Sal 91
91
SAALM 91 (90)
Rub'el xkupuhom li Qaawa'
1Laa'at li nakathilank rub'el xwankil li Qaawa'
ut nakatmuhenk rub'el xkupuhom li Nimajwal Yos,
2ye re li Qaawa':
“At aj kolol we, at insaqoonak,
at inYos li k'ojk'o wi' linch'ool!”, cha'qat.
3A'an taakoloq aawe chiru li xra'al laj yo,
jo' ajwi' chiru li yajel li nakamsink.
4A'an taamuheelanq aawe rub'el li xkupuhom;
rub'el li xxik' taataw xkolb'al aawib':#91,4 Dt 32,10-11; Sal 17,8; 61,5; Eklo 34,13-16.
li xtiikilal xch'ool naxk'e aakawilal ut kolb'a ib'.
5Ink'a' taaxiwa li ch'a'ajkilal nachalk sa' li q'oqyink
chi moko li xiik'ilal nawank chiru li kutan;
6ink'a' taaxiwa li raxkamk nachalk sa' li aak'ab',
chi moko li tiq li naxb'on rib' tuqtu wa'leb'.
7Us ta te'kamq jun milaq chak'atq
malaj lajeeb'aq mil sa' laanim uq',
ab'anan laa'at maak'a' taak'ul.
8Ka'ajwi' taate xsa' laawu
ut taawil xq'ajkamunkileb' li ink'a' useb' xna'leb'.
9“Li Qaawa' a'an linmuheelahom”, chankat.
Wi xasik' li Nimajwal Yos cho'q aasaqoonak,
10ink'a' taanumtaaq li rahilal sa' aab'een
chi moko taanach'oq li ch'a'ajkilal rik'in laamuheb'aal.
11Li Qaawa' tixtaqlaheb' li x'ánjel chatenq'ankil
re naq tate'xb'eres sa' chixjunil laab'eenik.#91,11 Mt 4,6; Lk 4,10.
12Eb' li ánjel tate'xk'am sa' ruq'eb'
re naq ink'a' tattichk'oq chiru pek.#91,12 Mt 4,6; Lk 4,11.
13Taayeq' sa' laawoq li kaqkoj ut li k'anti',
tatb'eeq sa' xb'een li ral li kaqkoj ut li mama' xul.#91,13 Lk 10,19.
14“Xq'axtesi rib' chiwu,
jo'kan naq tinkol -chan li Qaawa'-;
tinmuheela xb'aan naq naxnaw wu.
15Naq tixyaab'a link'ab'a', laa'in tinsume.
Wanqin chi xk'atq sa' xq'ehil li rahilal;
laa'in tinkoloq re ut tink'e xloq'al.
16Tinnajtob'resi roq li xyu'am chi yo'oon
ut tink'ut chiru naq laa'in laj kolonel”.
Currently Selected:
Sal 91: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
