2 KORINICA 4
4
Sa tukuni koya ko Paula ni sa gumatua e na nona cakacaka, 16. Sa levu na ka rarawa sa vosota ko koya, a sa sega ni datuvu kina, 718.
1O koya ni sa soli vei keitou na cakacaka oqo, ka me vaka sa yaco vei keitou na loloma, keitou sa sega ni datuvu kina; 2ka keitou sa biuta na veika vuni e veivakamaduataki, a sa sega ni daulawaki na neitou i valavala, se keitou vakatanitaka na vosa ni Kalou; ia ni keitou sa tukuna na ka dina, keitou sa vakadonui keitou kina ki na lomadra na tamata kecega, e na mata ni Kalou. 3Ia kevaka sa vuni na neitou i tukutuku-vinaka, sa vuni tu kivei ira ga era sa rusa: 4vei ira sa vakamatabokotaka na lomadra na kalou ni vuravura oqo, era sa sega ni vakabauta, me kakua kina ni cilavi ira na rarama ni tukutuku-vinaka ni serau i Karisito, o koya ga na yaloyalo ni Kalou. 5Ni keitou sa sega ni vunautaki keitou, ko Jisu Karisito ga na Turaga; kei keitou na nomudou tamata e na vuku i Jisu. 6Ni sai koya na Kalou, o koya sa kaya eliu me cila mai na butobuto na rarama, sa cila mai ki na loma i keitou, me cila yani kina na serau ni Kalou, o koya sa vakatakilai rawa e na mata i Jisu Karisito.
7Ia sa waqa qele sa tu kina vei keitou nai yau oqo, me sa taka mai vua na Kalou na kaukauwa mana levu, ka me segai maivei keitou. 8Sa buku na druadrua, ia keitou sa sega ni drigiti; keitou sa lomaocaoca ga, ia keitou sa sega ni yalolailai; 9keitou sa vakacacani, ia keitou sa sega ni biu laivi; keitou sa vakabalei sobu, ia keitou sa sega ni vakarusai; 10keitou sa colata e na yago i keitou e na veisiga kecega na mate i Jisu, me vakaraitaki talega kina na bula i Jisu e na yago i keitou. 11Ni keitou sa soli tiko e na veisiga, koi keitou sa bula voli, me keitou mate e na vuku i Jisu, me vakaraitaki talega kina na bula i Jisu, e na yago i keitou sa mate rawa.
12A sa vakakina, sa daucakacaka vei keitou na mate, ia na bula ga vei kemudou. 13Ia ni sa tiko vei keitou na yalo vakabauta ko ya, me vaka na ka sa volai, Au sa vakabauta, o koya kau sa vosa kina; keitou sa vakabauta talega, o koya keitou sa vosa kina; 14ni da sa kila, o koya ka vakatura cake tale na Turaga ko Jisu ena vakaturi keitou cake vata talega kei Jisu, ka vakaraitaki keda kei kemudou. 15Ni sa yaco e na vukumudou na ka kecega me vakarokorokotaki vakalevu cake na Kalou e na loloma sa levu sara, ni sa vakavinavinaka ko ira na lewe vuqa.
16E na vuku ni ka oqo keitou sa sega ni datuvu kina; ia kevaka sa rusa mai na yagoda esau, sa vakavoui na tamata eloma e na veisiga kecega. 17Ia na noda rarawa mamada, sa dede vakalailai sara ga, sa vakayacora vei keda na serau levu sa uasivi cake vakalevu sara, ka tawa mudu, 18ni da sa sega ni vakananuma tiko na veika sa rairai mai, na veika ga sa sega ni rairai mai; ni sa dede vakalailai ga na veika sa rairai mai; ia sa sega ni mudu na veika sa sega ni rairai mai.
Currently Selected:
2 KORINICA 4: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
