1 KORINICA 15
15
Eso na tamata sa vakatitiqataka na nodra tu cake tale na mate, a sa vakadinadina ko Paula ni sa tu cake tale ko Jisu, 119. Sa qai tukuna vinaka sara na tu cake tale mai na mate, a sa vakarota vei ira me ra gumatua e na vuku ni ka oqo, 2058.
1Ia kau sa vakatakila vei kemudou, na veiwekani, nai tukutuku-vinaka kau a vunautaka vei kemudou, o koya dou a vakabauta talega, dou sa tu dei talega kina; 2o koya talega dou sa bula kina, kevaka dou sa taura tiko na ka kau a vunautaka vei kemudou, kevaka sa sega ni ka walega na nomudou vakabauta. 3Niu a tukuna taumada vei kemudou na ka kau a rawata, ni sa mate na Karisito e na vuku ni nodai valavala ca me vaka nai Vola Tabu: 4ni sa bulu talega, ka ni sa tu cake talega e nai katolu ni siga me vaka nai Vola Tabu; 5ni sa rairai talega vei Kifa, vei ira emuri na le tinikarua; 6ka rairai emuri vei ira vata na veiwekani era lewe lima na drau ka vakacaca; e lewe vuqa vei ira era sa bula ka yacova na siga oqo, a sa moce tu eso. 7Sa rairai emuri ko koya vei Jemesa; sa qai rairai vei ira kecega nai apositolo. 8Sa rairai emuri sara vei au talega, me vaka vua e dua sa lutu dole. 9Niu sa uasivi sobu vei ira kecega nai apositolo, kau sa sega ni yaga meu vakatokai mei apositolo, niu a vakacacana nai soqosoqo lewe ni lotu ni Kalou. 10Ia na loloma ga ni Kalou kau sa yaco kina ki na noqu tiko edaidai: ia na nona lomani au sa sega ni tawa yaga; ia kau sa uasivi cake vei ira kecega e na cakacaka; ia ka sa sega ni koi au walega, na loloma ga ni Kalou sa tiko vei au. 11Ia kevaka koi au, se ko ira, keitou sa vunau vakakina, ia dou sa vakabauta talega vakakina.
12Ia kevaka sa vunautaki na Karisito ni sa vakaturi cake tale mai na mate, era sa kaya vakacava eso vei kemudou ni sa sega na tu cake tale mai na mate? 13Ia kevaka sa sega ni tu cake tale ko ira na mate, sa qai sega ni tu cake tale mai na Karisito: 14ia kevaka sa sega ni tu cake tale mai na Karisito, sa qai ka walega na neitou vunau, a ka wale talega na nomudou vakabauta. 15Ia keitou sa kune kina me daulasulasu ni keitou sa tukuna na Kalou; ni keitou sa tukuni koya na Kalou ni sa vakaturi Karisito cake mai; ia ka sa sega ni vakaturi koya cake tale, kevaka sa sega ni tu cake tale ko ira na mate. 16Io, kevaka sa sega ni tu cake tale ko ira na mate, sa qai sega ni vakaturi cake tale na Karisito: 17ia kevaka sa sega ni vakaturi cake tale na Karisito, sa sega ni yaga na nomudou vakabauta; sa tu vei kemudou edaidai na nomudou i valavala ca: 18era sa rusa talega ko ira era sa nei Karisito, ka sa moce tu. 19Kevaka eda sa vakanuinui me yaga vei keda na Karisito e na bula ga oqo, eda sa qai vakaloloma vakalevu cake vei ira kecega na tamata.
20Ia ka sa qai tu cake tale mai na mate na Karisito, a sa yaco me kedrai sevu era sa moce tu. 21Ni sa qai vu ni mate na tamata, sa qai vu ni tu cake tale mai na mate na tamata talega. 22Ni sa qai mate kecega e na vuku i Atama, ena vakabulai kece talega e na vuku i Karisito. 23Ia na tamata yadua me vaka sa lesi vua: na Karisito nai sevu; ka qai muri ko ira era sa nei Karisito, ni sa lako tale mai ko koya. 24Sa qai muri na kenai vakataotioti, ni sa solia ko koya na lewa vua na Kalou, ko Tamana; ni sa vakaotia ko koya na lewa kecega kei na veitalia kecega, kei na kaukauwa. 25Sa na lewa tikoga ko koya me vakamalumalumutaki sobu mada na meca kecega e ruku ni yavana.
26Na meca ena vakaoti emuri sara ko mate.
27Ni sa vakamalumalumutaka na ka kecega ko koya e ruku ni yavana. Ia ni sa kainaki sa vakamalumalumutaki na ka kecega, sa macala sara sa sega ni cavuti ko koya sa vakamalumalumutaka vua na ka kecega. 28Ia ni sa vakamalumalumutaki oti vua na ka kecega, ena qai vakamalumalumutaki talega na Luvena vei koya sa vakamalumalumutaka na ka kecega vei koya, me sa lewa duaduaga na Kalou e na ka kecega.
29Kevaka sa sega ni vakaoqo, era na vakaevei ko ira sa papitaisotaki e na vukudra na mate? kevaka sa sega sara ni tu cake tale ko ira na mate, a cava era sa papitaisotaki kina e na vukudra na mate? 30Ka cava me keitou bolea talega kina na mate e na tiki-ni-siga kecega? 31Au sa tukuna dina sara na noqu rekitaki kemudou na veiwekani e na vuku i Karisito Jisu na noda Turaga, au sa mate tiko e na veisiga. 32Kevaka sa vakatamata ga na noqu veivala kei na manumanu daukata mai Efeso, a cava na betena vei au? kevaka sa sega ni tu cake tale ko ira na mate, me da kana ga ka gunu, ni da na mate ni mataka. 33Dou kakua ni vakaisini kemudou vakataki kemudou: sa vakacala nai valavala vinaka na dautiko vata kei ira era sa ca. 34Dou yadra mai me vaka sa dodonu, ka mo dou kakua ni valavala ca; ni sa tiko eso era sa sega ni kila na Kalou; au sa vosa vakaoqo mo dou madua kina.
35Ia ena kaya e dua, Ena vakaturi cake tale vakaevei ko ira na mate? ia na yago cava era na lako kaya mai? 36O iko ko sa sega ni vuku, na ka ko sa tea sa sega ni bula cake, kevaka sa sega mada ni mate: 37ia na ka ko sa tea, ko sa sega ni tea na yago ena tubu cake mai, a sila walega, se witi beka, se dua na sila tani: 38ka sa solia na yagona na Kalou me vaka sa vinaka vua, ki na sila yadua na yagona vakai koya. 39Sa sega ni tautauvata na lewe ni ka kecega: sa dua na lewe ni tamata, ka dua tani na lewe ni manumanu e yavai va, ka dua tani na lewe ni ika, ka dua tani na lewe ni manumanu vuka. 40Sa vakalomalagi na yago eso, ka sa vakavuravura na yago eso; ka sa dua tani nai ukuuku ni yago vakalomalagi, ka sa dua tani nai ukuuku ni yago sa vakavuravura. 41Sa dua tani nai ukuuku ni mata-ni-siga, ka sa dua tani nai ukuuku ni vula, ka sa dua tani nai ukuuku ni veikalokalo: ni sa uasivi cake na serau ni kalokalo e dua e na kena serau na kalokalo e dua tani.
42Sa vaka talega kina na tu cake tale mai na mate. Ni sa tei, sa vuca; ni sa vakaturi cake tale, sa sega ni vuca: 43ni sa tei, sa vakasisilataki; ni sa vakaturi cake tale, sa vakaiukuukutaki: ni sa tei, sa malumalumu; ni sa vakaturi cake tale sa kaukauwa: 44ni sa tei, sa yago dina ni tamata; ni sa vakaturi cake tale, sa qai yago vakayalo. Kevaka sa dua na yago sa vaka na bula vakatamata, sa dua talega na yago sa vaka na bula vakayalo. 45Me vaka na ka sa volai, Ko Atama sa taumada sa caka me tamata bula; Ko Atama sa muri, sa caka me yalo sa vu ni bula. 46Ia ka sa sega ni taumada ko ya sa vakayalo, ko ya ga sa bula vakatamata; ka sa qai muri na ka sa vaka na bula vakayalo. 47Na tamata sa taumada sa mai vuravura, ka sa vakavuravura; ia sa mai lomalagi na tamata sa kenai karua, na Turaga. 48Sa ra vakataki koya sa vakavuravura ko ira era sa vakavuravura: sa ra vakataki koya talega sa vakalomalagi ko ira era sa vakalomalagi. 49Ia me vaka ni da sa vakataki koya sa vakavuravura, eda na vakataki koya talega sa vakalomalagi.
50Ia kau sa kaya oqo, oi kemudou na veiwekani, ni sa dredre ni rawata na matanitu ni Kalou na yago sa vakalewe ka vakadra; ena sega talega ni yaco me tawa vuca rawa na ka sa vuca rawarawa. 51Raica, au sa vakatakila vei kemudou e dua na ka vuni: Eda na sega ni moce kece, ia eda na vakamataliataki kecega, 52ena vakasauri sara, ena vaka na sauriva ni matada, ni sa uvu na davui sa muri sara: ena uvuci na davui, ena qai vakaturi cake tale ko ira na mate me sega ni vuca tale, ia koi keda eda na vakamataliataki talega. 53Sa na vakaisulu na yago vuca oqo me kakua tale ni vuca rawa, ka sa na vakaisulu na yago sa mate oqo me kakua tale ni mate rawa.
54Ia ni sa vakaisulu oti na yago vuca oqo me kakua tale ni vuca rawa, ka sa vakaisulu oti na yago mate oqo me kakua tale ni mate rawa, ena qai vakayacori kina na vosa sa volai, Sa gu ce ko mate, a sa muduki sara. 55Ko iko mate, sa evei na nomu bati gaga? Ko iko bulubulu, sa evei na nomu gumatua? 56Sa kena bati gaga ni mate nai valavala ca: ka sa kena kaukauwa ni valavala ca na vunau. 57Ia me da vakavinavinaka vua na Kalou, o koya sa solia vei keda me da gumatua sara e na vuku ni noda Turaga ko Jisu Karisito. 58O koya ga oqo, oi kemudou na wekaqu lomani, mo dou qai tu dei sara, mo dou kakua ni yavala, mo dou uasivi cake e na cakacaka ni Turaga e na gauna kecega, ni dou sa kila sa sega ni ka walega na nomudou cakacaka e na vuku ni Turaga.
Currently Selected:
1 KORINICA 15: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
