2 KORINICA 6
6
Sa tukuna ko koya na veika e kilai kina ni sai talatala dina, 110. A sa doudou kina ni vosa vei ira ni sa lomani ira sara; a sa kaya me ra lomani koya vakakina; ka me ra vakatakila na nodra loloma, 1118.
1Ia koi keitou ni keitou sa cakacaka vata kaya, keitou sa cikevi kemudou mo dou kakua ni vakatawayagataka na loloma ni Kalou. 2(Ni sa kaya ko koya, Au a rogoci iko e na gauna ni vinakati, Ia e na gauna ni bula kau a vukei iko: raica, oqo na gauna ni vinakati; raica, na siga ni bula edaidai oqo.) 3Keitou sa sega ni vakatarabetaka e dua e na dua na ka, me kakua ni beitaki kina na cakacaka vakaitalatala: 4ia e na ka kecega keitou sa vakadinadina ni keitou sai talatala ni Kalou, e na dauvosota sara, e na ka rarawa, e na veivakasaurarataki, e na yaluma, 5e na vakanakuitataki, e na biu ki na veivale ni veivesu, e na ue, e na daucakacaka, e na dauyadra, e na daulolo; 6e nai valavala savasava, e na vuku, e na vosota vakadede, e na yalololoma, e na Yalo Tabu, e na loloma sa sega ni veivakaisini, 7e nai vakavuvuli dina, e na kaukauwa ni Kalou, e nai yaragi ni valavala dodonu e na liga i matau kei nai mawi, 8ni keitou sa vakarokorokotaki tiko se keitou sega ni dokai, ni keitou sa rogo vinaka tiko se rogo vakaca: ni keitou sa vaka na dauveivakacalai, ia keitou sa dina ga: 9sa vaka keitou sa sega ni kilai, ia ka sa kilai vinaka; sa vakataki ira sa mate, ia ka raica, keitou sa bula tiko; keitou sa vakataki ira sa cudruvi, ia ka sega ni vakamatei; 10keitou sa vaka keitou sa daurarawa, ia keitou sa reki tikoga; sa vaka keitou sa dravudravua, ia keitou sa vakavutuniyautaki ira na lewe vuqa; sa vaka ni sa sega vei keitou e dua na ka, ia ka sa tu vei keitou na ka kecega.
11Oi kemudou na kai Korinica, sa dalaga na gusu i keitou vei kemudou, sa vakalevutaki na yalo i keitou. 12Dou sa sega ni leqa e na vuku i keitou, dou sa leqa ga e na lomamudou. 13Ia me vakaisautaki na ka oqo, (au sa qai vosa me vaka vei ira na luvequ,) dou yalolevu talega koi kemudou.
14Dou kakua ni veitokani vata vakatani kei ira era sa sega ni vakabauta: sa veitokani vakaevei na yalododonu kei na tawa-yalododonu? se rau sa veiwekani vakaevei na rarama kei na butobuto? 15se rau sa veivinakati vakaevei na Karisito kei Piliali? se rau sa vakaitavi vata vakaevei ko koya sa vakabauta kei koya sa sega ni vakabauta? 16se rau na to vata vakaevei na vale ni Kalou kei na veimatakau? ni da sa vale ni Kalou bula; me vaka sa kaya na Kalou, Au na tiko e na lomadra, ka lako voli kina; ia kau na nodra Kalou, ka ra na noqu tamata. 17O koya oqo Mo dou qai lako tani maivei ira, ia dou tawasei tu, sa kaya na Turaga, Ka dou kakua ni tara na ka sa sega ni savasava; Au na qai vakabauti kemudou, 18Ia kau na yaco me Tamamudou, Ka dou na yaco me luvequ tagane kei na luvequ yalewa, sa kaya na Turaga Kaukauwa sara.
Currently Selected:
2 KORINICA 6: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
