AISEA 9
9
Ni sa ka levu sara na butobuto, ena qai sucu mai na Karisito me rarama levu, 1-7. Era na cudruvi na Isireli e na vuku ni nodra viavialevu, 8-12, kei na nodra lotu vakailasu, 13-17, kei na nodra sega ni veivutuni, 18-21.
1Ia ena sega ni butobuto vua sa vakararawataki, me vaka sa beci eliu na vanua ko Sepuloni kei na vanua ko Nafitalai, ia ena vue na kena totoka e na gauna maimuri na yasayasa vakawaitui, na bati ni Joritani, ko Kalili ni veimatanitu.
2Ko ira na tamata ka lako e na butobuto, era sa raica na rarama levu; sa cadra cake na rarama vei ira era sa tiko e na vanua ni yaloyalo ni mate. 3Ko ni sa vakalewevuqataka na matanitu, ko ni sa vakaikuritaka na nodra marau; era sa marau e matamuni me vaka na marau ni sa cava na yabaki, ka vaka na nodra marau era sa vota nai toki ni valu. 4Ia na nonai savenaki bibi, kei nai vua ni domona, kei nai titoko i koya ka vakasaurarataki koya, ko ni sa musuka me vaka e na siga i Mitiani. 5Ia na nodra i yaya kecega era sa vakaiyaragi tu ki nai valu kei na kaila ni valu, kei nai sulu sa lomoci e na dra, ena visa ga, me kena buka ni bukawaqa.
6Ni sa sucu mai e dua na gone me noda, sa soli mai vei keda e dua na gonetagane: ena vakatau kivei koya na lewa; ena vakatokai na yacana ko Veivakurabuitaki, nai Vakavuvuli, na Kalou kaukauwa, na Tama ni gauna tawa mudu, na Tui ni Sautu. 7Ena sega ni oti na kena tubu na nona lewa kei na sautu, e nai tikotiko vakaturaga i Tevita, kei na nona matanitu, me vakataudeitaka, ka vakaukauwataka e na lewa dodonu kei nai valavala dodonu mai na gauna oqo ka yacova na gauna kecega. A lomakatakata i Jiova ni lewe vuqa ena vakayacora na ka oqo.
8Sa dua na nona vosa na Turaga kivei ira na Jekope, a sa tau kivei ira na Isireli. 9Era na kila kina ko ira na tamata kecega, na Ifireimi kei na kai Samaria, era sa kaya e na nodra viavialevu kei na kaukauwa ni lomadra, 10Sa lutu sobu na vatu-buli, ia e na vatu sa ta eda na qai tara tale kina: sa ta sobu na lolo, ia eda na qai vakaisosomitaka e na sitari. 11Ia ko Jiova ena qai vakalevulevui ira na meca i Risina me vala kei ira, ena vakauqeti ira talega na nodra meca me ra to vata kei ira. 12Ko ira na kai Siria mai na tu-i-cake, kei ira na kai Filisitia mai ra; ka ra na tilomi ira sara na Isireli. Ia ni sa caka na ka kece oqo sa sega ga ni mudu kina na nona cudru, ka sa dodo tikoga na ligana.
13Ia ko ira na tamata era sa sega ni lesu kivei koya sa yaviti ira, a ra sa sega talega ni qaravi Jiova ni lewe vuqa: 14Ena muduka tani kina ko Jiova maivei ira na Isireli na uludra kei na buidra, na ulu ni niu kei na taria, e na dua bauga na siga. 15A qase kei koya na tamata sa rogo, sai koya na uludra; a parofita sa vakavulica na ka lasu, ko koya ga na buidra. 16Io ko ira sa tuberi ira na tamata oqo, era sa vakacalai ira; ko ira era sa tuberi, era sa tilomi sara. 17Ia na Turaga ena sega kina ni rekitaki ira na nodra cauravou, ena sega talega ni yalololoma vei ira na gone era luveniyali kei na nodra yada: ni ra sa dui veivakaisini kai valavala ca, a gusudra kece sa daucavuta ga na ka lialia. Ia ni sa caka kece oqo sa sega ga ni mudu kina na nona cudru, ka sa dodo tikoga na ligana.
18Ni sa waqa na yaloca me vaka na bukawaqa; ena kania na kau vakavotona kei na soni; ena vakacaudreva na kau ni veikau, ka na kuvu cake me vaka na kubou. 19Sa vakabutobutotaki na vanua e na cudru i Jiova, ia na tamata era na vaka na buka ni bukawaqa: ena sega e dua me yalololoma vua na tacina. 20Ena kaliraka mai nai matau e dua, ka na viakana ga; ena kana mai nai mawi, ka na sega ni mamau: era na dui kania na lewe ni ligana: 21ena kani Ifireimi ko Manasa, kei Manasa ko Ifireimi: ka rau na to vata me cati Juta. Ia ni sa caka na ka kece oqo sa sega ni mudu kina na nona cudru, ka sa dodo tikoga na ligana.
Currently Selected:
AISEA 9: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
