AISEA 10
10
Ena ca na turaga era sai valavala vakaukauwa, 1-4. Ena musuki ko Asiria, na kedrai wau na dauveivakaisini, e na vuku ni viavialevu, 5-19. Ena vakabulai na kena vo na Isireli, 20-27. Sa mai kabai Jerusalemi ko tui Asiria, ka ra sa cudruvi sara na nonai valu, 28-34.
1Ena ca ko ira sa vakatura na lawa sa sega ni dodonu, ka vola na ka rarawa era sa lesia; 2me vakasuka mai vei ira na dravudravua na veilewai dodonu, ka kauta tani na ka dodonu mai vei ira na noqu tamata era sa malumalumu, me ra kovea na nodra i yau na yada, ka butakoca na nodra ka na luveniyali! 3Ia ka cava mo dou kitaka e na siga ni veitarogi, kei na veivakarusai sa lako vakayawa mai? dou na dro vei cei mo dou vukei kina? ia dou na laiva kivei na ka dou sa dokai kemudou kina? 4Ni ka'u sa laivi ira, era na cuva vata kei ira na bobula, ka bale vata kei ira era moku mate. Ia ni sa caka na ka kece oqo sa sega ni mudu kina na nona cudru, ka sa dodo tiko na ligana.
5Ko na ca ko iko na kai Asiria, nai titoko ni noqu cudru; ia na matanakilagi e na ligadra sa noqu cudru waqawaqa. 6Au na talai koya ki na matanitu dauveivakaisini, ia ka'u na vakaroti koya e na vuku ni tamata ka'u sa cudruva, me ia na veitokitaki, kei na veikoveraki, ka me buturaki ira sobu me vaka na lolobu e na salatu. 7Ia ko koya, ena sega ni nanuma me vakakina; ka sa sega ni kenai naki ni lomana; sa lomana ga me ia na veivakarusai, ka vakaotia na matanitu e vuqa. 8Ni sa kaya ko koya, Sa sega li ni ra tui dina ko ira na noqu tamata turaga? 9Sa sega ni vakataki Kakimisi ko Kalino? sa sega ni vakataki Apati ko Emaci? sa sega li ni vakataki Tamasiko ko Samaria? 10Me vaka ni sa tara na ligaqu na nodra kalou lasu na veimatanitu, ka sa uasivi cake talega na nodra matakau ceuceu e na nodra mai Jerusalemi kei Samaria, 11ia na ka ka'u a cakava ki Samaria kei na nona matakau, me'u sega li ni cakava vaka talega kina ki Jerusalemi kei na nona matakau? 12Ia ni sa vakaotia ko Jiova na nona cakacaka kecega ki na ulu-ni-vanua ko Saioni kei Jerusalemi, ka'u na qai cudruvi koya na tui Asiria e na vuku ni nona yalolevu, kei na lagilagi ni nona mata viavialevu. 13Ni sa kaya ko koya, E na kaukauwa ga ni ligaqu kei na noqu vuku ka'u sa rawata na ka oqo; ni'u sa yalomatua: ia ka'u sa kisira nai yalayala ni veimatanitu, ka kovea na nodra i yau, ka'u sa vakasivoi ira na lewena me vaka na qaqa: 14Ia na ligaqu, sa taura na nodra i yau na veimatanitu me vaka na sova ni yaloka; me vaka e dua sa kumuna na yaloka sa biu tu, ka'u sa kumuni vuravura taucoko; a sa sega e dua sa vakayavalata na tabana, se dalaga, se tagi. 15Me dokai koya li na matau vua sa tavaka? me sa vakalevulevui koya li nai varo vei koya sa varolaka? me vaka nai titoko ni sa yavalati ira era sa laveta; me vaka na laciu ni sa laveti koya sa sega ni kau. 16Ia na Turaga, na Turaga ni lewe vuqa, ena tala kina vei ira na nona tamata levulevu na suivotu; ia e ruku ni nonai ukuuku ena tutuvaka na buka me vaka na kena waqa na bukawaqa. 17Ia na nodra rarama na Isireli ena yaco me bukawaqa, kei Koya na nona Yalosavasava me yameyame ni bukawaqa: ena waqa ga ka vakayavuna na nona kau votovotoa kei na nona soni e na siga e dua bauga. 18Ia ena vakayavuna ko koya na kena vinaka ni nona veikau kei na nona were bulabula, na yalona kei na yagona: ia ena vaka ni sa suivotu mai e dua sa tauvi mate. 19Ia na kena vo ni kau ni nona veikau ena lailai ga, sa na vola rawa e dua na gone.
20Ia ena yaco e na siga ko ya, ko ira na kena vo na Isireli, kei ira na mataqali i Jekope era dro bula, era na sega ni vakararavi tiko vua ka yaviti ira; era na vakararavi vakaidina ga vei Jiova, ko Koya na Yalosavasava ni Isireli. 21Ena lesu mai na kena vo, io na kena vo ni Jekope, vua na Kalou kaukauwa. 22Ia kevaka ena vaka na nuku ni wasawasa ko ira na nomu tamata, na Isireli, ena lesu ga mai na kena vo: ia na kawaboko sa lesi me yaco ena rairai levu kina na kena caka vakadodonu. 23Io na kawaboko sa lesi, ena vakayacora ga na Turaga ko Jiova ni lewe vuqa e loma i vuravura taucoko.
24O koya sa kaya kina na Turaga ko Jiova ni lewe vuqa, Dou kakua ni rere, na noqu tamata sa tiko mai Saioni, e na vuku ni kai Asiria: ena yaviti iko ko koya e nai titoko, ka laveta vei iko na nona matanakilagi, me vakataki ira na kai Ijipita: 25Ka sa vo e lailai sara ga ena qai tini na cudru waqawaqa, kei na noqu cudru e na nodra rusa. 26Ia ko Jiova ni lewe vuqa ena vakauqeta na kuita me kena me vaka na nodra yaviti na kai Mitiani mai na uluvatu ko Orepi; a nonai titoko ena tauca na wasawasa, ia ena dodoka tale ko koya me vaka mai Ijipita. 27Ia ena yaco e na siga ko ya, ena kau tani na nonai kaukau mai na nomu i colacola, kei na nonai vua mai na domomu; ia ena musuki nai vua e na vuku i koya sa lumuti.
28Sa lako mai ko koya ki Aiaci; sa lako yani ki Mikironi; sa laiva tu yani ki Mikimasi na nonai yaya: 29Era sa sivia na tadrua ni uluvatu: era sa moce ki Kepa; sa rere ko Rama; sa dro ko Kipea na koro i Saula. 30Mo qoqolou, na goneyalewa ni Kalimi! mo vakarogoca, Leisi! Isa ko Anacoci! 31Sa se ko Matimena; sa kubu na kai Kepemi. 32Sa bogi dua ga mai Nopi ko koya: ena qai dodoka na ligana ki na ulu-ni-vanua ni goneyalewa ni Saioni, ki na ulu-ni-koro ko Jerusalemi.
33Raica, na Turaga, ko Jiova ni lewe vuqa, ena tamusuka vakaukauwa vakaidina na tabana; ena ta sobu na ka cecere; ia na viavialevu ena vakamalumalumutaki. 34Ena taya sobu ko koya na kau ni veikau e na matau, ia ko Lepanoni oqo ena tavakabalea ko Koya sa Kaukauwa.
Currently Selected:
AISEA 10: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
