1. Chronik 28

David jeft Salomo Aunwiesungen fa däm Tempelbu

1David leet aul de väaschte Mana von Israel no Jerusalem tooproopen: De Staumleida von de Volkjsstam, de Befälshaba äwa de Aufdeelungen, dee däm Kjennich deenden, de väaschte Mana, dee äwa 1.000 un äwa 100 wieren, un de Vewaultasch äwa daut gaunze Hab un Goot, daut Launt un de Veehäaden vom Kjennich un siene Säns, un de Hoffbeaumten, de Helden un aul de aunjeseene Mana. 2Un de Kjennich David stunt opp un säd: Horcht no daut waut ekj saj, miene Breeda un mien Volkj! Ekj selfst haud mie väajenomen, een Hus to buen, wua däm Harn siene Bundeskjist, onsen Gott siene Footbenkj, eenen Ruplauz finjen sull. Un ekj hab uk reedjemoakt toom daut buen. #(2-7) 1Chr 22,6-10; Psa 99,5; 132,7 3Oba Gott leet to mie sajen: Du saust mie nich een Hus buen wua jie mienen Nomen aunbäden, wiels du best een Kjrieja un hast Menschen doot jemoakt. #2Sam 7,5 4Oba de Har, Israel äa Gott, haft ut de gaunze Famielje von mienen Voda jrod mie utjewält, daut ekj un miene Nokomen fa aule Tieden Kjennich en Israel sennen sullen. Wiels hee haft Juda toom Leida jewält un em Staum Juda mien Voda siene Famielje, un von mienen Voda siene Säns haft hee aun mie jefaulen jehaut, daut hee mie toom Kjennich muak äwa gaunz Israel. #1Mo 49,10; 1Sam 16,1.12 5Un von aul miene Säns, un de Har haft mie väl Säns jejäft, haft hee mienen Sän Salomo jewält. Dee saul opp däm Harn sienen Kjennichstroon äwa Israel rejieren. #1Kjen 1,13 6De Har säd to mie: Dien Sän Salomo saul dän Tempel un de Häw doarom buen. Däm hab ekj jewält; hee woat mien Sän sennen un ekj woa sien Voda sennen. #1Chr 17,11-14 7Ekj woa sien Kjennichrikj fa aule Tieden ensaten, wan hee bestendich miene Jesazen un Ordnungen helt, soo aus hee nu deit. 8Ekj fodda junt nu opp ver de Uagen von gaunz Israel, däm Harn siene Jemeent, un ver onsen Gott siene Uaren: Doot däm Harn, onsen Gott, siene Jebooten beachten un jewessenhauft befoljen, daut jie daut goode Launt hoolen un opp june Kjinja no junt fa aule Tieden veoawen kjennen! 9Un du, mien Sän Salomo, doo däm Harn, waut dien Voda sien Gott es, emma bäta kjanen lieren! Un deen am met een onjedeeldet Hoat un met eene welje Seel. Wiels de Har forscht jieda Hoat ut un vesteit aulet sträwen un trachten von de Jedanken. Wan du am sieekjen woascht, woascht du am finjen. Wan du die oba von am wajch dreien woascht, woat hee die fa emma vesteeten. #1Kjen 11,31.33; Jer 29,13-14 10Denkj doaraun: De Har haft die jewält, daut du een Hus aus Heilichtum buen saust. Go jetroost aum Woakj un fia daut derch!

11Un David jeef sienen Sän Salomo eenen Plon fa dän gaunzen Tempelbu met däm Väarum, de meddelste Stow, de aunjebude Stowen toom Wieetsachen loagren, de Bowastowen un bennaschte Riem un dän Rum fa de Bundeskjist met daut Veseenungs Dakjsel. #2Mo 25,9 12Un doatoo uk fa aules, waut am derch dän Jeist en dän Senn jekomen wia: Fa de Väahäw aun däm Harn sien Hus un aule Riem runtom, fa daut Kaptol em Gotteshus un fa de jeweide Gowen, 13fa de Aufdeelungen von de Priesta un Leviten un fa aule Oabeiten un Jereetschoft fa dän Deenst en däm Harn sien Hus. 14Un hee sad de Wicht faust, wooväl Golt ooda Selwa fa jieda eenselnet goldnet ooda selwanet Jereetschoft sull jebrukt woaren. 15Un soo uk daut Jewicht fa de goldne Laumpenhoolasch un goldne Laumpen, fa jieda Laumpenhoola met Laumpen sien Jewicht. Uk fa de selwane Laumpenhoolasch, fa jieda Laumpenhoola un de Laumpen, doano wuatoo de Laumpenhoola bestemt wia. 16Hee sad uk daut Goltjewicht fa de Deschen fa daut jeweide Broot un daut Selwajewicht fa de aundre Deschen faust. 17Hee jeef uk aun, woo de goldne Gauflen, Opfa Kommen un Kaunen jemoakt woaren sullen, un woo daut Jewicht von Golt un Selwa fa jieda eenselnet goldnet ooda selwanet Kuffel sennen sull, 18un fa daut Jewicht von daut reine Golt fa dän Ruakopfa Aultoa. Un hee jeef am uk eenen Plon fa däm Troonwoagen met de goldne Cheruben, dee met äare utjebreede Flichten däm Harn siene Bundeskjist bedakjen sullen. 19Daut aules haft de Har mie en eene Schreft jejäft, waut von siene Haunt staumt, un mie äwa däm Buplon unjarecht.

20Un David säd to sienen Sän Salomo: Go mootich un met een faustet Väanämen aun dise Oppgow naun! Fercht die nich un lot die nich schrakjen! Wiels de Har, mien Gott, de Aulmajchtja, woat met die sennen un woat siene Haunt nich trigjtrakjen un die nich veloten, bat du aul de Woakjen fa dän Deenst en däm Harn sien Hus foadich hast. #5Mo 31,6; 1Chr 22,13 21Kjikj emol, de Gruppen von Priesta un Leviten, waut fa däm gaunzen Deenst em Tempel bestemt sent, stonen aul reed. Fa aule Oppgowen hast du welje un vestendje Menschen toom halpen, uk de väaschte Mana un daut gaunze Volkj woaren daut doonen, waut du von an haben west.

Currently Selected:

1. Chronik 28: PB

Highlight

Compare

Copy