Azaya 48
48
Ɣâla Yâwɛɛ ƃa tínaa tuɛ-pere mɛnii
1Káai a Eezuɛ-ŋai kùla Zuda ŋɔsuui sui,
ka káwoli tɔ́ɔ ḿâ.
Ká káfòo a Yâwɛɛ láa a gɛ́ɛ
Eezuɛ Ŋɔɣâlai ǹyaa tɔnɔ nɔ́ ƃé ka pâi kɛ̂i vɛlîi.
Kɛ́lɛ ka lɛ́ɛ kɛ̂i.
2Ka m̀ôi a yoŋka pere a gɛ́ɛ
Zerusalɛɛŋ taa-lee maa waai su lonii ƃa káa.
Kákili tɔɔ̂i Eezuɛ Ŋɔɣâlai Yâwɛɛ ma.
Ǹáa ƃa Ŋ̀wála-wâla kélee Yâwɛɛ.
3Kɛ́lɛ Yâwɛɛ a m̀ôi kâa ǹyɛɛi,
“M̀ɛnii ŋa gɛ̂i, ŋá wɔ́lɔ m̀ó a tãi su kôyaa.
Ǹyaŋ gélee è a m̀aa félaa.
4Ŋá kɛ̀ a gɔ́lɔŋɔɔ a gɛ́ɛ kákaa a wolii kpɔ̂lɔ-ƃela.
Káŋuŋ su kpanaŋɔɔ̂i yɛ̂ɛ kɔli da ƃara.
5M̀ɛni-ŋai kélee kɛ̂i lônii mai, ŋa wɔ́lɔ
dímaa mɛni ƃó kâa.
Ŋá gɛ̀ tí a gɛ́ɛ káfa la m̀ó la
a gɛ́ɛ kákpɛtɛ ɣâla-ŋai ƃé gɛ̂i díkɛ kɛ̀.
6“M̀ɛni-ŋai ŋá m̀o a gɛ́ɛ da pâi kɛ̂i, da kɛ̂.
Káa kpîŋ kákaa a maa sêre-ŋa.
M̀ɛni-ŋai pâi kɛ̂i ŋa pâi m̀ôi kâa.
Fé niî fúlɔi da maa kili ŋa pono tɛ̀ɛ ní káta pɔ́.
7Da pâi kɛ̂i lônii ma.
Díkaa a m̀ɛni-ŋai da fé tá kɛ́ ní a bɔlɔ.
Dîi pà kɛ̂i, kâi m̀ôi a gɛ́ɛ ká mɛni da kɔ́lɔŋ é pîlaŋ dîa.
8Fé kákili ŋá pono ní da mɛni su naa túɛ, kpɛ́ni fêi, fé láa ní a káa.
Kákaa a tɔɔ-ma-ƃela é síɣe kámaa sɔlɔ ƃó tãi ma.
M̀ɛnii ŋí ƃé gɛ̀ fé maa kili-ŋa pono tɛɛ ní la kápɔ,
a gɛɛ ká táre zu.
9“Ŋà pâi ńii maa sônii ńaai maa mɛni ma.
Fé pâi kásu karâi.
Ŋa pâi gɛ̂i tí a gɛ́ɛ ká ńaa maa tɛ́.
10Ŋaâ kásu kɔ̀ɔŋ a mɛni kpɔ̂lu ŋánaa,
ŋa kámaa kpɛ́ɛ yɛ̂ɛ núu a káne seɣeŋ a gbó kula ma,
kɛ́lɛ fé mɛni lɛ́lɛɛ da kélee káa ní kákponôi
11M̀ɛni-ŋai ŋa gɛ̂i, ŋa gɛ̂i ńaai mɛni ma.
Fé pâi ǹɛɛ̂i naa ƃâa é kúla ḿâ.
Fé pâi ǹɛɛ̂i naa kwa núu da kú kpɔ́ŋ ŋáfolo-laai ma.
Ŋáfolo-laai káa nɔ́ a ńyãa tɔnɔ ḿbɔɔ.”
Yâwɛɛ è Sarɔ sìɣe a ŋɔtíi kɛ́-nuu kɛ́tɛ
12Yâwɛɛ è mò ǹyɛɛi,
“Káai a Eezuɛ lonii, Zeeka ŋɔsuui su-ƃelai,
ka káwoli tɔ́ɔ ḿâ.
Káa ƃé ŋa kásìɣe zu a ŋátii kɛ́-ƃela.
Ŋa m̀ôi kâa a gɛ́ɛ ńyãa ƃa Ɣâla.
Ńyãa ƃa m̀ɛnii kélee kɔ́ɔ-pîlanii da gbɛɛ ŋái.
13Ńyãa ƃé ǹɔii kpóŋ sèe.
Ńyãa ƃé ŋ̀ele-kɔ̂lɔŋ kpɛ̀tɛ ŋá dɛ́ ǹɔii m̀ɛi pere.
Ŋa lòno dípɔ,
da ŋ́oo m̀ɛni.
14“Kákelee ka lɛɣɛ a kákîe-ni ká káwoli tɔ́ɔ.
Kákpɛtɛ ɣâla-ŋai nenɛ̂ ƃé m̀ɛni-ŋai ŋí ƃo kâa naa túɛi
a gɛ́ɛ ŋátii kɛ́-nuui
Sarɔ a pɔ̂ri kɔ́ pɛlɛ̂i Babelɔŋ ma
é naa-ƃelai yée mɛi ɣálei?
15Ńyãa ƃé Sarɔ tòli.
Ŋa pâi deniŋ tɔɔ̂i gɛ́ mɛni kélee su.
M̀ɛnii kélee a pâi gɛ̂i, a pâi ƃûu ƃôi ǹyêei.
16“M̀ɛni ma, ka lɛɣɛ a ńyãa ká káwoli tɔ́ɔ m̀ɛnii ma ŋa pâi m̀ôi kâai.
Fé m̀ɛni-ŋai ŋí da ƃó ní kâa loo perei a gɔ́ɔ pîlanii.
M̀ɛni-ŋai kélee ŋa m̀ôi gáa a tɔ̃yâ.”
Yâwɛɛ è mɛni kpɛtɛɛ kɛ̀ ŋɔnûai mɛni ma
Ǹuu-namui Yâwɛɛ a ŋɔmɔ̂leŋ pú ŋ́gbonôi a ńdɛɛ. 17Eezuɛ Ŋɔɣâla Maa Waai, Yâwɛɛ nyii gáa a Eezuɛ ŋuŋ ma ƃó Ɣâla Maa Waai a m̀ôi ǹyɛɛi,
“Ńyãa ƃa Káɣâlai Yâwɛɛ.
Ŋa sɛŋ lɛ̀ kâa a gɛ́ɛ ká mɛni lɛ́lɛɛ sɔlɔ ƃó zu,
ŋ́gɛ káteniŋ tɔ̀ɔ ƃɛ́i maa nɛ̃ɛ̂i ka lí naai.
18“Kâi ŋátɔ̂ŋ-ŋai mɛi kâa,
lii-sêe êei kɛ̂i káyêei yɛ̂ɛ ya-lêe,
káteniŋ ƃô-laai kɛ́ ƃò káyêei yɛ̂ɛ yúo à kɛ̀ toôi.
19Kálônii dîi pâi kɛ̂i a dítamaa yɛ̂ɛ ŋãya, díwɔ̂ lonii támaa yɛ̂ɛ yûo ma ŋãya.
Fêi pâi ǹɛɛ̂i naa dílaa é kpɛ́ɛ ǹɔii ma, kpaa máŋ lɔii-ŋuŋ su-ƃela dí dísu kara.”
20Ka lí ká kúla Babelɔŋ lɔii su.
Ka pú ká kúla Babelɔŋ-ƃelai yêei.
Ká lí ká ǹíi-nɛ̃ɛ tuŋ ƃó kwaa kélee ma ɣelêi-pere a gɛ́ɛ nûa kélee dí mɛni.
Ka lí ká mó kâai, “Yâwɛɛ è ŋɔtíi kɛ́-ƃelai Eezuɛ-ŋai ŋuŋ ma ƃó.”
21È díkùla vɛ̃ɛ-kpâlaŋ su fãai su.
Kpele-wɛ̂li fé ŋɔ́nɔ dípaa ní.
È gɔnii ƃêla,
yá é kúla zu dí gbele.
22Yâwɛɛ è m̀o ǹyɛɛi, “Lii-sêe fé ŋwana-lɔ̂ɔ nuu da mɛni ma.”
Currently Selected:
Azaya 48: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
