Azaya 44
44
Yâwɛɛ nɔ́ ƃa Kúɣâlai
1Yâwɛɛ ǹyɛɛi,
“Óo Zeeka, ŋátii kɛ́-nuui, íwoli tɔ́ɔ ḿâ,
Eezuɛ-ƃela, káai ŋá ká sìɣe zu a ŋánûai.
2Ńyãa ƃa kákpɛtɛ Ɣâlai Yâwɛɛ.
É síɣe tãi ma ŋá kákpɛtɛ lai, fé tá ńyee kula ní kámu.
Óo Zeeka, ŋátii kɛ́-nuui, ífe yào,
Zesuruŋ ƃiai ŋá zìɣe zui.
3“Ŋa pâi gɛ̂i tuna é pú, ǹɔii kpâlai é yɔɔ.
Ŋa pâi gɛ̂i ya-ɣɛli pɛlɛɛ-ŋa dí láa vɛ̃ɛ-kpâlaŋ-ŋai su.
Ŋa pâi Ŋámɔ̂leŋ pûi kálônii kponôi,
ŋá lûwa láa dîa.
4Da pâi ƃûu ƃôi yɛ̂ɛ ya-lêe kɔlɛ kala-ŋa,
kpaa máŋ yɛ̂ɛ ya-ɣɛ̂li kɔlɛ wûru-ŋa.
5“Ǹúui da-ŋa da pâi kɛ̂i yoŋka têei dîyɛɛi, ‘Yâwɛɛ pɔ́ɔ ƃa ńyãa.’
Da-ŋa dí díkpîŋ tóli a Zeeka ŋɔsuui su nuui da.
Da-ŋa da pâi Yâwɛɛ láa pɔ̃yɛ̂ɛi díyee ma a tɛɛ-ŋa.
Da-ŋa da pâi díkpîŋ tôlii a Eezuɛ-ƃela.”
6Ŋ̀wála-wâla kélee Yâwɛɛ, Eezuɛ kaloŋ,
nyii gáa a ŋ̀uŋ ma ƃô-nuui Ɣalai, a m̀ôi ǹyɛɛi,
“Ńyãa ƃa mɛni kélee kɔ́ɔ-pilanii da gbɛɛ ŋá Ɣala.
Ɣâla da kpɛ́ni fé naa é kúla ḿbôlu.
7Gbɛ̂ɛ ƃé gáa yɛ̂ɛ ńyãa? Maa nuui é gbîŋ lɛ́ wɔ̂ ḿâ.
Gbɛ̂ɛ ƃé m̀ɛnii kɔ́lɔŋ pâi kɛ̂i é kúla gɔ́ɔ-pîlani é tóo gbɛɛ ŋá mai?
8Ŋánûa, káfe yào.
M̀ɛni-ŋai pâi kɛ̂i, ŋá gélee ƃo kâa a gɔ́ɔ-pilani.
Káa kpîŋ ka gɔ́lɔŋ.
Kákaa a ŋásêre-ŋa.
Ɣâla da kpɛ́ni káa naa é kúla ḿbôlu?
Kɔni da fé naa é kpanaŋ yɛ̂ɛ ńyãa. Fé dɔnɔ kpîŋ da kɔ́lɔŋ.”
Ɣâla da kpɛ́ni-ŋa fɛliɛɛ káa a ƃoo mɛ̂ni
9Ɣâla pɔkɔɔŋ-ŋa mɛni káa nɔ́ kpɛ́ni-kpɛni. Diai da dí kpɛ̀tɛi, dífa mɛni lɛ́lɛɛ da sɔlɔ ƃô díyêei. Dífɛli-ƃela ŋɛ́i pûɔɔi. Dífe m̀ɛnii kɔ́lɔŋ da gɛ̂i. Ɣâla a pâi díkula maa kɛ̂i, dí ŋumɛ. 10Gbɛ̂ɛ ƃa ɣâla pɔkɔɔŋ sɛŋ da kpɛ̀tɛ nyii va sɛŋ da sɔlɔ ƃo ǹyêei? 11Diai da zãâi ŋí fɛ̀lii, Ɣâla a pâi díkula maa kɛ̂i, dí ŋumɛ. Nûa ƃa zãâi ŋí kpɛ̀tɛ. Da dífɛli-ƃelai da pâi tɔɔ̂i mɛni ŋá téɛɛ su, díkɛ yào. Ɣâla a pâi díkula maa kɛ̂i a ŋ̀ánaa, dí ŋumɛ.
12Gɔ̀li ɣale-nuui a kɔli kpua-ŋa sìɣe é ǹɔ́ ŋɔŋ ŋá. A kpɔ̀lu, é ǹókwa a kpuyɔ̂ŋ é gbɛtɛ a zãa. Díi kpanaŋ ŋí a gɛ̀ kpele-wɛli da puru é baa, kɔlɔ é kpɛ́ɛ ma.
13Ŋ̀úru saa-nuui a ŋ̀úru-kpônoi siɣe é gɔɔŋ é zu tée. À kɛ̀ tí, a zàa é gbɛtɛ yɛ̂ɛ núu-kpune, é gɔlɔ ma kîiŋ nɛ̃ɛ-nɛ̃ɛ. Zɛŋ ŋí nâmu a zìɣe é dɔɔ ŋɔpɛ́rɛi mu. 14A zɛŋ ŋí kpɛ̀tɛ a sîda, sapɔlɔ kpaa máŋ ôo wuru nyii a gùla ŋ̀olâ-ŋai sui. A da-ŋa kpɛ̀tɛ máŋ a pã̂a wuru-ŋa. Ǹyaa kpîŋ a pã̂a wuru-ŋa sì máŋ m̀ɛni-ŋai ŋí kɛ́ mɛni ma. A ŋ̀úrui ŋí sì, é m̀ɛi káa, à ƃɔlɔ, a sèri zu, é bɔŋ é gbɛtɛ a ɣâla pɔkɔɔŋ-ŋa. 15A ŋ̀úrui gbua da-ŋa kpɛ̀tɛ a ɣâla pɔkɔɔŋ-ŋa, é da-ŋa kɛ́ a kɔi. Nyíi a gɛ̀ a kɔi, a ŋɔŋ tôo ma gɛ́ gɔ́lɔ ƃo ma, gɛ́ kpólo kpɛ̀tɛ da-ŋa ŋá. Nyíi a gbɛ̀tɛ a ɣâla pɔkɔɔŋ, ǹyaa ƃé a kɛ̂ vɛlîi. 16A ŋɔsuai ŋɔ̂ŋ gɔi ŋí da-ŋa dîa. À kɛ̀ miî, ǹíi láa gɛ́ gɔ́lɛ ƃò, gɛ́ yoŋka tèe ǹyɛɛi, “Ŋaâ see ŋɔŋ kɔlɛ, ŋa ŋ́gɔlɛ ƃó, ŋ́gonôi a fãa.” 17Nyíi a gbɛ̀tɛ a ŋɔɣâla pɔkɔɔŋ, a tôo gɔ́ɔ mu é vɛli ǹyɛɛ mai, “Yá ƃa ŋáɣâlai. Ŋ́uŋ ma ƃó!”
18Táre da kili ŋa-sîa da fé ǹúu kɛ́ɛ-ŋai ŋí dîa. Díŋɛi pûɔɔi, dífa mɛni ŋá kàa. 19Da fa gíli ŋá sìa ǹyɛɛi, “Zɛŋ ŋí ŋá gbɛ̀tɛ, ŋ́gɛ vɛ̀lii, gbua da-ŋa nɔ́ ƃé ŋa ŋɔŋ tôo dîa, ŋ́gɛ ŋ́gɔlɔ ƃó m̀a, ŋ́gɛ kpólo kpɛ̀tɛ m̀a, ŋ́gɛ sua ŋɔ̂ŋ m̀aa ŋɔ́ŋ ŋá. Wúru gbua-ŋa ƃé ŋa toôi díkɔɔ mu ŋ́gɛ dífɛlii.”
20Díƃoo pere káa léŋ tí. Da dílaa-laai pûi sɛŋ da kponôi nyii da gèreŋ a ŋɔŋ. Da díkpîŋ pɛ̀lɛ a díƃoo-tûai nyii va pɔ̂ri díŋuŋ maa ƃôi. Dífe gɔ́lɔŋ zãâi ŋí dífe a ɣâla?
Yâwɛɛ ƃa kúkpɛtɛ-nuui, da kúŋuŋ maa ƃó-nuui
21Yâwɛɛ ǹyɛɛi,
“Eezuɛ-ŋa, m̀ɛnii ŋí é lɛ́ɛ kákili ŋá.
Ka gɔ́lɔŋ a gɛ́ɛ ńyãa ƃé kákpɛ̀tɛ.
Ŋá ká kpɛ̀tɛ a gɛ́ɛ ká kɛ́ a ŋátii kɛ́-ƃela.
Fé pâi wɔ́lɔ niâi kâa.
22Ŋá kásu mɛni lɛ̀ɛ kásɔnyɔ̂ŋ kélee mɛni ma yɛ̂ɛ lúu a tàa.
Ka pá ḿbɔ. Ńyãa ƃa káŋuŋ ma ƃó nuui.”
23Ɣele-kɔ̂lɔŋ-ŋa, ka láɣi ɣelêi pere a koi-nɛ̃̂ɛ!
Káai kélee ǹɔii kpóŋ ma perei, ka láɣi ɣelêi pere a koi-nɛ̃̂ɛ.
Óo yée-ŋa, wolâ-ŋa, ka ǹɔɔ wuru-ŋai kélee ka láɣi ɣelêi pere a koi-nɛ̃̂ɛ.
Ka láɣi ɣelêi pere a koi-nɛ̃̂ɛ,
kpɛ́ni fêi, Yâwɛɛ a ŋɔkɛ́tɛ-laai lɛ́ kûa a Eezuɛ-ŋai ŋuŋ ma ƃóɔɔ.
24Yâwɛɛ a m̀ôi ǹyɛɛi,
“Ńyãa ƃa káŋuŋ ma ƃó nuui Yâwɛɛ.
Ńyãa ƃé kákpɛ̀tɛ.
Ńyãa ƃa Yâwɛɛ.
Ńyãa ƃé sɛŋ kélee kpɛ̀tɛ.
Ŋá ŋ̀ele-kɔ̂lɔŋ fulomo ńyãa tɔnɔ.
Ŋá ǹɔii kɛ̀ a zu kɛ́tɛ.
Gbɛ̂ɛ ƃé kpɔŋ mâa tɛ̀ɛ ḿbɔi?
25Ŋá dɛli kpɛ́-ƃelai ƃòo,
ŋá dílii su kɛ́ yùu-yuu.
Ŋá táre-ƃela dítarei maa fâlɛŋ.
Ŋá ǹɛ́ dîa a gɛɛ dítarei káa a ƃoo tûa.
26Kɛ́lɛ ŋ̀orɛ̂-woo-ŋai ŋá dɛ̀ɛ a ŋákela-ŋai, díŋaa-see a kɛ́ tí-ti ƃo.
M̀ɛni-ŋai kélee ŋá gbɛtɛ a gɛ́ɛ ŋá gɛ̂i, gélee ŋaa-see è kɛ̀.
Ŋá m̀o a gɛ́ɛ Zerusâlɛŋ taa-leei da Zuda taa-leei-ŋai da pâi tɔɔ̂i ŋɔ́nɔ pôlu, ǹaa láa é fɛ́ɛ a núu-kpune.
Ŋa pâi gɛ̂i daa-lêe-ŋai ŋí dí kɛ́ yɛ̂ɛ berei dí kɛ̀ la a bɔlɔi.
27Ŋá gɛ̀ ǹya-lêe-ŋai da yúo dí kpála a ŋ́oo.
28Ŋá mò Sarɔ mà ńyɛ̃ɛi, ‘Yá ƃé ŋá ísiɣe zu a gɛ́ɛ í tɔ́ɔ ŋánûai túɛ é díteniŋ tɔ́ɔ.
M̀ɛni-ŋai ŋá mò yâi, ya pâi díkɛ̂i.
Ya pâi lɛɛ̂i dítuɛ dí Zerusâlɛŋ taa-leei tɔ́ɔ pôlu,
dí Ŋ̀âla-pɛrɛ Kɛ́tɛi tɔɔ́ kɔ́ɔ pîlaŋ naa.’ ”
Currently Selected:
Azaya 44: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
