1 KORINICA 16
16
Sa vakarota vei ira ko koya me ra ia na soli vei ira na tamata lotu mai Jutia, era sa dravudravua, 19. Sa tukuni Timoci vei ira, a sa vakavulici ira, ka sa qai tinia na nonai vola, 1024.
1Ia e na vuku ni soli me nodra era sa lotu, me vaka kau sa vakarota vei ira na veisoqosoqo lewe ni lotu mai Kalatia dou kitaka vakakina koi kemudou talega. 2E nai matai ni siga ni wiki, mo dou dui tugana nai yau eso me tu, me vaka sa vakalougatataki kina ko koya, me kakua kina ni caka na soli ni kau sa lako yani. 3Ia ni kau sa tadu yani, o iratou dou na vinakata kau na talai iratou me ratou kauta nai vola eso kei na nomudou i loloma talega ki Jerusalemi. 4Ia kevaka sa yaga meu lako talega koi au, eratou na lako vata kei au.
5Ia kau na lako vei kemudou, niu sa lakovi Masitonia: ni kau na lakovi Masitonia. 6Ia kau na tiko beka vei kemudou, io, kau na tiko beka kei kemudou e na veivula i liliwa, mo dou kauti au kina e na noqu lako tu ki na vanua kau na lako kina. 7Niu sa sega ni via tiko vei kemudou e na noqu lako tu oqo; ia kau sa nakita meu tikotiko mada kei kemudou, kevaka sa vinakata na Turaga. 8Ia kau na tiko ga mai Efeso me yaco mada na siga ni Penitiko. 9Ni sa dola tu vei au na katuba levu ka yaga, a ra sa lewe vuqa talega na dauveivorati.
10Ia kevaka sa tadu ko Timoci, dou raica me tiko tawa rere vei kemudou; ni sa kitaka ko koya na cakacaka ni Turaga, me vakataki au talega. 11O koya me kakua kina na tamata me beci koya: ia mo dou kauti koya e na nona lako tu e na vakacegu, me lako mai kina vei au: niu sa waraki koya kei iratou na veiwekani. 12Ia e na vuku i Apolosa na wekada, au sa masuti koya vakalevu me lako yani vei kemudou kei iratou na veiwekani: a sa sega sara ni lomana me lako vei kemudou e na gauna oqo; ia ni dua na gauna vinaka vua, ena qai lako yani.
13Dou vakatawa, dou tu dei e na vakabauta, dou tamata qaqa, dou gumatua. 14Me caka na ka kecega dou cakava e na yalololoma.
15Ia kau sa masuti kemudou, na veiwekani, (dou sa kila na lewe ni vale i Sitifana, ni sai sevu mai Akaia, a ratou sa soli iratou me ratou qaravi ira era sa lotu:) 16mo dou vakamalumalumutaki kemudou vei ira sa vakaoqo, vei ira yadua talega era sa veivuke, ka daucakacaka. 17Ia kau sa reki e na nodratou lako mai ko Sitifana kei Forituneto kei Akaiko: ni ratou sa cakava na ka sa sega ni rawa vei kemudou. 18Ni ratou sa vakaceguya na yaloqu kei na yalomudou talega; o koya mo dou qai kilai ira era sa vakaoqo. 19Sa loloma yani vei kemudou na veisoqosoqo lewe ni lotu mai Esia. Sa loloma vakalevu yani vei kemudou ko Akuila kei Pirisila e na Turaga, kei ira nai soqosoqo lewe ni lotu e na nodrau vale. 20Era sa loloma yani vei kemudou na veiwekani kecega. Dou dui veireguci yadua vakai kemudou e na yalosavasava.
21Oi au ko Paula, au sa vola e na ligaqu dina na noqu loloma yani. 22Kevaka sa dua sa sega ni lomana na Turaga ko Jisu Karisito, me cudruvi ko koya. Sa lako mai na Turaga. 23Me tiko kei kemudou na loloma ni Turaga ko Jisu Karisito. 24Me tiko kei kemudou kecega na noqu loloma e na vuku i Karisito Jisu. Emeni.
Currently Selected:
1 KORINICA 16: FOV
Highlight
Share
Compare
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
