Azaya 43
43
Ɣâla è gono tèe a gɛ́ɛ a pâi ŋɔnûai ŋuŋ maa ƃôi
1Eezuɛ-ŋa, Yâwɛɛ nyii núu-kpune kpɛ̀tɛi, a m̀ôi kâa ǹyɛɛi,
“Káfe yào. Ŋa pâi káŋuŋ maa ƃôi kákpɔara-ƃelai yêei.
Ńyãa ƃé kásìɣe zu a gɛ́ɛ ká kɛ́ a ŋátii kɛ́-ƃela. Kákaa a ḿbɔɔ.
2Kà kɛ̀ tɛɛ̂i ya-ɣiliŋ kpanaŋ su, sɛŋ da fé pâi kɛ̂i a káa. Ŋa pâi kɛ̂i kákɔlɛ.
Mɛni kpânaŋ da fé pâi wɔ́lɔ káyee mɛi ɣâlei.
Ka sìa ŋɔŋ su vé pâi kákêreni.
Su-kɔ̂ɔŋ kpanaŋ da fé pâi wɔ́lɔ káyee mɛi ɣalei.
3Ńyãa ƃa Káɣâlai Yâwɛɛ.
Ńyãa ƃa Eezuɛ Ŋɔɣâlai Maa Waai.
Ńyãa ƃa kákula yêei kɛ́ Ɣalai.
Ŋa pâi Ize-ŋai tɛɛ̂i a fela-fêi kápɔɔ ŋá.
Ŋa pâi kámaa fálenîi a Itiopia da Seƃa-ƃelai.
4Ŋa pâi lɔii ŋuŋ da kpɛ́ni-ŋa su-ƃela tɛɛ̂i kákpɔara-ƃelai pɔ́ a gɛ́ɛ ká ŋuŋ ma ƃo sɔlɔ ƃó.
Ŋa pâi gɛ̂i tí,
kpɛ́ni fêi, ŋa káwɛli ni kámaa mɛni kpanaŋɔɔ ḿâ.
5Ŋ́gaa kákɔlɛ a ɣele kélee káfe yào.
“Ŋa pâi kánûai kulâi vóloi kulâi-pere da vóloi liî-pere kpóŋ ma.
Ŋa pâi pâi pôlu a kánûai kákpɔɔi lɔii ma.
6Ŋa pâi m̀ôi yá-ŋûa lɔii-kpiniŋ ma a gɛ́ɛ é ŋánûai tɛ́ɛ,
ŋá m̀ó séɣai-pere lɔii kpiniŋ ma a gɛ́ɛ vé kànaŋ dîa.
Tɔɔ ŋánûai dí kúla ǹɔii ŋuŋ su kôyaa-ŋai su,
da ŋ̀éniɛi gwaa kélee.
7Díkaa a ŋánûa.
Ŋá díkpɛ̀tɛ a gɛ́ɛ díkɛ laa maa tɛ̂ tɛ̀ɛ ḿbɔ.”
Eezuɛ ƃa Yâwɛɛ ŋɔsêrei
8Ɣâla ǹyɛɛi,
“Ŋánûai ŋáa lɛ́ɣɛ ma kwaa tɔ̂nɔ ma.
Díŋɛi káa dîa, kɛ́lɛ dífa kwaa kâa.
Díwoli káa díŋuŋ ma, kɛ́lɛ dífa mɛni mɛ̂ni!
9M̀ó ŋ̀éniɛi su-ƃelai kélee dîa a gɛ́ɛ dí díŋa lɛ́ɣɛ gîe ma.
Díɣâla-ŋai nenɛ̂ ƃé a m̀ɛnii ƃò gáa kɛ̂i sâai?
Dí pá a sêre-ŋa dí dímaa sêre faa kɛ́,
a gɛ́ɛ é ǹɛ́ a gɛ́ɛ dímɛnii lɛ̂lɛɛi,
é díwoo maa sêre faa kɛ́ a gɛ́ɛ gáa a tɔ̃yâ.
10“Eezuɛ-ƃela, káa ƃa ŋásêre-ŋa.
Ŋá kásìɣe zu a gɛ́ɛ ká kɛ́ a ŋátii kɛ́-ƃela,
a gɛ́ɛ ká gɔ́lɔŋ ńyãa nɔ́ ƃa Káɣâla tɔnɔi, ká láa a ńyãa.
É kúla ḿbôlu, ɣâla da kpɛ́ni kélee fé naa.
Da fé naa, ǹyaŋ da fé pâi wɔ́lɔ kɛ̂i naa.
11“Ńyãa nɔ́ ƃa Yâwɛɛ.
Ńyãa nɔ́ ƃa kákula yêei kɛ̀ kákpɔara-ƃelai yêei.
12M̀ɛni-ŋai kélee kɛ̂i, ńyãa ƃé dímaa mɛ̂ni ƃò ǹaa túɛ.
Ŋá kpɔŋ mâa tɛ̀ɛ kápɔ.
Ɣâla da kpɛ́ni fé dímaa mɛ̂ni ƃó ní.
Káa ƃa ŋásêre-ŋa.
13Ŋ́gaa a Ɣâla, ǹyaŋ ŋa pâi kɛ̂i a Ɣâla wɔ́lɔ-wɔlɔ da wɔ́lɔ-wɔlɔ.
Núu da fa pɔ̂ri kulâi ŋáwala-walai mu.
M̀ɛnii ŋa gbɛ̀tɛi, núu da fa pɔ̂ri m̀aa fálenîi.”
Ɣâla è ŋɔnûai kùla Babelɔŋ
14Eezuɛ Ŋɔɣâla Maa Waai nyii gáa a káŋuŋ maa ƃó Ɣâlai ǹyɛɛi,
“Ŋa pâi káŋuŋ maa ƃôi, ŋá kákula Babelɔŋ-ŋai yêei.
Ŋa pâi kɔ-kuluƃa-ŋa tɛɛ̂i naa dí ǹaa siɣãŋ-ŋai lá wólo.
Ǹaa-ƃelai dílii-nɛ̃ɛ kula-wôoi a pâi penêi a wɔ́lɔ-wôo.
15Ńyãa ƃa Yâwɛɛ, Káɣâla Maa Waai.
Eezuɛ-ŋa, ńyãa ƃé kákpɛ̀tɛ. Ńyãa ƃa Kákâloŋ.”
16Yâwɛɛ è wɔ́lɔ pere lâa Yúo Kpɔ̂lu sâmai kámɛni ma.
17È kɔ-kuluƃa kpulu su-kàra nyíi-ŋai kɛ̀ soo-ŋa mɛi,
da soo sia-kêleŋ-ŋai sui.
Díkelee dí tòo da fé pɔri ní m̀u-siɣêi.
Díkelee dí nìiŋ yɛ̂ɛ da ŋɔŋ lìiŋ.
18Kɛ́lɛ Yâwɛɛ a m̀ôi ǹyɛɛi,
“Ka nia m̀ɛni-pɔlɔ-ŋai dîa.
Káfe kànaŋ dîa.
19Ka m̀ɛni nina-ŋai káa ŋa gɛ̂i.
Ŋa pâi pere lâai vɛ̃ɛ-kpâlaŋ su.
Ŋa pâi gɛ̂i ya-ɣɛ̂li-pɛlɛɛ dí láa naa.
20Ǹɔɔ fɛnɛ-sãai da pâi ƃaa kɛ́ maa tɛɛ̂i ḿbɔ.
Ǹɔɔ ɣîla-ŋai da dua-too ŋɔni-ŋai da pâi laa tɛ tɛɛ̂i ḿbɔ.
Ŋá gɛ́ yá é láa vɛ̃ɛ-kpâlaŋ su a gɛ́ɛ
ŋánûai ŋá dí sìɣe zui, díkɛ díkpele la.
21Ńyãa ƃé ŋánûai kpɛ̂tɛ.
Dia máŋ da pâi laa maa tɛ̂ wule-ŋa toôi ḿâ.”
Eezuɛ ŋɔsɔnyɔ̂ŋ
22Yâwɛɛ a m̀ôi ǹyɛɛi,
“Eezuɛ, yâ ŋɔ́nɔ nia ḿâ.
Ífe ŋɔ́nɔ ḿvɛlîi.
23Ífe ŋɔ́nɔ ƃála kulâi ḿâ a kéreŋ sala,
kpaa máŋ í ƃaa kɛ́ maa tɛ́ɛ ḿbɔ a ísâla sãai.
Fé fũa-fũa tɔɔ̂i yâ a gɛ́ɛ í sâla kula ḿâ a mii-sãa sala sãa,
kpaa máŋ í sâla kula ḿâ a kéreŋ sãa kúŋ nɛ̃ɛ.
24Ífe niî sɛŋ kúŋ nɛ̃ɛ da yá ní a sɛŋ-kao ḿɛni ma,
kpaa máŋ í ńii láa a ísâla suai ŋ̀úlɔ da.
Kɛ́lɛ íkaa nɔ́ sɔnyɔ̂ŋ kɛ̂i a ńyãa.
Ya kɔlɔ kpɛ́ɛ ḿâ a ísɔnyɔ̂ŋ ŋánaai.
25Ŋ́gaa a Ɣâla. Ńyãa ƃa núu su-mɛni lɛ̀ɛ.
Ŋa gɛ̀ tí, kpɛ́ni fêi, ŋ́gaa a ńyãa Ɣâla.
Ŋa pâi ísu-mɛni lɛɛ̂i zɔnyɔ̂ŋ-ŋai ya gɛ́i m̀ɛni ma.
26“Pá kwa kú mɛni kpɛtɛɛ kɛ́ gîe ma.
Kú lí m̀ɛni sâa ƃó kerei mu í ímɛnii láa.
Ímɛnii lɛ́, dí gáa à kɛ̀ gáa a tɔ̃yâ.
27Kánâŋ pɔlɔ-ŋai dí sɔnyɔ̂ŋ kɛ̀.
Kálaa túɛ-ƃelai dí sɔnyɔŋ kɛ̀ a ńyãa,
28dí ŋákwaa ma waai maa tĩa kàra.
M̀ɛnii ŋí ƃé gɛ̀ ŋá ǹɛɛ naa kákpɔara-ƃelai
dí ƃâa kula kâa, dí ká su-kara.”
Currently Selected:
Azaya 43: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
