2. Chronik 1
1
Salomo sien Opfa un sien Jebäd om Weisheit
(1Kjen 3,1-15)
1Salomo, David sien Sän, wort stoakj en siene Kjennichs Harschoft, un de Har, sien Gott, wia met am un muak am emma stoakja. #1Kjen 2,12.46 2Eenen Dach roopt Salomo de Veträda von gaunz Israel no Jerusalem toop: De väaschte, dee äwa 1.000 un äwa 100 wieren, de Rechta, de Staumleida un de Leida von de Volkjsgruppen, 3om met de gaunze Vesaumlunk toop no de Opfastäd to gonen, waut en Gibeon wia. Dort wia daut Vesaumlungszelt, waut Moses, däm Harn sien Deena, en de Wiltnis jemoakt haud. #1Chr 16,39 4Bloos Gott siene Bundeskjist haud David von Kirjat Jearim no däm Plauz jebrocht, waut hee fa dee reedjemoakt haud. Wiels fa dee haud hee en Jerusalem een Zelt oppjestalt. #1Chr 13,6; 15,3.28; 16,1 5Bie däm Harn siene Woninj en Gibeon stunt uk de bronsna Aultoa, dän Bezalel, Uri sien Sän un Hur sien Grootsän, jemoakt haud. Un Salomo, un dee waut hee toop jeroopt haud, jinjen däm opptosieekjen. #2Mo 38,1-8 6Un Salomo opfad ver däm Harn 1.000 Brauntopfa opp dän bronsnen Aultoa, waut ver daut Vesaumlungszelt stunt.
7Un en de näakjste Nacht openboad Gott sikj am un säd to am: Bäd om daut, waut ekj die jäwen saul. 8Un Salomo säd to Gott: Du hast met mienen Voda David groote un truhoatje Leew jewäsen, un hast mie en siene Städ toom Kjennich jemoakt. 9Soo lot nu, Har, mien Gott, dien Vespräakjen, waut du mienen Voda David jejäft hast, en Erfellunk gonen! Wiels du hast mie toom Kjennich jemoakt äwa een Volkj, waut soo väl es aus Stoff oppe Ieed. 10Doawäajen jeff mie nu Weisheit un Vestentnis, daut ekj met dien Volkj rajcht omgonen kaun, wiels wäa kaun dit dien grootet Volkj rejieren? 11Dan säd Gott to Salomo: Wiels du dit em Senn hast un nich jebät hast om een grootet Vemieejen, ooda aunseenen, ooda om dän Doot von diene Fiend un om langet Läwen fa die, oba om Weisheit un Vestentnis jebät hast, mien Volkj to rejieren, wuaräwa ekj die toom Kjennich jemoakt hab, 12doawäajen es die Weisheit un Vestentnis jejäft. Un doatoo well ekj die uk een grootet Vemieejen un een grootet aunseenen jäwen, soo aus daut noch kjeen Kjennich ver die jehaut haft un uk kjeena no die haben woat. 13Dan kjeem Salomo von daut Vesaumlungszelt, de Opfastäd en Gibeon, wada trigj no Jerusalem, om von doa ut äwa Israel to rejieren.
Salomo siene Kjrichsmacht un sien grootet Vemieejen
(2Chr 9,25-28; 1Kjen 10,26-29)
14Salomo schauft sikj Kaumf Woages un Rittasch toop, soo daut hee 1.400 Woages un 12.000 Rittasch haud. Eenen Deel doavon haud hee en Jerusalem stonen, un de äwaje wieren en de Städa unjajebrocht, waut hee doatoo utjebut haud. 15Un de Kjennich Salomo brocht daut bat doa, daut et en Jerusalem soo väl Selwa un Golt jeef aus Steena, un soo väl Zeedaholt aus daut opp daut onjlikje Launt Holt von Mulbäabeem jeef. 16Pieed worden Salomo ut Ägipten, von Koe, jebrocht; däm Kjennich siene Haundelslied koften dee en Koe fa äaren Pries opp. 17Uk Woages toom Kjrich worden von Ägipten enjefieet. Een Woagen kost 600 Selwastekja, un een Pieet 150 Selwastekja. Un Salomo siene Hendla vekoften von de Pieed un Kaumf Woages uk wieda aun de Kjennichs von de Hetita un de Aramäa.
Salomo sien Vetrach met Hiram von Tierus
(1Kjen 5,15-32)
18Un Salomo plond däm Harn sienen Nomen een Hus to buen un uk een Hus fa sikj aus Kjennich.
Currently Selected:
2. Chronik 1: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
