2 KORINICA 5
5
Sa tukuna ko koya ni sa vakadinata sara na ka vinaka ena yaco ni na tu cake tale na mate, a sa nuitaka me nona, 19. Ia ni sa kila ena lewai ko ira na tamata kecega, sa vakamasuti ira na tamata me ra veivinakati kei na Kalou, 1021.
1Ni keitou sa kila, kevaka sa rusa na neitou vale vakavuravura o koya sa vakacevaceva, sa dua na neitou mai vua na Kalou, a vale sa sega ni caka e na liga, sa sega ni rusa rawa, mai lomalagi. 2Io keitou sa vutugu e na yago oqo, ni keitou sa gadreva sara tiko me vakaisulutaki e na neitou vale mai lomalagi: 3ke sa vaka ni keitou sa vakaisulu, keitou na sega ni kune me keitou luvawale. 4Ni keitou sa vutugu, oi keitou sa tiko e na vale vakacevaceva, ni keitou sa bitaki: ni keitou sa sega ni via luvata oqo, me keitou vakaisulu mai, me tiloma na ka sa mate rawa na bula. 5Ia sai koya na Kalou sa vakarautaki keitou ki na ka oqo, o koya sa solia talega vei keitou na Yalo Tabu me kenai sevu. 6O koya oqo keitou sa doudou tikoga kina, ni keitou sa kila, ni keitou sa tiko e na yago, keitou sa tawase kei na Turaga: 7(Keitou sa lako voli e na vakabauta, ka sega ga e na raica:) 8keitou sa doudou tiko, ka keitou sa vinakata cake me keitou tawase kei na yago, ka tiko vata kei na Turaga. 9O koya oqo keitou sa dauvakatovolea kina se keitou tiko vata, se tawase tani, me keitou vinaka ga vua.
10Ni da na rairai koi keda kecega e na mata ni tikotiko ni veilewai nei Karisito; me da rawata yadua nai sau ni veika sa caka e na yagona, me vaka na veika sa cakava ko koya, se vinaka se ca.
11Ia ni keitou sa kila na veivakarerei ni Turaga, keitou sa vakamasuti ira na tamata; ia keitou sa vakaraitaki vua na Kalou; au sa dinata talega ni keitou sa vakaraitaki e na nomudou lewa-eloma. 12Ia keitou sa sega ni tukuni keitou tale vei kemudou, ia keitou sa solia ga vei kemudou na ka mo dou rekitaki keitou kina, me so kina na ka mo dou kaya vei ira sa dokai ira e na ka vaka rairai walega ka sa segai e na ka ni yalo. 13Ia kevaka keitou sa sesewa, sa ka ga vua na Kalou; kevaka keitou sa yalomatua, sa ka ga e na vukumudou. 14Ni sa rawai keitou sara na loloma i Karisito: ni keitou sa lewa vakaoqo, kevaka sa mate e dua e na vuku ni tamata kecega, era sa mate kecega; 15ka sa mate ko koya e na vuku ni tamata kecega, me ra kakua ni bula tiko me yaga vei ira ga, ko ira era sa bula, me ra yaga ga vua sa mate e na vukudra ka tu cake tale. 16O koya oqo keitou sa qai sega tale ni doka e dua na tamata e na vuku ni ka vakayago; e dina ga keitou a dokai Karisito e na vuku ni ka vakayago, ia keitou sa qai sega tale ni dokai koya kina. 17Ia kevaka sa tu vata kei Karisito e dua na tamata, sa qai buli vou: sa lako tani na veika makawa; raica, sa yaco me vou na ka kecega. 18A sa vu mai vua na Kalou na ka kecega, o koya sa vakaveivinakatitaki keda kei koya e na vuku i Karisito, a sa solia vei keitou me keitou vunautaka na veivinakati; 19me vakaoqo, sa ia na Kalou, me vakaveivinakatitaki vuravura vei koya ga e na vuku i Karisito, ka sa sega ni wilika vei ira na nodra i valavala ca; ka sa solia vei keitou nai tukutuku ni veivinakati.
20Keitou sa yaco kina mei talatala i Karisito, me vaka sa vakamasuti kemudou na Kalou e na gusu i keitou: keitou nai sosomi kei Karisito, keitou sa vakamamasu, mo dou veivinakati kei na Kalou. 21O Koya sa sega vua na cala sa qisia ko koya mei soro ni nodai valavala ca; me vakayacori kina vei keda na veivakadonui ni Kalou e na vukuna.
Currently Selected:
2 KORINICA 5: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
