Jeremia 44
44
Gott woarnt wada derch däm Profeet
1Un Jeremia kjrieech eene Norecht fa de Menschen von Juda en Ägipten, dee waut en Migdol, Tachpanhes un Memfis wonden un uk fa dee en de Jäajent von Patros: #Jer 43,7 2Dit es waut de Har, dee aules rejieet, un Israel äa Gott es, sajcht: Jie haben jeseenen waut von Schoden ekj äwa Jerusalem un aul de Städa en Juda hab komen loten. Dee sent vondoagschen Dach gaunz vedorwen un kjeena wont doa nu. 3Un daut es wäajen daut beese waut see deeden un doamet mien Oaja reizten. See muaken Opfa toom aundre Jetta aunbäden, soone aus see un äare Elren nich ea jekjant hauden. 4Un ekj schekjt emma wada Profeeten, soone waut mie deenden, daut see an säden, daut see nich soone oppscheiselje Dinja doonen sullen, dee mie soo jäajenaun sent. #Jer 25,4 5Oba dee horchten doa nich no un pausten nich opp, daut see met äare beese Opfa fa aundre Jetta opphieeden. 6Doawäajen rand mien Oaja un miene Veläajenheit äwa un brend de Städa en Juda un de Gaussen en Jerusalem dol. Un vondoag ligjen dise Städa vedorwen un ladich.
7Un doawäajen sajcht de Har, dee aules rejieet, un Israel äa Gott es: Wuarom brinj jie disen grooten Schoden äwa junt, daut Mana un Frues, un Kjinja un Bäbes ut Juda utjerot woaren, bat kjeena äwablift? #Jer 42,22 8Wuarom reiz jie mien Oaja, nu daut jie no Ägipten jetrocken sent un doa wonen, doamet daut jie daut aunbäden, waut jie selfst jemoakt haben, un Opfa moaken fa aundre Jetta? Doa woa jie utjerot un vespott woaren un enne gaunze Welt een Biespel sennen, fa woo schlajcht junt daut jinkj. 9Hab jie aul vejäten waut vonne Sinden june Elren, un waut vonne Sinden de Kjennichs von Juda un äare Frues deeden, un dan uk noch june Sinden un de Sinden von june Frues, dee jie aulawäajen en Juda un oppe Gaussen en Jerusalem uteewden? #Jer 7,17-18 10Bat oppem vondoagschen Dach noch, haben dee sikj nich jedeemooticht un wiesen kjeene Ieaforcht, un bliewen em Onjehuarsom jäajen miene Jesazen un Ordnungen, woone ekj junt un june Vodasch jejäft hab.
11De Har, dee aules rejieet, un Israel äa Gott es, sajcht, ekj woa mie gaunz secha jäajen junt saten un Schoden opp junt brinjen un een Enj moaken von Juda. #Amos 9,4 12Dee waut noch en Juda äwajebläwen wieren, un nu no Ägipten trakjen, daut see doa wonen wellen, woaren aula doa äa Enj finjen. Dee woaren sikj doa en Ägipten enne Grunt ranen, un woaren doa von daut Schwieet un von Hunga stoawen, beides de aunjeseene un de jeweenelje Menschen. De Lied woat daut schudren wäajen dän Fluch, dee junt trafen woat, un see woaren junt vespotten un veachten. #Jer 42,14-17 13Dee waut no Ägipten trakjen, woa ekj krakjt soo met Kjrich un Hunga un Krankheiten ploagen, aus ekj dee deed, waut en Jerusalem wieren. 14Von dee waut en Juda äwajebläwen wieren un hia no Ägipten jetrocken sent, daut see hia wonen, woat kjeena wajchkomen ooda trigj no Juda komen, wua jie wonen muchten. Dee woaren nich trigj gonen, buta jrod han un wada eena.
15Dan säden aul de Mana, dee goot wisten daut äare Frues fa aundre Jetta Opfa brochten, un aul de Frues waut doa wieren, un doa wieren väle, un daut gaunze Volkj daut en Ägipten un en Patros wonden, #Jes 11,11 16daut see wudden nich daut doonen, waut Jeremia säd, daut de Har von an velangd. 17Wie wellen wieda de Himmels Kjennijin aunbäden un Drinkjopfa fa ar moaken, säden see, soo aus wie ons väajenomen haben, un soo aus nich bloos wie, oba onse Vodasch, onse Kjennichs un Volkjsleida en de Städa en Juda un oppe Gaussen en Jerusalem deeden. Aus wie daut deeden, haud wie goot to äten, ons jinkj daut scheen, un ons wort nuscht schlajchtet. #Jer 7,17-18; Hos 2,7 18Oba von don aus wie opphieeden de Himmels Kjennijin Opfa un Drinkjopfa to moaken, sent wie aun aules kort jewast, un sent vom Schwieet un Hunga jestorwen. 19Un de Frues säden: Aus wie de Himmels Kjennijin aunbäden deeden un Drinkjopfa brochten, un uk de Brootkjes muaken met äa Jeschekj, wisten onse Mana doa goot om. #4Mo 30,11-13
20Un dan säd Jeremia to de Mana un Frues un aul daut Volkj waut de Auntwuat jejäft hauden: 21Un jleew jie daut de Har nich goot om wist, daut jie un june Vodasch un de Kjennichs un Volkjsleida un daut gaunze Volkj em Launt de Opfa muaken en de Städa en Juda un opp de Gaussen en Jerusalem? Jleew jie, am wia daut krakjt eendoont? 22Aus de Har junen Onjehuarsom un de oppscheiselje Dinja, dee jie deeden, nich mea lieden kunn, wort jun Launt soo vedorwen aus daut vondoag es, un doa kjeena mea wont, soo daut Lied sikj tieren äwa dän Fluch, dee opp junt jekomen es. 23Jie horchten nich no waut de Har säd, un muaken Opfa fa aundre Jetta, waut doch orrajcht es ver däm Harn. Jie deeden nich waut siene Jesazen un Ordnungen un Woarnungen velangden, un doawäajen es dis Schoden, dän jie vondoag haben, opp junt jekomen.
24Un aus hee to daut gaunze Volkj räd, räd Jeremia uk to de Frues un säd: Jie, dee jie von Juda jekomen sent un nu en Ägipten wonen, horcht no waut de Har sajcht: 25Dit es waut de Har, dee aules rejieet, un Israel äa Gott es, sajcht: Jie un june Frues haben met june Henj jedonen, waut jie met june Wieed säden. Jie säden: “Wie wellen ons Vespräakjen to de Himmels Kjennijin hoolen, un Ruakopfa un Drinkjopfa fa ar moaken.” Na jo. Wan daut soo steit, dan hoolt jun Vespräakjen un moakt de Opfa. 26Oba horcht uk no waut de Har vesproaken haft. Ekj vespräakj opp mienen grooten Nomen, daut von aul de Menschen von Juda, dee en Ägipten wonen, woat kjeena mea sajen: “Soo secha aus Gott de Har läft”, wan hee een Vespräakjen moakt. 27Ekj woa äwa an oppaussen, daut see eenen Schoden kjrieen un nich waut goodet, soo daut de Menschen von Juda, dee en Ägipten sent, vom Schwieet un von Hunga woaren, bat daut gaunz ut met an es.omkomen #Amos 9,4 28Dee waut nich en Ägipten omkomen un trigj no Juda komen woaren, woaren gaunz weinje sennen. Un dee, dee äwabliewen von de Menschen von Juda, waut no Ägipten jinjen, woat daut gaunz kloa sennen wäm siene Wieed de Woarheit wieren, miene ooda äare.
29Un ekj jäw junt dit Tieekjen, sajcht de Har, daut ekj junt en dit Launt woa ombrinjen. Wan jie daut seenen, dan lot junt daut kloa sennen, daut de Schoden, dän ekj junt jedreift hab, komen woat. 30De Har sajcht: Horcht emol, ekj woa dän ägiptischen Kjennich, Hofra, en sienen Fient siene Henj jäwen, krakjt soo aus ekj dän judschen Kjennich Zedekia en sienen Fient siene Macht jeef. De ägiptischa Kjennich woat sien Läwen velieren, krakjt soo aus Zedekia sien Läwen ver däm babelonischen Kjennich Nebukadnezar velua. #Hes 29,19
Currently Selected:
Jeremia 44: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
