Azaya 45
45
Yâwɛɛ è Sarɔ kɛ̀ a kâloŋ
1Yâwɛɛ a Sarɔ siɣe zu a gɛ́ɛ í kɛ́ a ŋátii kɛ́-nuu.
È zìɣe zu a gɛ́ɛ é lɔii ŋuŋ-ŋa mɛi kâloŋ-ŋa yée mɛi ɣále.
A pâi daa-lêe-ŋai maa kóli siɣãŋ-ŋai wôloi berêi.
Yâwɛɛ è m̀o ŋɔ́nɔ Sarɔ ma ǹyɛɛi,
2“Ńyãa kpîŋ ƃé pâi tɔɔ̂i ítuɛ.
Ŋa pâi ǹyée pɛlɛ-pɛlɛɛi da gbaya-kpayai wôloi íperêi,
ŋá m̀ara siɣãŋ-ŋai wólo,
ŋá ǹá kɔli kôya-goyai fũa-fũa.
3Ŋa pâi tɔɔ-sãa tɛɛ̂i ípɔ nyii núu-kpune da fé pâi kɛ̂i a ǹaa kɔ́lɔŋɔɔi.
À kɛ̀ tí, gɛ̀ ní ya pâi gɔ̂lɔni a gɛ́ɛ ńyãa ƃa Yâwɛɛ,
Eezuɛ Ŋɔɣâlai nyii a ítòli a ílaai.
4Ŋá ísìɣe zu a gɛɛ í kpɔŋ mâa tɛɛ ŋátii-ƃelai Eezuɛ-ŋai pɔ́,
ǹûai nyii ŋá dísìɣe zui.
Ŋá gɛ́ ƃaa kɛ́ maa támaa kɛ́ ƃò yâ,
berei máŋ ífe ŋ́gɔlɔŋ lai.
5“Ńyãa ƃa Yâwɛɛ.
Ɣâla da kpɛ́ni fé naa é kúla ḿbôlu.
Ŋa pâi íkponôi kpanánîi,
berei máŋ ífe ŋ́gɔlɔŋ lai.
6Ŋa pâi gɛ̂i tí a gɛ́ɛ ŋ̀éniɛi gwaa kélee su-ƃela dí gɔ́lɔŋ a gɛ́ɛ ńyãa ƃa Yâwɛɛ,
ǹyaŋ Ɣâla da kpɛ́ni fé naa é kúla ḿbôlu.
7Ńyãa ƃé kpíni da kwaa ponóɔɔ kpɛ̀tɛ.
Ŋa lûwa làa nûa dîa, ŋ́gɛ mɛni kpɔ̂lu làa da-ŋa dîa.
Ńyãa ƃa Yâwɛɛ. Ńyãa ƃa m̀ɛni-ŋai ŋí kɛ̀.
8Ŋa pâi ŋ̀ele-kɔ̂lɔŋ lá ƃôi teniŋ-ƃo mɛni é kúla naa é yéŋ ǹɔii ma yɛ̂ɛ tuna a pù.
Ŋa pâi ǹɔii ŋuŋ ma ƃôi, ŋá tɔ̃yâ mɛni-ŋa kɔ́ɔ pîlaŋ naa.
Ńyãa Ǹuu-namui Yâwɛɛ ƃé pâi m̀ɛni-ŋai ŋí kɛ̂i.”
Yâwɛɛ ƃé sɛŋ kélee kpɛ̀tɛ, gɛ́ gélee téniŋ tɔ̀ɔ
9Kpalo-ƃêlai ǹúui ma a tɔ̂ɔ gbɛtɛ nûu lai.
Íkaa nɔ́ yɛ̂ɛ pɔ̂rɔ-leɣi.
Pɔ̂rɔ-leɣe fa mò gbɛtɛ nuu ma ǹyɛɛi, “Ya ŋ́gɛtɛ-pere kɛ̂i léŋ tí?”
Pɔ̂rɔ-leɣi a pɔ̂ri m̀ôi ǹyɛɛ gbɛtɛ nuu fé yɛrɛ ní?
10Kpalo-ƃêlaai ǹúui ma a m̀o gáa-ƃela dîa ǹyɛɛ,
“Ka ŋ́gbɛtɛ pere kɛ̀ léŋ ŋí kpaa máŋ ka ḿaa sɔlɔ ƃò lé mɛni mai?”
11Yâwɛɛ, Eezuɛ Ŋɔɣâla Maa Waai,
nyii Eezuɛ-ƃelai kpɛtɛ̂i, a m̀ôi ǹyɛɛi,
“Lé ŋuŋ ma ƃo ƃé káyêei ká ḿarê kɛ̀ ŋ́gbɔɔi nuai mɛni ma,
kpaa máŋ ká m̀ɛnii ƃó ḿâ ŋa pâi gbɛtɛ̂i a gɛ́ɛ ŋá gɛ́i.
12Ŋá ǹɔii kpɛ̂tɛ,
ŋá núu-kpune kpɛ̀tɛ, ŋá bú naa mɛi.
Ńyãa ƃé ŋ̀elei kpɛ̀tɛ da zu sãa kélee.
Ńyãa ƃa vóloi, ŋ̀áloŋ da bɛ́mɛlɛ̂ŋ-kao-ŋai kélee téniŋ tɔ̀ɔ.
13Ŋá ńyee kpàmo Sarɔ ma a gɛ́ɛ é kɛ́ a ŋátii kɛ́-nuu.
Dɔ̃yâ mɛnii kélee ŋa pâi gɔ́ɔ pîlani ǹɔii ma ƃɛ́i, ŋa pâi gɛ̂i zârai.
Ŋa pâi zia pere-ŋai kélee su sã̂ai.
Ǹyaa ƃe pâi ŋátaa-lêei Zerusâlɛŋ tɔɔ̂i ŋɔ́nɔ pôlu,
é ŋánûai kúla ǹuɛ-laai su.
Vé gɛ̂i fela-fei mɛni ma kpaa máŋ yee pɛlɛ ǹá sɛŋ mɛni.
Ńyãa Yâwɛɛ ƃé m̀o tí.”
14Yâwɛɛ è mò Eezuɛ mà ǹyɛɛi,
“Ŋa pâi Ize da Itiopia-ƃelai dítɔɔ-sãai kulâi díyêei ŋá dɛɛ kápɔ.
Seba kɔ-kuluƃa-ŋa kôya-kôyaa wála-wala-ŋai da pâi kɛ̂i a kápɔɔ.
Da pâi kɛ̂i a luɛ-ŋa káyêei.
Ka pâi dítoôi yɔlɛ ŋá, ƃɛ́i kélee ka lì naai dí ƃò kápôlu.
Da pâi pɛlɛ̂ɛi a kákɔɔ dí kɛ́ mò, dîyɛɛi,
‘Káɣâlai nɔ́ ƃa dɔ̃yâ Ɣalai.
Ɣâla da kpɛ́ni fé naa é kúla bôlu.
15Eezuɛ Ŋɔɣâlai nyii a ŋɔnûai ŋuŋ ma ƃòi,
ǹyaa ƃ Ŋ̀âlai nyii a gbîŋ lòoi.
16Diai da ɣâla pɔkɔɔŋ-ŋa kpɛ̀tɛ, dí díkɛ a díɣâla-ŋai, díkelee da pâi toôi gɔ́ɔ mu.
A pâi díkɛ̂i wúlee é ƃâa kula dîa.
17Kɛ́lɛ Yâwɛɛ a Eezuɛ ŋuŋ ma ƃó.
Lɔii-ŋuŋ da fé pâi wɔ́lɔ pɔrîi ǹyée mɛi ɣâlei.
Ƃaa kûla maa fé wɔ́lɔ ŋɔ́nɔ pâi sɛ̂lɛnii dîa.’ ”
18Yâwɛɛ ƃé ŋ̀ele-kɔ̂lɔŋ-ŋai kpɛ̀tɛ.
Ǹyaa nɔ́ ƃa ɣâla!
Ǹyaa ƃé ǹɔii pù gîe ma, é gbɛ̀tɛ.
È gbɛ̀tɛ a gbanaŋɔɔ.
Gáa naa wɔ́lɔ-wɔlɔ da wɔlɔ-wɔlɔ.
Vé gbɛ̀tɛ ní kpɛ́ni-kpɛni.
È gbɛ̀tɛ a núu-kpune kɛ̂i.
Ǹyaa ƃé m̀o ǹyɛɛi, “Ńyãa ƃa Yâwɛɛ.
Ɣâla da kpɛ́ni fé naa é kúla ḿbôlu.
19Fé lóno ní loo-pêre su,
kpaa máŋ ŋá lóno ƃɛ́i ǹaa kpîniɛi.
Ḿve m̀ó ní Zeeka ǹônii dîa a gɛ́ɛ
dí ŋ́gɔri kpɛ́ni-kpɛni.
Ńyãai a Yâwɛɛi, ŋà tɔ̃yâ ƃò.
M̀ɛnii gáa a tɔ̃yâi, ǹyaa ƃé ŋa ǹɛ.”
Ŋ̀éniɛi Ŋɔɣâlai Yâwɛɛ da Babelɔŋ ŋɔɣâla pɔkɔɔŋ-ŋai
20Yâwɛɛ è mò ǹyɛɛi,
“Káai kélee ŋuŋ ma ƃô sɔlɔ ƃò ǹɔii ŋuŋ kɛ́tɛi toɔ́ɔ pôlu mai,
ka lɛɣɛ a kákîe ni.
Káai kélee pù ká kúla ǹɔii ŋuŋ-ŋai yêei,
ka káŋa lɛ́ɣɛ gîe ma m̀ɛni-sâa ŋá tée ɣenei ŋá!
Diai da ɣâla pɔkɔɔŋ-ŋa fɛli nyíi-ŋai díkpɛtɛ̂ɛi a wúru-ŋai,
táre fé díŋuŋ su.
Da kɛ̂ nɔ́ ɣâla da kpɛ́ni-ŋa fɛlîi
ǹyaŋ dífa ŋuŋ ma ƃô sɔlɔ ƃô da yêei.
21Ka lɛɣɛ a kákîe, ka kámɛni-ŋai pú gîe ma, ká pá a dia mɛni sâa ƃó kwaai ma.
Diai pâi tɔɔ̂i kámɛni mai, dí díwoo ŋá lɛ́ díkîe ni dîa.
Gbɛ̂ɛ ƃa m̀ɛnii ƃò kâa pâi kɛ̂i tínaa tuɛ-perei?
Gbɛ̂ɛ ƃé wɔ́lɔ m̀ɛnii ŋí ƃò kâa ɣele kûu kpɛ́-kpɛ̂ɛ tɛɛ pôlu mai?
Ńyãa Yâwɛɛ nyíi gáa a Ɣâla nyíi ŋɔnûai ŋuŋ ma ƃòi, fé m̀o ní kâa?
Ŋ́gaa a teniŋ ƃô Ɣala.
Ɣâla da kpɛ́ni fé naa é kúla ḿbôlu.
22“Ka tínaŋ ḿbɔ naa pere ka ƃálo-laa sɔlɔ ƃó,
káai a ŋ̀éniɛi su-ƃelai!
Ka tínaŋ ḿbɔ naa pere, kpɛ́ni fêi, ńyãa nɔ́ ƃa Káɣâlai.
Ɣâla da kpɛ́ni fé naa é kúla ḿbôlu.
23M̀ɛnii ŋa mòi, ǹyaa nɔ́ ƃa kɛ̂.
M̀aa fa fâleŋ.
Ŋ́oo da fa tòo kpɛ́ni-kpɛni.
Fúlu-sãa kélee da pâi pîlanii díŋume ŋá ŋ́ɛi túɛ,
dí díkono tée a gɛɛ da pâi ƃaa kɛ́-maa tɛɛ̂i ḿbɔ.
24“Da pâi môi a gɛɛ ńyãa tɔnɔ nɔ́ ƃé a gɛ̀ núu kponoi é kpanaŋ, gɛ́ tɔ̃yâ mɛni-ŋa kɛ̀.
Diai da tɔ̀ɔ mai, da mɔ̃lɛ dí ŋumɛ.
25Ńyãa Yâwɛɛ, ŋa pâi gɛ̂i Eezuɛ é ǹɔii-ŋûŋ-ŋai kélee pú gɔ́ɔ mu,
a gɛ́ɛ Eezuɛ é ńaa maa tɛ́.”
Currently Selected:
Azaya 45: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
