Gálatas 5
5
Qaqa hina sayanamanta
1Cristom judiokunapa kamachikuyninkunamanta librawarqanchik. Chaynaqa, qaqa hina sayaspayá amaña yugoman watasqa esclavo hina kawsaymanqa kutiriychikchu.
2Ñoqa Pablopa nisqaytayá uyariychik: Judiokuna hina señalachikuptikichikqa Cristoman hapipakuynikichikqa yanqapaqmi kanqa. 3Huktawanmi nimuykichik: Pipas judío hina señalachikuqqa munay mana munaymi llapallan leykunata kasukunan. 4Wakiqnikichikmi ninkichik:
Leyta kasukuptillanchikmi mana huchayuqpaqña Dios chaskiwasun, nispaykichik.
Chaynata nispaykichikmi Jesucristomantawan Diospa kuyakuyninmanta karunchakurunkichik. 5Ñoqanchikmi ichaqa Chuya Espiritupa yanapakuyninwan, mana huchayuqpaqña chaskisqa kananchikpaq iñiyllanchikwan suyachkanchik. 6Jesucristowan huklla kaptinchikqa manam imananchu qari kayninchikpi señalasqa otaq mana señalasqa kayninchikpas. Iñiyllam valenqa, chay iñiyqa kuyakuywan ruwaypim qawachikun.
7Qamkunaqa allintam kallpachkarqankichik, hinaptinqa ¿pitaq harkarusurqankichik cheqap kaqta manaña kasukunaykichikpaqqa? 8Chay yachachikuykunaqa manam qayasuqnikichik Diosmantachu hamun. 9#1 Co 5.6.Ninkum: “Aslla levaduraqa achka masatam poqochin”, nispanku. 10Ñoqaqa Señorpim hapipakuchkani, yachachisqaypa contranpi mana hukmanyanaykichikpaq. Haykam pantachiy munasuqnikichikkunataqa pi mayña kaptinpas Diosmi castiganqa.
11Wawqe-panillaykuna, sichum “Señalachikuychik” nispayraq yachachiptiyqa ¿imanasqamá qatikachawachkankuqa? Chayna kaptinqa Jesucristopa cruzpi wañusqanmanta willakuptiyqa manachiki paykunataqa piñachinmanchu. 12Aswanqa “qari-kaynikichikpi señalakuychik” nispa yachachiqkunaqa ojalataqya hukllatañapas lliwta kuchurachikunmanku.
13Wawqe-panillaykuna, Diosqa libre kanaykichikpaqmi qayasurqankichik. Ichaqa libre kaynikichiktaqa amayá aychapa munasqanpaq hinachu hapiychik, aswanqa kuyakuywanyá huknikichikmanta huknikichikkama yanapanakuychik. 14#Lv 19.18.Diosmi kamachiwarqanchik: “Kuyankim runamasikita kikikita hina”, nispa. Lliw leykunam kay huk kamachikuyllapi huñunakun. 15Sichum kikikichikpura kachunakuspa mikunakuspaykichikqa, cuidakuychikyá yanqañataq tuñichinakuspa tukunakuruwaqchik.
Aychapa rurunmantawan Chuya Espiritupa rurunmanta
16Chaynaqa, nimuykichikmi: Chuya Espiritupa munasqanman hina kawsaspaqa, aychapa munasqantaqa amaña ruwaychikchu. 17#Ro 7.15-23.Aychapa munasqanqa Chuya Espiritupa contranpim kachkan, Chuya Espiritupa munasqanñataqmi aychapa munasqankunapa contranpi kachkan. Iskayninku contranakuptinmi munasqaykichik ruwaytaqa mana atinkichikchu. 18Chuya Espíritu pusasuptikichikmi ichaqa manaña leypa munaychakusqanchu kachkankichik.
19Suti reqsiyllam aychapa munayninkunaqa, chayqa kaykunam: Waqllikuykuna, uywanakuykuna, millakuypaq ruwaykuna, manaña penqarikuspa qanrakuykuna, 20ídolo yupaychaykuna, layqanakuykuna, cheqninakuykuna, liryanakuykuna, envidiakuykuna, piñakuykuna, kikillanpaq imapas munaykuna, rakinakuy hatarichiykuna, pantaywan apachikuykuna, 21hukpa kaqnin munapayaykuna, #5.21 Kay wañuchinakuy niyqa wakin ñawpaq griego qellqakunallapiqa manam kanchu.(wañuchinakuykuna), upyakuykuna, mikuysapa kaykuna hinaspa chaykunaman rikchakuq tukuy rikchaq huchakuna. Ñawpaq nisqaytam huktawan nimuykichik: Chayna huchakuna ruwaqkunaqa manam Diospa munaychakusqanmanqa yaykunqakuchu.
22Chuya Espiritupa ruruyninñataqmi kaykuna: Kuyakuy, kusikuy, hawkayay, pacienciakuy, sumaq sonqoyuq kay, kuyapayakuy, iñiyniyuq kay, 23llampu sonqolla kay hinaspa genionchik controlakuy. Kay allin ruwaykunapa contranpiqa manam ima leypas kanchu. 24Haykam Jesucristopiña kaqkunaqa aychapa munasqantaqa, munapayayninkunatawan kuskatam chakatarunchikña. 25Sichum Chuya Espirituman hina kawsaspaqa, Chuya Espirituman hinataqyá purisunpas.
26Amayá hatun tukuqqa kasunchu, hukninchikmanta hukninchikwanqa ama piñanakusunchu nitaq envidianakusunchu.
Currently Selected:
Gálatas 5: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
