1 KORINICA 14
14
Sa tukuna ko koya ni sa takiveiyaga nai solisoli kecega ni Yalo Tabu, a sa uasivi cake nai solisoli eda yaga kina vei ira na tamata, 15. Me kakua ni vosataki e nai soqosoqo lewe ni lotu na ka sa sega ni kilai na kenai balebale, 633. Sa tabu ni vunau ko ira na yalewa, 3440.
1Dou vakasaqara na loloma: dou gadreva talega na veika vakayalo, ka vakalevu mo dou parofisai. 2Ia ko koya sa vosa e na dua na vosa tani, sa sega ni vosa vei ira na tamata, vua ga na Kalou; ni sa sega e dua sa kila; a sa cavuta ko koya na veika e vuni e na lomana. 3Ia ko koya sa parofisai sa vosa vei ira na tamata me vakatataki ira, ka vakatavulici ira, ka vakacegui ira. 4Ko koya sa vosa e na dua na vosa tani, sa vakatataki koya ga; ia ko koya sa parofisai, sa vakatataki ira nai soqosoqo lewe ni lotu. 5Ia kau sa vinakata mo dou vosa kecega e na vosa tani e vuqa, ka vakalevu cake mo dou parofisai; ni sa uasivi cake ko koya sa parofisai vei koya sa vosa e na vosa tani e vuqa, kevaka sa sega ni vakatakila na kenai balebale ko koya, me vakatataki kina ko ira nai soqosoqo lewe ni lotu.
6Ia sa vakakina, na veiwekani, kevaka kau sa lako vei kemudou ka dauvosa e na vosa tani e vuqa, au na yaga vakacava vei kemudou, kevaka kau sa sega ni vosa talega vei kemudou e nai vakatakilakila, se e na vuku, se e na parofisai, se e nai vakavuvuli? 7Ia na veika sa sega ni bula ka sa daurorogo, se na bitu-ni-vakatagi se na api, kevaka sa sega ni duidui na kena rorogo, ena kilai vakaevei se sa cava nai balebale ni ka sa laga e na bitu-ni-vakatagi se na api? 8Ia kevaka ena rorogo na davui-ni-valu ka sega ni kilai na kena rorogo, o cei ena vakarautaki koya me laki valu? 9Sa vakakina koi kemudou, kevaka dou sa sega ni cavuta na vosa sa kilai rawa, ena kilai vakaevei na ka sa vosataki? dou na vosa walega ki na cagi. 10E dina beka, ni sa vuqa na vosa sa duidui e vuravura, a sa sega e dua sa sega ni vakaibalebale. 11Ia kevaka kau sa sega ni kila nai balebale ni vosa, au na kai tani vua sa vosa, ena kai tani talega vei au ko koya sa vosa.
12Sa vakakina koi kemudou, ni dou sa gadreva na veika vakayalo, dou vakasaqara talega mo dou uasivi cake e na ka sa vakatataki kina ko ira nai soqosoqo lewe ni lotu. 13Ia ko koya sa vosa e na dua na vosa tani, me masu talega me vakatakila rawa na kenai balebale. 14Io, kevaka kau sa masu e na dua na vosa tani, sa masu na yaloqu ga, ka sa sega ni vakavuana na noqu nanuma. 15Sa qai vakaevei? au na masu e na yaloqu, au na masu e na noqu kila talega; au na sere e na yaloqu, au na sere e na noqu kila talega. 16Kevaka sa sega ni vakakina, ni ko sa vakavinavinaka e na yalomu ga, ena vakaemeni vakaevei e na nomu vakavinavinaka ko koya sa tiko e na nodra tikina na tamata sa sega ni vuku, ni sa sega ni kila na ka ko sa kaya? 17Sa dina ga ko sa vakavinavinaka vakadodonu, ia sa sega ni vakatataki kina ko koya. 18Au sa vakavinavinaka vua na Kalou, niu sa uasivi cake vei kemudou kecega e na vosataka na vosa tani e vuqa: 19ia kau sa vinakata vakalevu meu vosataka e na noqu kila e lima walega na vosa e na kedra maliwa nai soqosoqo lewe ni lotu, meu vakavulici ira talega kina na tani, ia kau cata meu cavuta na vosa e tini na udolu e na vosa tani.
20Oi kemudou na veiwekani, dou kakua ni gone lalai e na vuku; e na lomaca ga mo dou gone lalai, ia e na vuku mo dou tamata bula. 21Sa volai e na vunau, Au na vosa vei ira na tamata oqo e na gusu ni kai tani, kei na tebenigusu ni vulagi; ia ni sa vakakina era na qai sega ni rogoci au, sa kaya na Turaga. 22O koya oqo sai vakatakilakila vei ira sa sega ni vakabauta na vosa tani e vuqa, ia ka sa sega vei ira sa vakabauta; ia na parofisai sa sega ni ka vei ira sa sega ni vakabauta, vei ira ga sa vakabauta. 23Ia kevaka sa soqoni vata e na dua na yasana nai soqosoqo lewe ni lotu taucoko, a ra sa dui vosa kecega e na vosa e vuqa, a sa lako mai eso sa sega ni vuku, se ra sega ni vakabauta, era na sega li ni kaya dou sa lialia? 24Ia kevaka era sa parofisai kecega, a sa lako mai e dua sa sega ni vakabauta, se sa sega ni vuku, sa vakacalai kina ko koya vei ira kecega, sa lewai ko koya vei ira kecega: 25ka sa vakaraitaki vakaoqo na veika e vuni e na yalona; ena cuva vakatoboicu ko koya, ka masu vua na Kalou, ka na tukuna ni sa dina sa tiko vei kemudou na Kalou.
26Sa qai vakaevei, kemudou na veiwekani? ni dou sa soqoni vata, dou sa dui taura yadua na sere, ai vakavuvuli, ai vakatakilakila, a vosa tani, na lave vosa. Me caka na ka kecega mo dou vakatataki kina. 27Kevaka e dua sa vosa e na vosa tani, me lewe rua, se lewe tolu ga, me ra veitaravi yadua ga; ia me dua e lave vosa. 28Ia kevaka sa sega e dua me lave vosa, me galu ga e nai soqosoqo lewe ni lotu; me vosa vei koya ga vakai koya, vua talega na Kalou. 29Ia me lewe rua se lewe tolu na parofita me vosa, ka me lewa ga ko ira sa vo. 30Ia kevaka sa vakatakilai e dua na ka vua e dua sa tiko voleka, me galu mada ko koya sa liu. 31Ni sa rawa mo dou parofisai kecega, ia dou ia yadua ga, me vakatavulici kecega, ka vakacegui kecega. 32Ia sa dui rawa na yalo ni parofita ko ira na parofita. 33Ni sa sega ni vu ni veisei na Kalou, sa vu ni vakacegu ga, me vaka sa yaco e na nodra i soqosoqo kecega era sa lotu.
34Me ra galu ga ko ira na nomudou yalewa e na veisoqosoqo lewe ni lotu: ni sa sega ni tara vei ira me ra vosa; ia me ra yalomalumalumu ga, me vaka na vosa ni vunau. 35Ia kevaka era sa via kila e dua na ka, me ra dui taroga na watina mai nodratou; ni sa ka ni veivakamaduataki me ra vosa na yalewa e nai soqosoqo lewe ni lotu. 36Koi kemudou beka sa taka maikina na vosa ni Kalou? se sa yaco vei kemudou duaduaga?
37Kevaka e dua sa nanumi koya ni sa parofita, se tamata vakayalo, me kila mada ni sai vakaro ni Turaga na veika kau sa vola vei kemudou. 38Ia kevaka e dua sa sega ni kila, ia me kakua ga ni kila. 39O koya oqo, na veiwekani, mo dou qai gadreva mo dou parofisai, kakua talega ni tarova na vosataka na vosa tani e vuqa. 40Ia me caka me rairai vinaka na ka kecega, ka vakadodonu talega.
Currently Selected:
1 KORINICA 14: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
