Jesaja 45
45
De Har brukt dän persischen Kjennich
1Dit es waut de Har to Kierus sajcht,
däm hee fa sikj enjesaulft haft
un groote Krauft jejäft haft,
daut hee Velkja rom sikj ennemt
un Kjennichs de Kjleeda vom Liew ritt;
daut hee Däaren opmoaken kaun,
un kjeene Puaten too bliewen: #Jes 41,2
2Ekj woa ver die gonen un de Boaj utjlikjen,
ekj woa bronsne Däaren en Stekja schlonen
un Iesastangen tweibräakjen.
3Ekj woa die vestoakne Sachen
un oppjespikjaden Väarot jäwen,
soo daut du weeten woascht, daut ekj de Har sie,
un daut de Gott en Israel die
bie dien Nomen jeroopt haft.
4Om mienen Kjnajcht Jakob sient haulwen,
un om Israel, mienen jewälden sient haulwen,
roop ekj die bie dienen Nomen
un jäw die eenen grooten Nomen,
uk wan du mie nich kjansd.
5Ekj sie de Har, un doa es kjeen aundra.
Ekj woa die de Macht jäwen, waut die fälen woat,
wan du uk nich weetst wäa ekj sie. #(5 un 6) 2Mo 20,3
6Ekj doo dit soo daut Menschen von wiet em Oosten
bat em Wasten weeten woaren, daut doa sest kjeena es.
Ekj sie de Har, un kjeen aundra.
7Ekj moak daut Licht un moak diesta,
ekj brinj Jlekj un Schoden;
ekj de Har doo aul dit. #Amos 3,6
8Soo aus de Räajen aules naut moakt,
soo saul aulawäajen daut rajchte jedonen woaren;
soo aus de Ieed aulawäajen Jreens väabrinjt,
soo saul fa aulem Heil oppkomen,
un aulawäajen daut rechtje jedonen woaren.
Dit lot ekj, de Har, soo komen.
9Woo saul daut met däm gonen,
dee sikj jäajen däm stalt wäa am jemoakt haft,
wan hee selfst een Ieed Schoawel es?
Frajcht de Leem dän Toppstrikja, waut hee moakt,
ooda sajcht dee däm Toppstrikja, siene Henj vestonen nuscht? #Hiob 40,2; Jes 29,16; Jer 18,6; Reema 9,20
10Woo saul daut met däm,
dee sienen Voda frajcht, waut vonne Kjinja hee haft,
ooda de Mutta frajcht, woo see am besorcht haft?
11Dit es waut de Har, de Heilja en Israel,
un dee Israel jemoakt haft sajcht:
Froacht mie äwa waut komen saul,
oba lot mie miene Kjinja,
un daut waut miene Henj moaken.
12Ekj sie deejanja, wäa de Ieed jemoakt haft,
un de Menschen, dee doabowen läwen;
ekj sie dee, wäa dän Himmel utjespreet haft,
un hab aul de Stierns äare Städen jejäft. #Jes 44,24
13Ekj woa Kierus en mienen rajchten Plon äwadäl brinjen,
un woa am jieda Wajch jlei moaken;
hee woat miene Staut wada oppbuen,
un dee frieloten, waut hee von miene faust haft,
un daut onen am waut doafäa to jäwen,
sajcht de Har, dee aules rejieet. #Jes 41,2
Gott äwa de gaunze Ieed
14Dit es waut de Har sajcht:
Daut, waut de Ägipta un de Lied en Kusch ieejnen,
woat junt woaren;
un de huach jewosne Menschen von Seba
woaren komen un diene sennen;
dee woaren die hinjaraun komen
un en äare Kjäden sikj ver die kjneeen un sajen:
Daut es kloa, daut jie eenen Gott haben,
sest es doa kjeen Gott.
15Du best een vestoakna Gott,
dee du Israel ratst un äa Gott best. #Jes 43,11; Reema 11,33
16Un dee, dee de Jetta moaken,
woaren sikj jrämen un schämen
un en Schaund to nuscht woaren. #Jes 44,9-11
17Oba Israel woat vom Harn jerat woaren
un opp emma secha stonen;
dee woaren nienich wada en Schaund to nuscht woaren
ooda vespott un beschämt sennen.
18De Har, dee dän Himmel jemoakt haft,
un auleen Gott es;
dee de Ieed häajestalt un jemoakt haft
un ar dän Grunt jejäft haft;
dee de Ieed nich ladich jeloten haft,
oba soo daut dee beläft es;
dee sajcht: Ekj sie de Har; doa es kjeen aundra.
19Ekj hab nich em Jeheemen jerät,
ooda en eene diestre Akj.
Ekj säd Jakob siene Nokomen nich vejäfs,
daut see mie sieekjen sullen.
Ekj sie de Har dee de Woarheit rät
un saj soont daut jie junt doaropp veloten kjennen. #Jes 48,16
20Komt aula toop un vesaumelt junt,
dee jie von mank de Velkja äwajebläwen sent.
Soone waut heltane Jetta romdroagen,
ooda een Gott aunbäden, waut nich raden kaun,
haben kjeen Vestaunt.
21Berät junt daut, waut jie väabrinjen kjennen,
un lajcht daut väa.
Wäa säd lang trigj, daut dit woaren wudd?
Wäa haft dit bekaunt jejäft?
Hab ekj de Har daut nich?
Doa es kjeen Gott buta ekj.
Ekj sie jerajcht un eena, dee raden deit;
doa es nich noch eena, soo aus ekj.
22Komt von aulawäajen oppe Welt no mie,
dan woa jie jerat woaren;
ekj sie Gott, un doa es kjeen aundra.
23Ekj sie nich Har, wan dit nich aula soo es,
waut ekj saj stalt Sachen trajcht,
un mien Wuat blift stonen:
Aule Menschen sellen sikj ver mie kjneeen,
un jieda eena woat bekjanen wäa ekj sie. #(23 un 24) Reema 14,11; Flp 2,10-11
24Dee woaren bekjanen, daut bloos em Harn
jeft daut rechtjet Läwen un Krauft;
aul dee, dee sikj aun am steeten,
woaren komen un sikj schämen. #Jer 23,6
25Aule Israeliten woaren en däm Harn
dän rechtjen Wajch finjen un am lowen. #Jer 9,22-23
Currently Selected:
Jesaja 45: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
