Jesaja 46
46
Wäa es met Gott to vejlikjen?
1De Aufgott Bel kjneet sikj,
un de Aufgott Nebo schmitt sikj han;
daut waut fa an oppjestalt wia
un stolt romjedroacht wort,
woat von meede Äsels un Ossen
en Klompes wajchjedroacht. #Jer 50,2
2De Jettabilda stukren un nekjkoppen;
dee kjennen sikj selfst nich halpen
un woaren enne Jefangenschoft jefieet.
3Horcht emol no mie, dee jie von Jakob aufstaumen,
un aul jie, dee von de Israeliten äwajebläwen sent:
Ekj hab junt von kjlien aun jedroacht;
ekj hab junt noch emma besorcht.
4Un bat jie oolt sent, sie ekj deeselwja,
un woa junt droagen bat jie greiwe Hoa kjrieen.
Ekj muak junt un woa junt hoolen,
ekj woa junt droagen un raden. #(5-8) Jes 44,9-20
5Met wäm well jie mie vejlikjen?
Wäa es soo aus ekj sie?
Aun wäm denkj jie,
daut ekj soo saul sennen aus dee?
6Menschen schedden Golt utem Pinjel,
un wäajen daut Selwa opp eene Wichtschol;
see nämen sikj een Goltschmett aun,
daut dee an een Gott doavon moakt,
ver däm see sikj kjneeen un aunbäden.
7See häwen sikj dän oppem Schulla un droagen dän,
see stalen dän wua han un dee blift doa;
dee kaun sikj nich bewäajen.
Wan däm wäa aunroopt,
jeft dee kjeene Auntwuat,
un kaun kjeenem en sien Trubbel halpen. #1Kjen 18,26
8Jie, dee jie orrajcht doonen, besent junt;
denkjt dit äwa un vejät daut nich;
9waut deed ekj lang trigj, don emol?
Ekj sie Gott, un doa es kjeen aundra.
Ekj sie Gott un sie met sest kjeenem to vejlikjen. #Jes 44,6
10Ekj saj von väaren nenn, waut passieren saul,
un hab von jee häa jesajcht, waut komen woat;
un saj noch wada:
Waut ekj jeplont hab, woa ekj foadich moaken,
un daut waut ekj mie väajenomen hab, woa ekj doonen.
11Von en een framdet Launt em Oosten,
roop ekj eenen Odla häa;
ekj brinj eenen Maun dee mien Plon utfieet.
Soo aus ekj daut jesajcht hab, woat daut woaren;
waut ekj jeplont hab, woa ekj doonen. #Jes 41,2
12Horcht emol häa, jie heltablesje Menschen,
dee jie wiet auf von jerajcht sent:
13Ekj kom jerajcht moaken, daut es dicht bie.
Ekj woa raden un nich siemen;
ekj woa Zion Heil jäwen,
un Israel harlich moaken.
Currently Selected:
Jesaja 46: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
