komen.
Waut de jerajchte sikj wenschen, woaren see kjrieen. #Psa 37,4; Spr 1,27
25Wan een Storm wua äwafäacht, sent de gottloose wajch;
de jerajchte oba stonen eewich secha. #Spr 12,7
26Soo aus Ädikj aun de Tänen,
un soo aus Ruak aun de Uagen,
es een Schladonz fa dee, dee am schekjen.
27Däm Harn ferchten velenjat daut Läwen,
oba de gottloose äare Joaren woaren weinich sennen.
28Waut de jerajchte en Utsecht haben, brinjt an Freid
oba de gottloose äa Hopen es vejäfs. #Hiob 8,13; Psa 9,19
29Däm Harn sien Wajch es een Schutz fa de jerajchte,
oba fa dee waut orrajcht doonen, es daut äa vedoawen. #Spr 3,26
30De jerajchte sellen en Sechaheit läwen,
oba de gottloose kjennen nich em Launt bliewen. #Spr 2,22
31De jerajchte äa Mul brinjt Weisheit verendach,
oba de vekjieede äare Tung woat steljemoakt woaren. #Psa 37,30
32De jerajchte weeten to sajen waut to de Sach jehieet,
oba de gottloose äa Mul, bloos waut vekjieet es.
Currently Selected:
Spricha 10: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
