AISEA 8
8
Sa tukuni ni na rawai Siria kei ira na Isireli ko Asiria, 1-4; ena rawai ira talega na Juta e na vuku ni nodra sega ni vakabauta, 5-8. Ena sega ni vakadaroi rawa na lewa ni Kalou, 9-16; ko ira era sa rerevaki koya era na vakacegui, 17,18; Ena vakararawataki ko ira sa vakararavi ki na kalou lasu, 19-22.
1A sa kaya vei au ko Jiova, Mo taura mada e dua na papa ni volavola levu, ka vola vakamacala kina E na vuku i Measalali-asi-pasi. 2Ia ka'u a kauta vata kei au e le rua na tamata dina me rau vakadinadinataka, ko Uraija na bete, kei Sakaraia na luve i Jeperekaia. 3Ia ka'u a lako vua na parofita yalewa; ka sa kunekune ko koya, ka vakasucuma e dua na gonetagane. Sa qai kaya vei au ko Jiova, Mo vakayacani koya ko Measalali-asi-pasi. 4Ka ni na sa sega ni vuku na gone me kaci, Tamaqu, kei Tinaqu, ena kau tani nai yau mai Tamasiko, kei nai toki ni valu mai Samaria kivei tui Asiria.
5Sa baci vosa tale vei au ko Jiova, ka kaya, 6Ni ra sa beca na wai ni Sailoa sa drodro malua ko ira na tamata oqo, ka ra marautaki Risina kei koya na luve i Rimalaia; 7raica, na Turaga ena vakauta cake mai vei ira na wai ni Uciwai, sa kaukauwa ka levu, io na tui Asiria, kei na nona kaukauwa vakaturaga kece: ia na uciwai oqo ena tubu cake e na kena dreke-ni-wai kecega, ka vuabale e na batina kecega: 8Ena dave yani ki Juta; ena luvuca voli; ena yala ki domodra; ia ni sa vakatetaba ko koya ena ubi kece sara kina na nomuni vanua, Imanueli.
9Dou soqoni vata vakaivalu, na veimataqali, ia dou na vakataqayataki ga; dou rogoca, na lewe ni veivanua vakayawa: dou vauci kemudou, dou na vakataqayataki ga; dou vauci kemudou, ia dou na vakabalei sobu ga. 10Dou bose vata mada, ena vukici ga; dou tukuna na vosa, ena sega ga ni yaco: ni sa tiko vata kei keimami na Kalou. 11Ni sa rawai au na kaukauwa i Jiova ka vosa vakaoqo vei au ko koya, ka vakasalataki au me'u kakua ni muria na nodra sala na tamata oqo, ka sa kaya, 12Dou kakua ni kaya sa dua na vere e na vuku ni ka kece era sa kaya kina na tamata oqo sa dua na vere; dou kakua talega ni rerevaka na ka era rerevaka, kakua talega ni kidroa kina. 13Ia ko Jiova ni lewe vuqa, o koya ga mo dou doka; sai koya ga mo dou rerevaka, sai koya ga mo dou kidroa kina. 14Ia sa na yaco ko koya me vale tabu; ka na yaco talega me vatu era na tarabe kina, kei na vatu era na bale kina na mataqali ruarua i Isireli; ka mei cori talega ka tudai kivei ira na kai Jerusalemi. 15Ia ena tarabe kina na lewe vuqa, era na bale, ka ramusu, ka coriti, ka tauri. 16Mo viviga nai vola ni tukutuku, dregata na vunau me nodra na noqu tisaipeli.
17Ia ka'u na waraki Jiova, ko koya sa tabonaka na matana mai na mataqali i Jekope, ka'u na waraki koya tiko.
18Raica, koi au kei ira na gone sa solia mai vei au ko Jiova, keitou sa solia mei vakatakilakila kei na ka e veivakurabuitaki vei ira na Isireli maivei Jiova ni lewe vuqa, ko koya sa tiko mai na ulu-ni-vanua ko Saioni.
19Ia ni ra na kaya vei kemudou, Dou la'ki tarogi ira sa curumi, kei ira na rairai era sa tagi ka kudru: me ra kakua li ni tarogi koya na nodra Kalou ko ira na tamata? me ra lako li vei ira na mate e na vukudra na bula? 20Qara mada e na vunau kei nai tukutuku: kevaka era sa sega ni vosa me vaka na vosa oqo, sa ka ga ni sa sega dina vei ira na rarama. 21A ra na lako voli yani, ka vakararawataki ka viakana: ia ena yaco, ni ra sa viakana, era na nuinuica tiko, ka vosacataki rau na nodra tui kei na nodra Kalou, a ra na rai ki cake. 22A ra na rai talega ki vuravura; ka kunea na ka rarawa kei na butobuto, na butobuto kei na yaluma; ka ra na vakasavi tani ki na butobuto loaloa.
Currently Selected:
AISEA 8: FOV
Highlight
Copy
Compare
Share
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
