NA SAME 104
104
Sa vakananuma na kaukauwa ni Kalou, 1-9, kei na nona lewa vinaka, 10-30. Ka sa vinakata me vakanananu tiko kina, 31-35.
1Mo vakavinavinaka vei Jiova, na yaloqu. I Jiova na noqu Kalou, o ni sa levu vakaidina;
O ni sa vakaisulu e na vakarokoroko kei na ka vakaturaga.
2O ni sa vakaisulutaki kemuni e na rarama me vaka e nai sulu:
O ni sa birika na lomalagi me vaka nai ubi levu:
3O ni sa kotora nai kaso ni nomuni vale e cake e na dela ni wai:
O ni sa cakava na o me nomuni qiqi vakaturaga:
O ni sa lako voli e na taba ni cagi:
4O ni sa cakava na nomuni agilose me ra vaka na cagi;
Na nomuni talai me yameyame ni bukawaqa.
5Sa vakataudeitaki vuravura ko koya e na kena yavu,
Me kakua ni yavala rawa ka sega ni mudu.
6O ni a ubia e na wai titobu me vaka e nai tutuvi:
Sa cecere na wai ka lolovira na veiulu-ni-vanua.
7Ni kemuni a vunauca sa dro na wai,
E na domo ni nomuni kurukuru sa kusarawa ni lako tani:
8Sa cabeta na veiulu-ni-vanua; sa lako sobu ki na veibuca
Ki na yasana ko ni a cakava me nodra.
9O ni a lesia na kenai yalayala me ra kakua ni sivia,
Me ra kakua ni lesu tale me ubi vuravura.
10Sa vakatubura ko koya na mata-ni-wai e na buca,
Ka sa lako voli e na maliwa ni veiulu-ni-koro.
11Sa vagunuvi kina na manumanu kecega ni vanua; Sa ra gunu ka ra cegu na asa kila.
12Era sa tiko e na batina, na manumanu vuka,
Ka ra sa tagi tiko e na taba ni kau.
13Sa vagunuva na veiulu-ni-vanua ko koya mai na nona vale e cake:
Sa vakamamautaki ko vuravura e na vua ni nomuni cakacaka.
14Sa vakatubura ko koya na co me kedra na manumanu,
Kei na co eso me yaga vei ira na tamata:
Me vakatubura na kakana mai na qele;
15Kei na waini, sa vakamarautaka na loma ni tamata,
Kei na waiwai sa lumilumisa kina na matana,
Kei na kakana sa kaukauwa kina na loma ni tamata.
16Na kau sa bulia ko Jiova, sa mamau e na kedra dra:
Io na sitari mai Lepanoni, sa tea ko koya;
17Era vakasova kina na manumanu:
Ia na belo, sa nona vale na damanu.
18Na veiulu-ni-vanua cecere sa nodra i drodro na me kila;
Kei na veiuluvatu me nodra i drodro na koni.
19Sa lesia ko koya na vula mei vakatakilakila ni tabayabaki:
Ka sa kila na kenai dromudromu na mata-ni-siga.
20O ni sa cakava na butobuto, ka sa bogi kina;
Sa qai lako voli kina na manumanu kecega ni veikau:
21Sa tagica na kedra kakana na luve ni laioni,
Ka qara mai vua na Kalou na kedra kakana.
22Sa cadra na mata-ni-siga, era sa qai soqoni vata,
Ka la'ki koto e na nodra qara:
23Sa lako yani na tamata ki na nona cakacaka,
Kei na ka e qarava, ka sa ia tiko me yakavi mada.
24I Jiova, sa ka levu vakaidina na nomuni cakacaka!
Ka sa caka vakavuku kecega:
Sa roboti vuravura na nomuni yau.
25Sa vakakina na wasawasa levu oqo sa rabailevu,
Sa bula voli kina na ka e sega ni wili rawa,
Na ka lalai kei na ka lelevu.
26Sa soko voli kina na waqa vanua:
Na livaiacani talega, o koya ko ni a bulia me qito kina.
27Era sa vakanamata vei kemuni na ka kecega oqori,
Mo ni solia na kedra e na kena gauna.
28A ka ko ni sa solia vei ira era sa rawata:
O ni sa dedeka na ligamuni, ka ra sa mamau e na ka vinaka.
29O ni sa vunia na matamuni, era sa qai leqa:
O ni sa kauta tani na nodra i cegu, era sa qai mate,
Ka ra lesu tale me kuvu-ni-soso.
30O ni sa tala yani na Yalomuni, era sa buli:
Io ko ni sa vakavoutaka tale na dela i vuravura.
31Ena sega ni mudu rawa na lagilagi i Jiova:
Ena rekitaka na nona cakacaka ko Jiova.
32Sa raici vuravura ko koya, ka sa tavuki:
Sa tara na veiulu-ni-vanua, ka sa kubou mai.
33Au na sere vei Jiova ni'u sa bula tiko:
Au na vakavinavinaka vua na noqu Kalou e na noqu gauna sa vo tiko.
34Ena kamikamica na noqu vakanananu vua:
Au na rekitaki Jiova.
35Me qeavu laivi e vuravura na daucaka cala,
Io me kakua ni vo tiko nai valavala ca.
Mo vakavinavinaka vei Jiova, na yaloqu.
Dou ia vei Jiova na vakavinavinaka.
Currently Selected:
NA SAME 104: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
