1. Chronik 29

De Gowen toom Tempelbu un David sien Dankjebäd

1De Kjennich David dreid sikj no de gaunze Vesaumlunk un säd: Gott haft Salomo, disen eenen von miene Säns, jewält, dee noch junk un onerfoaren es. De Oppgow oba es groot, wiels dis groosoatja Bu es nich eene Woninj fa eenen Mensch, dee es fa Gott, däm Harn. #1Chr 22,5 2Doawäajen hab ekj miene gaunze Krauft enjesat, om fa mienen Gott sien Hus sea väl Golt, Selwa, Brons, Iesa un Holt to veschaufen, om de Dinja un daut Jereetschoft häatostalen waut jemoakt woaren motten. Un soo uk de diere Steena, un aundre wieetvolle Steena met veschiedne Kalieren un uk väl Marmorsteena. 3Wiels mie mien Gott sien Hus aum Hoat licht, jäw ekj noch von mien ieejnet Kaptol, waut ekj aun Golt un Selwa hab, to mienen Gott sien Hus, 4buta daut waut ekj fa daut heilje Hus veschauft hab, jäw ekj noch 3.000 Zentna Golt von Ofir un 7.000 Zentna reinet Selwa, toom de Wenj von bennen betrakjen, #2Mo 35,4-9; 1Chr 22,14 5daut aules goldnet woat, waut goldnet sennen saul, un aules selwanet woat, waut selwanet sennen saul. Un aul de Woakjen sellen de Meistasch doonen. Un wäa es nu wellens, däm Harn vondoag eene Gow to brinjen? 6Doa beweesen de Leida von de Volkjsgruppen, de Leida von de Stam en Israel, de väaschte, dee äwa 1.000 un äwa 100 wieren un de Vewaultasch äwa däm Kjennich siene Enrechtungen, wuatoo see wellens wieren. 7Un see jeewen fa däm Tempelbu 5.000 Zentna Golt, 10.000 goldne Jeltstekja un 10.000 Zentna Selwa, 18.000 Zentna Brons un 100.000 Zentna Iesa. 8Un wäa diere Steena bie sikj haud, dee jeef dee toom Kaptol fa dän Tempel, waut von Jehiel, eenen Nokomen von Gerschon, vewault wort. #2Mo 35,27

9Daut gaunze Volkj freid sikj doaräwa daut soo väle reed wieren toom jäwen, un see wieren met äa gaunzet Hoat doabie un jeewen daut friewellich däm Harn. Un uk de Kjennich David wia sea froo doaräwa.

David sien Dankjebäd

10David lowd dän Harn ver de gaunze Vesaumlunk un säd: Jeloft best du, Har, du Gott von onsen Voda Israel, von Eewichkjeit bat Eewichkjeit! 11Die Har, jehieet de Kjennichsiea un Jewault, de Harlichkjeit, de Siech un de hechste Pracht. Wiels aules, waut em Himmel un oppe Ieed es, daut es dient. Die Har jehieet daut Kjennichrikj, wiels du best huach erhowen aus hechsta äwa aules. #Opb 4,11; 5,13 12Grootet Vemieejen un Iea komen von die, du best Kjennich äwa aules. Un en diene Haunt es Macht un Krauft, un en diene Haunt steit daut, däm groot un stoakj to moaken, wäm du west. #2Chr 20,6 13Doawäajen well wie die, onsen Gott, danken un dienen harlichen Nomen groot moaken. 14Waut sie ekj? Waut es mien Volkj, daut wie em staund wieren soo väl friewellich to jäwen? Aules es von die jekomen, uk dise Gowen hab wie ieescht von die jekjräajen un dan die jejäft. 15Ons jeit daut nuscht aundasch aus aul onse Vodasch: Wie wonen bloos aus Jast ooda framde en dit Launt, waut du ons jejäft hast, wiels ons Läwen oppe Ieed es soo aus een Schauten, daut nich blift. #Hiob 14,2; Psa 39,13; Heb 11,13 16Har, ons Gott! Daut gaunze Kaptol, waut wie toopjebrocht haben, om dienen heiljen Nomen een Hus to buen, kjemt ut diene Haunt, un doawäajen jehieet daut aula die! 17Mien Gott, ekj weet, daut du de Menschen em Hoat kjikjst, un du freist die, wan see opprechtich sent. Doawäajen hab ekj dit aula ut een opprechtjet Hoat friewellich jejäft un hab nu met freid jeseenen, woo dien Volkj, waut hia ver die steit, die aules friewellich un met Freid jejäft haft. #Psa 7,10 18Har, du Gott von onse Vodasch Abraham, Isaak un Israel! Hool dien Volkj fa emma en dise Jesennunk, daut daut Sträwen von äa Hoat opp die jerecht blift! 19Halp uk mienen Sän Salomo, daut hee met een onjedeeldet Hoat diene Jebooten, Aunwiesungen un Väaschreften befolcht un aules deit, om dän Tempelbu derchtofieren, dän ekj reedjemoakt hab.

20Un David säd to de gaunze Vesaumlunk: Loft dän Harn, junen Gott! Un de gaunze Vesaumlunk lowd dän Harn, äare Vodasch äaren Gott, un bekjten sikj un follen opp Kjneeen ver däm Harn un ver däm Kjennich 21un brochten däm Harn jeschlachte Opfa. Aum näakjsten zemorjes schlachten see 1.000 junge Bolles, 1.000 Schopsbakj un 1.000 Lama toom Brauntopfa. Un doatoo noch de Drinkjopfa un uk sea väl Schlachtopfa fa daut gaunze Volkj. 22Un see eeten un drunken aun däm Dach ver däm Harn met groote Freid un roopten Salomo toom tweeden mol toom Kjennich ut un saulwden am, daut hee en däm Harn sienen Oppdrach daut Volkj rejieed. Un Zadok saulwden see toom Priesta. #1Chr 23,1

23Dan sad Salomo sikj opp däm Harn sienen Troon aus Kjennich en sien Voda David siene Städ un funk Aunerkjanunk. Un gaunz Israel jehorcht am. #1Kjen 1,34-35.39; 1Chr 28,5 24Aul de väaschte Mana em Volkj, de Kjrichshelden un uk däm Kjennich David siene aundre Säns, unjastalden sikj däm Kjennich Salomo. 25De Har leet Salomo ver de Uagen von gaunz Israel sea stoakj woaren, un jeef am soone groote Kjennichs Pracht, aus noch kjeena ver am en Israel jehaut haud.

De Toopfotunk von David siene Rejierungstiet

26David, Isai sien Sän, wia Kjennich äwa gaunz Israel. 27Un de Tiet waut hee äwa Israel rejieed, wieren 40 Joa. En Hebron rejieed hee säwen Joa un en Jerusalem 33 Joa. #1Kjen 2,11 28Un hee storf aus hee sea oolt jeworden wia, wua hee saut wia vom Läwen, von rikj sennen un groote Iea haben. Un sien Sän Salomo wort Kjennich en siene Städ. #1Mo 25,8; 35,29; 2Chr 24,15; Hiob 42,17 29Daut äwaje von de Jeschicht vom Kjennich David, daut ieeschte uk daut lotre, daut steit en de Berechten von de Profeeten Samuel, Natan un Gad jeschräwen. #1Chr 21,9 30Dee berechten äwa siene Rejierunk un siene stoakje Doten un Siejen, un aules waut hee selfst un Israel un de aundre Kjennichrikjs runtom don beläft haben.

Currently Selected:

1. Chronik 29: PB

Highlight

Compare

Copy