Jesaja 44
44
De woarhauftja Gott un de jemoakte Jetta
1Oba nu horch, Jakob, mien Kjnajcht,
un Israel, däm ekj mie jewält hab.
2Dit es waut de Har sajcht,
dee wäa, die jemoakt haft,
wäa die dien Jeschekj jejäft haft,
un die von gaunz kjlien biejestonen haft:
Enjst junt nich, Israel, mien Kjnajcht,
ekj hab mie die, mien Jerajchta, jewält. #5Mo 32,15
3Soo aus ekj daut opp drieejet Launt räajnen lot,
un lot Wota ranen, wua daut stoffich wia,
soo woa ekj june Nokomen mienen Jeist jäwen
un june Kjinja säajnen, #Jes 32,15; Joel 3,1
4soo daut dee väakomen aus daut Graus nom Räajen,
ooda aus de Wieden biem Riefa.
5Von hia woat eena sajen: “Ekj jehia däm Harn”,
un von doa eena: “Ekj staum von Jakob auf”;
noch eena schrift sikj oppe Haunt: “Fa däm Harn”,
un soo woaren see Israeliten.
6De Har, dee en Israel Kjennich es,
un dee de Israeliten rat,
de Har, dee aules rejieet, sajcht:
Ekj sie dee wäa noch emma jewast es,
un opp emma sennen woat;
buta mie es doa kjeen Gott. #Jes 41,4; 43,11
7Wäa es doa met mie to vejlikjen?
Lot däm sikj vemulen un sajen
waut hee aules jedonen haft.
Wäa haft verem Tiet jesajcht, waut doa kjemt,
lot däm sajen, waut passieren woat. #5Mo 18,22; Jes 41,22
8Enjst junt nich, jie brucken nich angst haben.
Jie weeten daut ekj noch emma
em verut jesajcht hab, waut doa komen saul;
jie haben daut selfst jeseenen.
Es irjentwua noch een Gott?
Es doa wäa opp wäm jie junt werkjlich veloten kjennen;
ekj weet von kjeenem. #1Sam 2,2
9Daut es je nuscht met dee, dee Jetta moaken;
daut wuatoo see sikj freien, helt nuscht en.
Dee, dee von an Zeichnis jäwen wellen,
haben nuscht jeseenen; dee weeten nuscht
un motten sikj selfst schämen. #(9-11) Jes 45,16; Psa 115,4-8; Jer 10,3-16
10Waut sent daut fa Menschen,
dee sikj eenen Aufgott moaken,
ooda sikj selfst eene Form jeeten,
waut doch kjeenem halpen kaun?
11Aul dee, dee doamet schaufen,
woaren sikj schämen motten;
de Kjensla sent mau Menschen.
Lot dee aula toopkomen
un em Vejlikj met mie wiesen,
waut see doonen kjennen;
dee woaren sikj aula enjsten
un woaren aula beschämt woaren. #Jes 42,17
12Een Schmett nemt een Stekj Iesa,
un wan hee daut oppjehett haft,
brukt hee aul siene Krauft toom daut trajchtkloppen.
Wan hee nich tweschenenn at, woat hee hungrich,
un wan hee nich drinkjt, vejeit am de Krauft. #(12-20) Jes 40,18-20
13De Deschra brukt eene Mot un tieekjent sikj daut aun,
hee schauft met sien Jereetschoft doaraun,
bat et daut Jeschekj von een Mensch haft,
soo schmock aus een Mensch dan loten kaun,
un stalt daut en een besondret Hus opp.
14Hee nemt veleicht Zeedaholt,
ooda von Ieekjen ooda Fichten,
waut em Woolt jewossen es.
Hee mach daut selfst jeplaunt haben,
un de Räajen haft daut jewessat,
15soo daut de Mensch daut to Brenholt brukt.
Waut doavon brukt hee toom sikj woam hoolen,
un waut toom Broot baken;
oba dan nemt hee waut von daut
un moakt een Aufgott doavon un bät daut aun.
Hee schnizt doa eene Form rut,
un kjneet sikj ver daut.
16Daut eene Poat woat Brenholt,
un hee brot sikj waut Fleesch äwa daut Fia un at sikj saut;
ooda hee woamt sikj met daut un freit sikj to daut Fia.
17Een aundret Poat brukt hee toom sikj eenen Aufgott moaken,
daut sien Gott sennen saul;
hee kjneet sikj ver daut un bät daut aun,
un sajcht: Rad mie, du best mien Gott.
18Soone Menschen haben kjeen Vestaunt,
un vestonen nich waut see doonen;
dän sent de Uagen veschmäat, daut see nich seenen,
un äa Denkjen vewescht, daut see nich vestonen.
19Dee kjennen nich soo väl toopbrinjen,
daut see enseenen un sajen kjennen:
Met een Poat hab ekj Broot jebakt un Fleesch jebrot,
soo daut ekj to äten haud;
kaun ekj dan noch met daut äwaje waut oppscheiseljet moaken,
un mie ver daut kjneeen un een Stekj Holt aunbäden?
20Dee bemieecht sikj met Ausch;
daut es waut enjebildet;
dee es em Kopp vedreit;
dee kaun sikj selfst nich raden
un kaun nich toostonen daut daut,
waut hee enne rajchte Haunt haft,
bloos waut oppjemoaktet es.
Gott kaun raden
21Mien Kjnajcht, Israel,
hool dit em Denkj, Jakob:
Ekj hab junt jemoakt, daut jie sullen mien Kjnajcht sennen;
ekj woa nich von junt vejäten. #Jes 41,8
22Daut waut jie haben orrajcht jedonen,
lot ekj veschwinjen aus eene Wolkj;
june Sinden näm ekj wajch aus dän Deiw.
Komt wada no mie,
wiels ekj sie dee wäa junt rat. #Jes 43,25
23Lot dän Himmel lud sinjen,
wiels de Har haft daut jedonen!
Lot dän Ieedboddem lud roopen;
lot de Boaj un jieda Boom em Woolt sinjen,
wiels de Har haft Jakob siene Nokomen jerat,
un wiest en Israel, woo harlich hee es. #Jes 49,13; 55,12; Psa 96,11-13
24De Har, dee junt frie sprakjt,
dee junt von kjlien toschekj jeholpen haft, sajcht:
Ekj sie de Har, ekj hab aules jemoakt;
ekj hab auleen dän gaunzen Himmel utjespreet,
un selfst de Ieed jemoakt.
Wäa wia doa noch met mie? #Jes 45,12
25Ekj moak daut, daut däm Woasaja sien Tieekjen nich rajcht es;
un daut daut, waut von de Stierns jediet woat, nich soo utfelt.
Ekj moak daut, daut de weise Mana sikj vestäakjen,
un daut äare Weisheit noanich hanrieekjt. #Jes 29,14
26Ekj moak daut Wuat von mienen Profeet utkomen,
un de Norecht von dee, woone ekj schekj, rajcht sennen.
Ekj saj to Jerusalem, daut dee wada bewont saul sennen,
un to de Städa en Juda, daut dee wada oppjebut sellen woaren.
Ekj recht daut opp waut enne Grunt jebrocht es.
27Wan ekj saj, dan drieecht daut Mäa ut;
un de Riefasch hieren opp met ranen. #Jos 4,23
28Ekj saj äwa Kierus, daut hee mien Hoad es
un doonen saul, waut ekj haben well;
hee woat sajen: Lot Jerusalem wada oppjebut woaren,
un lot daut Fundament vom Tempel jelajcht woaren. #2Chr 36,23; Esra 1,1-4
Currently Selected:
Jesaja 44: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
