Azaya 49
49
Eezuɛ ƃa ǹɔii-ŋai díkwaa ponoɔɔi
1Káai a ǹɔii-ŋuŋ su kôya-koya-ŋai su-ƃelai ŋ̀einiɛi gwaa kéleei, ka káwoli tɔ́ɔ ḿâ.
Dílɛɛ pâi ḿaa sɔlɔ ƃôi,
Yâwɛɛ è ńzìɣe zu é ŋ́gɛ a ŋɔtíi kɛ́ nuu.
2È ŋ́gbɛ̀tɛ, é ḿaa kɔ̃ɔ é gɛ́ ŋ́oo ŋá liɛɛ yɛ̂ɛ ƃóa-sɔ̂kpɔ.
È ḿɛi pɛ̂lɛ a ǹyée é ḿaa kɔ̃ɔ.
È ŋ́gɛ̀ yɛ̂ɛ tɔ̃a ŋá-seneɛɛ,
ŋ́gbɛtɛɛ tíi kɛ́ mɛni ma.
3È m̀o ḿâ ǹyɛɛi, “Eezuɛ, yá ƃa ŋátii kɛ́-nuui.
Ísârai ƃé nûa da pâi ŋákɛtɛ-laai kɔ́lɔnîi la.”
4Ŋá m̀o ńyɛ̃ɛi, “Ŋaâ tíi kɛ́ kpɔ́ a ŋ̀ánaa fé sɛŋ da sɔlɔ ƃó ní zu.
Ŋaâ kôlo nɔ́ kpɛ́ni-kpɛni.”
Kɛ́lɛ ńâai a Ŋáɣâlai Yâwɛɛ.
A pâi ḿaa kɔ̃ɔ̂i, é ḿvela fé díi mɛni ma ŋa gɛ̂i.
5Yâwɛɛ è ńzìɣe zu a gɛ́ɛ ŋá kɛ́ a ŋɔtíi kɛ́-nuu dílɛɛ pâi ḿaa sɔlɔ ƃôi.
È gɛ̀ tí a gɛ́ɛ ŋá pá a ŋɔnûai Eezuɛ-ŋai pôlu gono-têe lɔii ma.
Yâwɛɛ a ƃaa kɛ́ maa tɛɛ ḿbɔ.
Ǹyaa ƃa kponoi kpânaŋ tɛ̀ɛ ḿbɔ.
6Yâwɛɛ è m̀o ǹyɛɛi,
“Ŋátii kɛ́-nuui, tíi kpânaŋ káa ńyêei ímɛni ma.
Vé nɔ́ a gɛɛ ípa a ŋɔnûai Eezuɛ-ŋai pôlu nyii-ŋai kùla gɔ́i zui,
kɛ́lɛ ŋa pâi íkɛ̂i a kwaa ponóɔɔ ŋ̀éniɛi gwaa kélee mɛni ma.
Ŋ̀éniɛi su-ƃelai kélee da pâi ŋuŋ ma sɔlɔ ƃôi ísârai.”
7M̀ɛnii ŋí Yâwɛɛ, Eezuɛ ŋuŋ ma ƃó Ɣala Maa Waai,
è mò ŋɔtíi kɛ́-nuui ma.
Lɔii-ŋuŋ-ŋa su-ƃela dí díyee kùla ǹúui ŋí mu, dí tɔ́ɔ m̀a,
gɛ́ ƃò a ǹúu láa túɛ-ƃelai yée mu nuu.
È mò m̀a ǹyɛɛi, “Kâloŋ-ŋa da pâi íkâai íŋuŋ ma ƃóɔɔ,
dí ŋumɛ mâa tɛɛ ípɔ.
Ǹúu láa túɛ-ƃelai da pâi íkâai dí tóo íkɔɔ mu,
dí ƃaa kɛ́ maa tɛ́ɛ ípɔ.”
A pâi kɛ̂i tí, kpɛ́ni fêi, Eezuɛ Ŋɔɣâla Maa Waa tɔnɔi,
a ziɣe zu a gɛ́ɛ é kɛ́ a ŋɔtíi kɛ́-nuu.
Yâwɛɛ a pâi liî a ŋɔnûai pôlu dípɔ-taai
8Yâwɛɛ è m̀o ŋɔnûai dîa ǹyɛɛi,
“Káŋuŋ ma ƃó ɣelei a seri, ŋa pâi káŋuŋ ma ƃôi.
Ŋa pâi káŋɛi malôŋ kâai,
ŋá ŋ́oli tɔ́ɔ káwɔlɔ-wooi ma ŋá kpɔ́ŋ kâa.
Ŋa pâi kámaa kɔ̃ɔ̂i, ŋá kámaa kpɛ́ pere sîi kélee su.
Ŋa pâi gɛ̂i tí, kpɛ́ni fêi, ŋá ŋ́gono tèe káyêei.
Ŋa pâi liî a káa pôlu kálɔii ma
nyíi ǹaa è wɔ́lɔ lɛ̀ɛ a vóloi.
9Ŋa pâi m̀ôi diai dîa díkaa kpini-pɛ̂rɛ mu ńyɛ̂ɛ dîai, ‘Kaŋuŋ ma a ƃó.’
Diai díkaa kpínii ńyɛ̂ɛ dîai, ‘Ka kúla gbínii su ká lí kâa.’
Da pâi kɛ̂i yɛ̂ɛ ƃála-ŋa ƃé yée ma kala ŋûnu ŋá dí kɛ́ dílaa mìi.
10Puru da kpele wɛ̂li fé pâi wɔ́lɔ dípaâi.
Dífe pâi wɔ́lɔ kɛ̂i vɛ̃ɛ-kpâlaŋ su fólo kɛ́ dí kêreŋ.
A pâi kɛ̂i tí, kpɛ́ni fêi, dílaa túɛ nuui a pâi kɛ̂i a díwɛliɛɛ.
A pâi liî a dia ya-ɣɛ̂li pɛlɛɛ-ŋa ma.
11“Ŋa pâi pere lá ƃôi ŋánûai dîɛ yée-ŋa su,
ŋá ǹaa kpɛtɛ a gɛ́ɛ dí tɛ́ɛ naa.
12Ŋánûai da pâi kulâi kwaa kôya-ŋa ma.
Da-ŋa da pâi kulâi yá-ŋûa pere, da-ŋa dí kúla vóloi liî-pere,
da-ŋa dí kúla Asiwaŋ taa-leei su nyii gáa séɣai-pere.”
13Ɣele-kɔ̂lɔŋ-ŋa, ka wule tóo!
Lɔii, ye láɣi ɣelêi pere a lii-nɛ̃ɛ pere.
Yée-ŋa, káa máŋ ka lii-nɛ̃ɛ wule-ŋa too ɣelêi-pere.
Yâwɛɛ a ŋɔnûai ŋá-nɛnɛ.
Diai mɔ̃lɛ̂i a pâi díŋɛi malôŋ kâai.
14Kɛ́lɛ Zerusâlɛŋ-ƃelai dí m̀o dîyɛɛi,
“Yâwɛɛ a ǹyée kúla kúmu,
a nìa kûa.”
15Nya ƃe Yâwɛɛ è díwoo su tòo ǹyɛɛ dîai,
“Lóŋ-lee da a ǹîa ǹóŋ ma nyii è ŋíni tòo ǹái?
À kɛ̀ kpîŋ nɛnî da a pɔ̂ri gɛ̂i tí a ǹóŋ,
fé pâi gɛ̂i tí a káa.
16Zerusâlɛŋ, fé pâi wɔ́lɔ ńyee kulâi ímu.
Ŋa ílaa pɔ̃yɛ ńyee-lîi.
17“Da pâi ítɔɔ̂i pôlu a ɣele kûu kpɛ́-kpɛ̂ɛ tɛɛ pôlu ma ílɛlɛ é tɛ́ɛ berei ma íkɛ̀ la a bɔlɔi.
Diai tɔ̀ɔ yâi, da pâi pûi.
18Íŋɛi láa í m̀ɛnii káa kɛ̂i íkɔlɛ mai!
Ínûai da díŋaa tɛ́ ma da pâi a ípɔ-taai pere.
Tãi nɔ́ ŋ́gaa la a gɛ̀ ɣele-ma Ɣalai,
ŋa pâi gɛ̂i ínûai maa mɛni é íŋɛi kúla,
yɛ̂ɛ berei ǹɛnîi da pá dɛɛ̂i surɔ̂ŋ pɔ́i, m̀aa ɣiri-sã̂a da ŋ̀ɛ́i kùla lai.
19“Kálɔii su a kara a lɛɛ a lɔii pûŋ.
Kɛ́lɛ ǹaa a pâi kɛ̂i a guro-té ǹûai mɛ̂ni ma pâi kɛ̂i naai.
Diai ǹaa su-karai,
da pâi pûi.
20Ílônii nyii-ŋai í dímaa sɔlɔ ƃô gɔ-sôŋ laai sui,
da pâi m̀ôi yâ a ɣele tɔ̂nɔ da dîyɛɛi,
‘Ǹɔii ŋí kuro-têi kúmaa mɛ̂ni ma.
Kwa wɛ̂lii a lɔii ŋáa-waa!’
21Gɛ̀ ní ya pâi m̀ôi ílii su pere yɛ̂ɛi,
‘Gbɛ̂ɛ ƃé ǹîa-pɛlɛɛi ŋí maa sɔlɔ ƃô mîi?
Ŋánîa-pɛlɛɛi kélee ŋuŋ lá è pìli, da fé ŋɔ́nɔ kɛ́ ní naa.
Ŋá kɛ̀ kɔ-sôŋ laai lɔii-ŋuŋ su kôya su.
Gbɛ̂ɛ ƃé pà a ǹîa-pɛlɛɛi ŋí?
Ŋánîa-pɛlɛɛi kélee maa mɛ̂ni è pìli zu.
Ńyãa tɔnɔ nɔ́ ŋa lɛɛ ɣéniɛ.
Mí ƃé ǹîa-pɛlɛɛi ŋí dí kùla naai?’ ”
22Ǹuu-namui Yâwɛɛ ǹyɛɛi,
“Ŋa pâi ŋɛi kɛ́-maa sîi-ŋa lɛ̂i ǹɔii-ŋûŋ-ŋai dîa.
À kɛ̀ tí, da pâi pâi a kánîa-pɛlɛɛi pôlu dípɔ-taai.
23Kâloŋ-ŋa da pâi káŋa kɔnîi yɛ̂ɛ kánâŋ-ni.
Dínɛyâai dí kámɛi káa yɛ̂ɛ kálee-ni.
Da pâi pîlanii díŋume ŋá kákɔɔ mu,
dí ƃaa kɛ́-maa tɛ́ɛ kápɔ.
À kɛ̀ tí, ka pâi gɔ́lɔnîi a gɛ́ɛ ńyãa ƃa Yâwɛɛ.
Ka kákili tɔ̀ɔ ḿâ, ŋumɛ fé pâi kápaâi.”
24Ka pɔ̂ri kɔ-kuluƃa ŋɔtoo-maa sɛŋ kulâi ǹyêei?
Kpaa máŋ ká pɔ̂ri kɔ-sôŋ kulâi kâloŋ wála-walaa yêei?
25Yâwɛɛ a m̀arê kɛ̂ɛ-ŋai ŋí su-kula a tɔ̃yâ woo-ŋa ǹyɛɛi,
“M̀ɛni-ŋai ŋí ƃé pâi kɛ́ tí-ti ƃôi.
Da pâi gɔ-kûluƃai ŋɔkɔ-sôŋ-ŋai kulâi ǹyêei,
dí gâloŋ wála-walaai ŋɔtoo maa sãai kélee kúla ǹyêei.
Ŋa pâi kɔ̂i diai kélee pɔ́ pâi kɔ̂i kápɔi,
ŋá kálônii ŋuŋ ma ƃó.
26Ŋa pâi gɛ̂i kákpɔara-ƃelai dí díkîe ni paa.
Da pâi kɛ̂i díkîe ni ŋãa kpelêi gɛ́ díkɛ̀ yɛ̂ɛ ŋwã̂ai.
À kɛ̀ tí, ǹûai kélee da pâi gɔ́lɔnîi a gɛ́ɛ ńyãa Yâwɛɛ,
káƃalo-nuui da káŋuŋ ma ƃó-nuui,
Eezuɛ ŋɔwála-wala Ɣala tɔnɔi.”
Currently Selected:
Azaya 49: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
