Jesaja 43
43
Gott rat sien Volkj
1Oba doch, nu sajcht de Har,
dee wäa Jakob siene Nokomen jemoakt haft,
un dee wäa Israel daut Jeschekj jejäft haft:
Enjst junt nich, wiels ekj woa junt raden.
Ekj roop junt biem Nomen;
jie jehieren mie.
2Uk wan jie woaren motten derch deepet Wota gonen,
woa ekj junt biestonen.
Wan de Riefa junt metrieten well,
woat dee junt nich unjakjrieen.
Un wan jie em Fia nenn komen,
woa jie junt nich brennen. #2Mo 14,21; Psa 66,12; Dan 3,25-27
3Daut es wiels ekj de Har, jun Gott sie;
ekj sie dee wäa en Israel heilich es, un ekj halp junt.
Ekj hab Ägipten hanjejäft, om junt loostokjeepen,
un dan uk noch Kusch un Seba doatoo. #Jes 41,14
4Wiels jie mie soo väl wieet sent,
wiels ekj junt soo väl räakjen un junt soo goot sie,
jäw ekj Menschen opp fa junt,
un uk Velkja, soo daut jie läwen kjennen.
5Enjst junt nich. Ekj sie bie junt.
Ekj woa june Kjinja vom Oosten trigjbrinjen,
un junt vom Wasten toopsaumlen. #Jes 11,11-16; Jer 30,10
6Ekj woa von däm Nuaden velangen,
daut dee junt frie loten,
un vom Sieden, daut dee junt nich faust hoolen.
Dee sellen june Säns, dee wiet auf sent,
un de Dajchta, dee en de wietste Lenda sent, trigjbrinjen.
7Aul dee, dee sikj aus de Miene hoolen,
hab ekj jemoakt un jewäsen, woo harlich ekj sie;
ekj hab an äa Jeschekj jejäft un häajestalt. #Jer 14,9
8Daut Volkj, woont nich seenen kaun,
wan see doch Uagen haben,
un waut nich hieren kaun,
wan see doch Uaren haben,
saul äwadäl komen.
9Aule Velkja sellen toopkomen
un sikj hia vesaumlen.
Wäa von an säd, waut nu passieet es?
Wäa haft Sachen em verut jesajcht?
Lot an Zeijen brinjen un dee oppstalen,
soo daut wie von an hieren, daut et soo es.
(Daut kjennen see goanich.) #Jes 41,22.26
10Oba jie, Israeliten, sent mien Bewies, sajcht de Har,
jie sent mien Kjnajcht, dän ekj mie jewält hab.
Nu woa jie daut weeten kjennen,
un daut jleewen un vestonen kjennen,
daut ekj de eensja Gott sie.
Doa wia kjeena ea ekj wia,
un doa woat kjeen Gott no mie oppkomen. #Jes 44,8
11Ekj, jo ekj meen daut, ekj sie de Har,
buta mie es kjeena, dee raden kaun. #5Mo 32,39; Jes 45,21
12Ekj wia dee, wäa daut em verut säd,
un don rad ekj junt.
Ekj wia dee, wäa junt daut weeten leet,
un daut wia nich een framda Aufgott mank junt.
Jie sent de Bewies, sajcht de Har,
daut ekj Gott sie.
13Vondoag, un opp emma, sie ekj Gott.
Doa es kjeena, dee daut vedoawen kaun,
waut ekj aun Haunt hab.
Ekj sie hia aun de Oabeit;
wäa woat daut opphoolen?
14Dit es waut de Har sajcht,
dee wäa junt frie moakt,
dee wäa en Israel heilich es:
Om junt haulwen woa ekj wäm no Babel schekjen
un june Jefenkjnis Däaren opbräakjen,
un de Chaldäa äa scheen gonen woat to een jaumarieren woaren.
15Ekj sie de Har, jun Heilja;
ekj hab Israel jemoakt un sie doa Kjennich.
16Dit es waut de Har sajcht,
dee em Mäa eenen Wajch muak,
un eenen Stich derch een stoakjet Wota, #2Mo 14,22; Jos 3,16
17dee wäa Pieed un Woages,
de Armee un stoakje Soldoten komen leet,
un läd dee han, soo daut see nich wada oppkunnen.
Dee velaschen aus wan een Licht utjepust woat. #2Mo 14,23-28
18Oba denkjt nich bloos aun daut, waut jewast es;
un rät nich bloos von woo daut wia.
19Wiels nu woa ekj waut nieet doonen;
daut kjemt aul äwadäl.
Es junt daut nich kloa?
Ekj moak eenen Wajch derch de Wiltnis,
un Riefasch en daut drieeje Ollaunt. #Jes 41,18
20Dan woaren de wille Tieren mie ieren,
soone aus de Kajote un de Straus,
wiels ekj woa enne Wiltnis Wota väabrinjen,
un Riefasch en daut vewoaloosde Launt.
Un mien Volkj woat to drinkjen haben,
dee, woone ekj mie jewält hab,
21un dee ekj mie reed jemoakt hab,
daut see mie ver aundre lowen woaren. #1Pet 2,9
Gott riemt de Sind opp
22Wan ekj uk sie goot to junt jewast,
hab jie mie nich aunjebät,
jie, dee jie von Jakob aufstaumen.
Daut es aus wan jie Israeliten meed von mie sent.
23Jie haben mie nich Brauntopfa von Schop jebrocht,
ooda aundre Tieren, daut jie mie ieren wudden;
Ekj hab junt daut nich met Speisopfa schwoa jemoakt,
un junt nich meed jemoakt met Ruakopfa. #Jes 1,11-15
24Jie haben nich Jelt utjejäft fa scheenen Weiruak fa mie,
un mie nich daut Fat von june Tieren oppem Opfa jebrocht,
soont aus mie sea jefelt;
oba jie haben mie daut schwoa jemoakt met june Sinden,
un mie meed jemoakt met daut, waut jie orrajcht deeden. #2Kor 5,21
25Un doch sie ekj dee, wäa jun Orrajcht vejeft,
daut et to seenen es, daut mie to vetruen jeit,
un hool mie june Sinden nich mea väa. #Jes 44,22; Jer 31,34
26Sajcht noch emol, woo daut wia,
daut wie met aules bat oppe Grunt gonen;
jeff aules väa, waut du kaust,
daut du dien rajcht kjrichst.
27Jun Staumvoda deed waut orrajcht es,
un june Leidasch haben sikj vesindicht; #1Mo 35,11-12; Jes 41,8
28doawäajen hab ekj de Leidasch em Heilichtum loten toschaund woaren,
un Jakob siene Nokomen loten utstoawen un vespott woaren.
Currently Selected:
Jesaja 43: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
