2 KORINICA 3
3
Sa vakatakila ko koya ni sa sega ni dokai koya ni sa tubu na lotu e na vukuna, sa vakamolimoli ga kina vua na Kalou, 16. Sa qai vakatakila ni sa uasivi cake e na vunau i Mosese nai tukutuku-vinaka kei Jisu, 718.
1Keitou sa vakatekivu tale beka me tukuni keitou? se sa yaga beka vei keitou me keitou tukuni vei kemudou e nai vola eso, me vakataki ira eso, se me keitou tukuni vakakina maivei kemudou? 2Oi kemudou ga na neitou i vola sa volai e na loma i keitou, era sa kila ka wilika ko ira na tamata kecega; 3sa vakaraitaki ga ni dou sai vola i Karisito keitou sa cakava, sa sega ni volai e na wai ni volavola, sa volai ga e na Yalo ni Kalou bula; sa sega ga e na dela ni vatu, ia e na dela ni yalomudou sa malumu.
4Ia sa vakaoqo na neitou vakararavi vua na Kalou e na vuku i Karisito: 5ni keitou sa sega ni rawata vakai keitou me vakasamataka ni rawa vakai keitou e dua na ka; ia sa vu mai vua na Kalou ga na neitou kaukauwa; 6o koya sa vakarautaki keitou me keitou sai talatala ni veiyalayalati vou: a sa sega ni vaka sa volai, a ka vakayalo ga; ni sa ia na veivakamatei na ka sa volai, ka sa ia na veivakabulai na ka vakayalo.
7Ia kevaka sa yaco vata kei na serau na cakacaka sa ia kina na veivakamatei, sa volai ka ceuti e na vatu, a ra sa sega ni vakaraica rawa kina na mata i Mosese ko ira na luve i Isireli e na vuku ni serau ni matana, ia sa qai lako tani oqo: 8ena sega beka ni uasivi cake kina na serau ni cakacaka vakayalo? 9Io, kevaka sa dua na serau ni cakacaka ni cudruvi, ena uasivi cake vakalevu na serau ni cakacaka ni veivakadonui. 10Ia na ka ka serau, sa qai sega so na kena serau ni sa vakatauvatani kei na serau sa uasivi cake. 11Io, kevaka ka serau na ka sa biu tiko yani, ena dina vakalevu cake ni sa serau tiko na ka sa tu vakadua.
12Ia ni sa tu vei keitou nai nuinui vakaoqo, keitou sa qai vosa vakamacala sara: 13ia keitou sa sega ni vakataki Mosese ni sa ubia na matana e na pulou, me ra kakua ni vakaraica matua ko ira na luve i Isireli ki nai otioti ni ka sa biu tiko yani: 14ia ka sa vakalomaqataki na lomadra: ni sa tu ga na pulou ko ya ka yacova na siga oqo ni sa wili na veiyalayalati makawa, sa sega ga ni kau tani; ni sai Karisito sa kau tani kina na pulou oqo. 15Ia ka sa yacova na siga oqo, ni sa wili ko Mosese, sa tu ga e na lomadra na pulou. 16Ia ni na saumaki oqo vua na Turaga, ena qai kau tani na pulou. 17Ia na Turaga sai koya ga na Yalo Tabu; ia sa sereki ko koya, sa tu vua na Yalo ni Turaga. 18Ia koi keda kecega, ni sa sega ni tabonaki tiko na matada, eda sa raica na serau ni Turaga me vaka e nai iloilo, ka sa vakamataliataki me da vakataki koya, ni sa tubu cake tiko na serau me uasivi, me vaka e na Turaga o koya na Yalo Tabu.
Currently Selected:
2 KORINICA 3: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
