NA SAME 103
103
Me da vakavinavinaka sara vua na Kalou ni sa vakabulai keda, 1-13, ka sa sega ni mudu na nona loloma, 14-22.
A Same i Tevita.
1Mo vakavinavinaka vei Jiova, na yaloqu;
Io na ka kecega sa tu e lomaqu me vakavinavinaka ki na yacana tabu.
2Mo vakavinavinaka vei Jiova, na yaloqu,
Ia mo kakua ni guilecava na nona ka ni loloma kecega:
3O koya sa bokoca na nomu i valavala ca kecega,
O koya sa vakabulai iko mai na kemu mate kecega;
4O koya sa vakabulai iko mai na rusa;
O koya sa vakaisalataki iko e na ka ni loloma
Kei nai valavala vakayalololoma sara;
5O koya sa vakamamautaka na gusumu e na ka vinaka;
Sa vakavoutaki kina na nomu cauravou me vaka na nona na ikeli.
6Sa kitaka ko Jiova na ka dodonu kei na lewa vinaka,
E na vukudra kecega era sa vakasaurarataki.
7Sa vakatakila ko koya na nonai valavala vei Mosese,
Kei na nona cakacaka vei ira na Isireli.
8Sa yalololoma ko Jiova ka daulomasoli,
Sa daubera ni cudru, ka daulevu na nona yalololoma.
9Ena sega ni ia tikoga na veivunauci:
Ena sega ni cudru tiko ka tawa mudu.
10Sa sega ni lewa vei keda me vaka na nodai valavala ca;
Ka sega talega ni cudruvi keda me vaka na noda caka ca.
11Me vaka na kena cecere ki vuravura ko lomalagi,
Sa vakakina na kena levu ni nona yalololoma vei ira era sa rerevaki koya.
12Me vaka na kena yawa na vanua e cadra kina na siga ki na vanua sa dromu kina na siga,
Sa vakayawataka vakakina vei keda ko koya na nodai valavala ca.
13Me vaka sa lomana na luvena e dua na tamata,
Sa lomani ira vakakina ko Jiova era sa rerevaki koya.
14Ni sa kila ko koya na nodai bulibuli;
Sa nanuma ga ni da sa kuvu-ni-soso.
15Ia na tamata, sa vaka ga na co na nona siga:
Me vaka na se ni kau ni vanua, sa se ka beta vakakina ko koya.
16Ni sa liwava na cagi, ka sa yali sara;
Ka sa sega ni kunea tale na tikina ka tu kina.
17Ia na yalololoma i Jiova sa ka mailiu sara ka na sega talega ni mudu vei ira era sa rerevaki koya,
Kei na nonai valavala dodonu, kivei ira na luvedra kei na makubudra;
18Vei ira era sa vakabauta na nona veiyalayalati,
Kei ira era sa nanuma tiko na nonai vakaro me ra cakava.
19Sa vakataudeitaka ko Jiova na nonai tikotiko vakaturaga mai lomalagi;
Ka sa lewa na ka kecega na nona matanitu.
20Dou vakavinavinaka vei Jiova koi kemudou na nona agilose;
Sa uasivi e na kaukauwa, ka sa cakava na nonai vakaro, Ni dou sa vakarorogo tiko ki na nona vosa.
21Dou vakavinavinaka vei Jiova, koi kemudou na nona ka lewe vuqa;
Oi kemudou na nonai talatala, ka kitaka tiko na ka sa vinaka vua.
22Dou vakavinavinaka vei Jiova, na nona cakacaka kecega,
E na veiyasana kecega sa lewa kina ko koya:
Mo vakavinavinaka vei Jiova, na yaloqu.
Currently Selected:
NA SAME 103: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
