NA SAME 102
102
A masu ni tamata ni sa rarawa, ni sa luvu na lomana, ka sa tukuna yani na ka e rarawa kina e na mata i Jiova.
1Kemuni Jiova mo ni rogoca na noqu masu,
Io me yaco vei kemuni na noqu tagi.
2Kakua ni vunia vei au na matamuni e na siga ka'u sa rarawa kina;
Mo ni vakatu daligamuni mai vei au.
E na siga ka'u sa tagi kina mo ni rogoci au vakasauri kina.
3Ni sa oti wale na noqu siga me vaka na kubou,
Ka sa waqa na suiqu me vaka na qilaiso.
4Sa vakacataki na lomaqu, ka sa malai me vaka na co;
Ni'u sa guilecava ni kania na qau kakana.
5E na vuku ni domo ni noqu vutugu
Sa veikabi vata na suiqu kei na kuliqu.
6Au sa vaka na belo ni veikau:
Au sa vaka na lulu ni lekutu.
7Au sa vakatawa,
Ka sa vaka na separo ni sa tiko duaduaga mai na dela ni vale.
8Era sa vakasewasewani au ko ira na noqu meca e na siga ka bogi;
Ka ra sa bubului ka cavuti au ko ira era sa cudru vei au.
9Ka'u a kania kina na dravusa me vaka sa madrai,
Ka veiwakitaka na mequ wai kei na wai ni mataqu,
10Ni ko sa levaci au ka cudruvi au:
Ni ko a laveti au cake, ka biuti au sobu.
11A noqu veisiga sa vaka na yaloyalo ni sa lumaluma na siga;
Io ka'u sa malai me vaka na co.
12Ia koi kemuni Jiova, ena sega ni mudu na nomuni bula;
Kei na ka mo ni nanumi kina ena yacova nai tabatamata kecega.
13O ni na tu cake, o ni na yalololoma ki Saioni:
Ni sa yaco na gauna me lomani kina ko koya, io, na gauna ka loku sa qai yaco.
14Ni ra sa rekitaka na kena veivatu na nomuni tamata,
Ka ra lomana na kena kuvu-ni-soso.
15Era na rerevaka kina na yaca i Jiova na veimatanitu,
Kei na nomuni ukuuku ko ira kecega na tui kei vuravura.
16Ni sa qai tara ko Jiova na koro ko Saioni,
Ena qai rairai mai e na nonai ukuuku;
17Ena goleva na nodra masu na luveniyali,
Ka na sega ni beca na nodra masu.
18Ena volai oqo me ra kila ko ira nai tabatamata maimuri;
Ka ra na vakavinavinaka vei Jiova ko ira na mataqali era na buli maimuri.
19Ni sa rai sobu ko koya mai na nona yasana tabu sa cecere;
Sa raici vuravura ko Jiova mai lomalagi;
20Me vakarorogo ki na nona vutugu ko koya sa vesuki;
Me sereki ira era lewai me ra mate;
21Me tukuni mai Saioni na yaca i Jiova,
Kei na nona vinaka mai Jerusalemi;
22Ni ra sa qai soqoni vata ko ira na veimataqali,
Kei na veimatanitu, me ra qaravi Jiova.
23Sa vakamalumalumutaka na noqu kaukauwa e na gaunisala;
Sa vakalekalekataka na noqu siga ni bula.
24Ka'u a kaya, kemuni na noqu Kalou, mo ni kakua ni kauti au tani e na veimama ni noqu bula;
A nomuni veiyabaki sa yacova nai tabatamata kecega.
25Mailiu sara ko ni a tauyavutaki vuravura:
Io na cakacaka ni ligamuni, ko lomalagi:
26Ena rusa oqori, ia koi kemuni ko ni na tiko ga;
Ena madra kece talega mai oqori me vaka nai sulu; O ni na vakaisosomitaka me vaka nai tutuvi, ia era na vakaisosomitaki:
27Ia koi kemuni sai kemuni tikoga,
Ena sega ni bau mudu na nomuni veiyabaki.
28Era na tiko na luvedra na nomuni tamata,
Ena vakataudeitaki talega e matamuni na nodra kawa.
Currently Selected:
NA SAME 102: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
