1 Corintios 12
12
Atiyninta Chuya Espíritu qowasqanchikmanta
1Wawqe-panikuna, Chuya Espiritupa atiynin sapakamaman qowasqanchikmantam yachanaykichikta munani.
2Qamkunaqa yachankichikmi, manaraq iñikuchkaspaykichikqa mana rimaq idolokunamanmi ñawsa hina aysasqa karqankichik. 3Chaynaqa, kaytayá yachaychik “Jesusqa ñakasqayá kachun” niq runaqa manam Diospa Espiritunpa atiyninwanchu rimachkan. Manataqmi pipas ninmanchu: “Jesusqa Señormi” nispaqa mana Chuya Espíritu rimachiptinqa.
4Tukuy rikchaq atiykunam kan, Espiritum ichaqa hina kaqlla. 5Achka llamkaykunam kan servikunapaq, Señormi ichaqa hina kaqlla. 6Atiypa tukuy rikchaq ruwayninkunam kan, ichaqa kikin Diosllam atiyninwan llapa runakunapi ruwan. 7Diosmi sapakamaman Chuya Espiritupa atiyninta qon, llapallanpa allinninpaq. 8Espirituntakamam wakinman atiyta qon yachaywan rimananpaq, wakinmanñataq yuyaywan rimananpaq. 9Chay Espirituntakamallataqmi wakinmanpas qon iñiy atiyta, wakinmanñataqmi onqoqkunata sanoyachinanpaq, 10wakinmanñataq milagrokuna ruwananpaq, wakinmanñataqmi profetizananpaq, wakinmanñataq espiritukunata reqsinanpaq, wakinmanñataq mana reqsisqa rimaykunata rimananpaq, wakinmanñataq chay rimaykuna uyarisqanta interpretananpaq. 11#Ro 12.6-8.Aswanqa tukuy kaykunataqa ruwan kikin Chuya Espiritullam, paymi munasqanman hina sapakamaman kaykunataqa qon.
Iñiqkunaqa huk cuerpolla kasqanchikmanta
12 #
Ro 12.4-5. Runapa cuerponqa huklla kachkaspapas achka parteyuqmi, ichaqa achka parteyuq kachkaspapas huk cuerpollam, chaynam Cristopas. 13Llapallanchikmi judiopas, griegopas, esclavopas hinaspa librepas chulla Espiritullawan bautizasqa karqanchik, chaynapi huk cuerpollaña kananchikpaq, huk Espiritullatataqmi chaskirqanchikpas.
14Cuerpoqa manam huk parteyuqllachu aswanqa achka parteyuqmi. 15Sichum chaki ninman: “Ñoqaqa manam makichu kani chaymi mana cuerpopachu kani” nispa, chaynata nispaqa manam cuerpopa parten kaymantaqa sapaqchakunmanchu. 16Sichum rinripas ninman: “Ñoqaqa manam ñawichu kani chaymi mana cuerpopachu kani” nispa, chaynata nispaqa manam cuerpopa parten kaymantaqa sapaqchakunmanchu. 17Lliw cuerpo ñawilla kaptinqa ¿maypitaq rinriqa kanman? Otaq lliw cuerpo rinrilla kaptinqa ¿maypitaq senqaqa kanman? 18Chaynaqa, Diosmi cuerpopa partenkunataqa maymi munasqan sitiopi churarqa. 19Sichum llapallan partekuna huknillan kaptinqa ¿maypitaq cuerpoqa kanman? 20Achka parteyuq kaspapas cuerpoqa hukllam.
21Manam ñawiqa ninmanchu makita, “Manam necesitaykichu” nispaqa, nitaqmi umapas ninmanchu chakita, “Manam necesitaykichu” nispaqa. 22Aswanqa cuerpopa manayniraq hina parten kaqkunataraqmi mastaqa necesitanchikpas, 23cuerpopi mana ancha kaqpaq hapisqanchiktaraqmi aswan sumaqtaraq pachachinchik, mana qawachikunapaq kaqkunatañataqmi allinta cuidanchik. 24Qawachikunapaq kaqkunatam ichaqa mana cuidanchikchu. Diosmi ruwarqa cuerpopa manayniraqpaq hapisqa partenta allin cuidasqa kananpaq, 25chaynapi cuerpopi kaqkunaqa mana rakinasqa kanankupaq, aswanqa llapanku hukninkumanta hukninkukama yanapanakunankupaq. 26Cuerpopa hukkaqnin parten ñakariptinqa wakiqninkupas ñakarintaqmi, huknin parten allin kuyasqa kaptinqa llapallantaqmi kusikunku.
27Qamkunaqa Cristopa cuerponmi kankichik, sapakamam chay cuerpopa parten kankichik. 28#Ef 4.11.Diosmi iglesiapi puntata churarqa apostolkunata, iskay kaqpiñataq profetakunata, kimsa kaqpiñataq yachachiqkunata, chaymantañataq milagrokuna ruwaqkunata, onqoqkuna sanoyachiqkunata, yanapakuqkunata, imamantapas nanachikuqkunata hinaspa mana yachasqanchik rimaykuna rimaqkunata. 29¿Llapallanchu apostolkuna? ¿Llapallankuchu profetakuna? ¿Llapallankuchu yachachiqkuna? ¿Lliwchu milagro ruwaqkuna? 30¿Lliwtaqchu onqoqkunata sanoyachinku? ¿Lliwchu mana reqsisqanchik rimaykunata rimanku? ¿Lliwtaqchu mana reqsisqanchik rimaykunata interpretanku? ¡Manam! 31Qamkunaqa Diospa allinnin atiynintayá maskaychik.
Kuyakuymanta
Ñoqam ichaqa imaynam aswan allin kawsanaykichikta qawachisqaykichik.
Currently Selected:
1 Corintios 12: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012