Azaya 42
42
Yâwɛɛ ŋɔtíi kɛ́-nuui
1Yâwɛɛ a m̀ôi ǹyɛɛi,
“Ŋátii kɛ́-nuui ká ŋí.
Ǹyaa ƃé ŋá zìɣe zu.
Ńii lâai ǹyêei.
Ŋa pâi Ŋámɔleŋ pûi gbonôi, ŋá wála-wala tɛɛ bɔ́.
A pâi gɛ̂i nûa dí kɛ́ teniŋ ƃô mɛni-ŋa kɛ̀ ǹɔii ŋûŋ-ŋai su.
2Vé pâi kɛ̂i lâɣii, nûa dí kɛ́ ŋ̀óo mɛni ɣelêi-pere,
kpaa máŋ bere lêe-ŋai ma.
3Diai dífii kpɛɛ̂i, vé pâi ǹɛɛ̂i naa dí tóo.
Diai kili kɛ-zu fé díyêei, a pâi kili-kɛ-zu tɛɛ̂i dípɔ.
A pâi pâi a teniŋ ƃô-laa núu kélee mɛni ma.
4A pâi gɛ̂i nûa dí kɛ́ teniŋ ƃô mɛni-ŋa kɛ̀ ǹɔii ma ƃɛ́.
Vé pâi fɛɣɛ̂i é lɛ́ɛ la zu m̀ɛnii ŋí ŋ̀aa-see é kɛ́.
Diai díkaa lɔii-ŋûŋ su kôya-ŋa sui, da pâi kɛ̂i ŋɔsɛŋ lɛ́ɛi maa kpɛ́nîi.”
5Ɣâla Yâwɛɛ ƃé ŋ̀elei kpɛ̀tɛ da ǹɔii.
È fúlu-sãa kélee kpɛ̀tɛ ǹɔii ma,
é núu-kpune kpɛtɛ é ǹyaa Ɣâla ǹɛwo da ŋɔmɔ̂leŋ pú gbonôi.
A m̀ôi ŋɔtíi kɛ́ nuui ma ǹyɛɛi,
6“Ńyãa ƃa Yâwɛɛ. Ŋaâ ísiɣe zu a gɛ́ɛ í pá a teniŋ ƃô-laa ŋ̀éniɛi su.
Ŋa wála-wala tɛɛ ípɔ, ŋ́gɛ ímɛi kâa.
Ŋa pâi kpanaŋ-woo kɛ̂i ŋánûai yêei ísarâi,
ŋá kwaa ponóɔɔ tɛ́ɛ ǹɔii-ŋai pɔ́ ísârai.
7Ŋ̀ɛi pu-ƃelai da pâi kwaa kâai ísârai,
diai díkaa kpini-pɛrɛ mui, dí ŋuŋ ma ƃô sɔlɔ ƃó ísârai.
8“Ńyãa tɔnɔ kpéŋ nɔ́ ƃa Káɣâlai Yâwɛɛ. Ńaa ká ŋí.
Fa ŋáfolo-laai da tɛ̀ɛ ɣâla da kpɛ́ni pɔ́.
Fa ŋálaa maa tɛ̂i tɛ̂ɛ ɣâla da kpɛ́ni pɔ́.
9M̀ɛnii kélee ŋá m̀o yâ ǹaa túɛ perei, ŋ̀aa-see a kɛ̂.
M̀ɛni ma, ŋa pá mɛni nina ƃôi yâ
ŋ̀aa-see é lɛ́ɛ pâi kɛ̂i.”
Laa maa tɛ wule
10Ka wule nina too Yâwɛɛ ma.
Káai ŋ̀éniɛi gwaa kéleei, ka laa maa tɛ̂ wule too Yâwɛɛ ma!
Káai kélee yúo kpono mai, ka ǹáa maa tɛ́.
Káai a vúlu-sãai yúo sui, ka ǹáa maa tɛ́.
Káai kélee ǹɔii ŋuŋ-ŋai su kwaa kóya-kôyaa mai, ká ǹáa maa tɛ́.
11Káai vɛ̃ɛ-kpâlaŋ-ŋai su taa-lee-ŋai sui, ka Ɣâla láa ma tɛ́.
Káai kélee Keda lɔii sui ka ǹáa ma tɛ́!
Káai kélee Sila taa-leei sui,
ka tɛ́ ǹyée kpaya-kpayai su, ka lii-nɛ̃̂ɛ kula.
12Káai kélee ǹɔii ŋuŋ kôya-koyaa-ŋai sui,
ka Yâwɛɛ ŋɔkɛ́tɛ-laai mɛni ƃó, ka ǹáa maa tɛ́!
13Yâwɛɛ káa yɛ̂ɛ kɔ-kuluƃa.
Gbɛtɛ̂ɛi a tãi kélee yɛ̂ɛ kɔ-kuluƃa kɔ́-kɔ mɛni ma.
A ŋ̀óo pilîi ŋɔkɔ-kuluƃa-ŋai dîa a gɛ́ɛ dí díkpîŋ kpɛtɛ.
A ŋɔwála-wala-laai lɛ̀ ŋɔkpɔara-ƃelai dîa.
Ɣâla a gono tée a gɛ́ɛ a pâi kpɔ̂nii ŋɔnûai dîa
14Ɣâla a m̀ôi ǹyɛɛi,
“Ŋa ḿɛi sáa ŋánûai yêei a zu kôyaa.
Fé dífɛli-wooi su toôi.
Kɛ́lɛ ŋa pá díwoo su toôi.
Ŋa wɔ̂lɔi yɛ̂ɛ nɛnî a kɛ̀ koi-têe su.
15Ŋa pâi ǹyée pɛlɛ-pɛlɛɛi da gbaya-kpayai wôloi.
Ŋa pâi gɛ̂i gala-ŋai da ŋ̀úru-ŋai kélee dí kpála.
Ŋa pâi nyá-ŋai kélee kpâlai, ǹaa é kɛ́ a fɛ̃ɛ-kpâlaŋ,
ǹya-ɣɛ̂li pɛlɛɛi kélee dí kpála.
16“Ŋa pâi tɔɔ̂i ŋánûa ŋɛ́i púɔɔ-ŋai túɛ,
ŋá tɛ́ɛ a dia a berei dífe tá tɛ̀ɛ ní lai.
Ŋa pâi díkpinii kɛ̂i a kwaa ponoɔɔ.
Ŋa pâi bere kilɛ-kilɛ-ŋai su sãâi.
Ŋákono teei ká ŋí,
ǹyaŋ fé pâi wɔ́lɔ m̀aa fálenîi.
17Diai kélee da ɣâla-pɔkɔɔŋ-ŋa tɔ̀ɔ ḿbɔɔ ŋái,
ŋa pâi ǹyée kulâi dímu, ŋá díŋumɛ.
Ŋa pâi gɛ̂i tí a diai da ɣâla pɔkɔɔŋ-ŋa tòli a díɣâla-ŋai.”
Eezuɛ-ŋai dífe díwoli tɔ̀ɔ ní Ɣâla ma
18Yâwɛɛ a m̀ôi ǹyɛɛi,
“Káŋɛi pûɔɔi, káwoli tíniŋɔɔ.
Kɛ́lɛ ka káŋɛi lá ƃó, ká kwaa káa, ká káwoli tɔ́ɔ kpɔ́ a ǹɛ́lɛɛ!
19Núu da fé naa ŋ̀ɛi púɔɔ yɛ̂ɛ ŋátii kɛ́-nuui.
Núu da fé naa ŋ̀óli tíniŋɔɔ yɛ̂ɛ ŋákelai ŋá dɛ̀ɛi.
Gbɛ̂ɛ ƃé ŋ̀ɛ́i pûɔɔi yɛ̂ɛ ǹúui nyii ŋá zìɣe zui,
kpaa máŋ ŋ̀ɛ́i púɔɔ yɛ̂ɛ ńyãa Yâwɛɛ ŋátii kɛ́-nuui?
20Eezuɛ-ŋa, ka mɛni támaa ŋɛ́i káa,
kɛ́lɛ káfa kátûa-pere maa fáleŋ.
Káwoli káa kâa,
kɛ́lɛ káfa mɛ́ni mɛ̂ni.”
21Yâwɛɛ káa a teniŋ-ƃô Ɣala.
M̀ɛni ƃé a ŋ̀wɛli la núu kélee dí ŋɔtɔ̂ŋ-ŋai mɛi káa,
dí ƃaa kɛ́-maa tɛ́ɛ ŋɔtɔ̂ŋ-ŋai pɔ́.
22Kɛ́lɛ ŋ̀wana lɔ̂ɔ-ƃelai da ŋɔnûai yêei sãa kélee kúla díyêei.
Da dípili kpini-pɛrɛ mu.
Dá da-ŋa pú lóa-ŋa su.
Da mɔ̃lɛ̂i, núu da fé naa é díkula yêei kɛ́.
23Kátà a pâi ŋ̀óli tɔɔ̂i m̀ɛnii ŋí ma?
É kúla sâa ma, ka pâi káwoli tɔɔ̂i m̀ɛnii ŋí ma a ǹɛ́lɛɛ?
24Kúai a Eezuɛ-ŋai, gbɛ̂ɛ ƃé kú tɛ̀ɛ zãâ kula yêei kɛ́-ƃelai ŋí pɔ́i?
Yâwɛɛ ǹyaa kpîŋ ƃé gɛ̀ tí zɔnyɔ̂ŋ-ŋai kú gɛ̀i, mɛni ma.
Kúfe kúkɛ̀ ɣéniɛi kɛ́ ní yɛ̂ɛ berei è kɛ̀ ŋ̀wɛ̂lii lai,
kpaa máŋ kú ŋ̀óo mɛni.
25È ǹíi ŋwàna kûa yɛ̂ɛ ŋɔŋ a tèe láa kpâla ma,
é gɛ́ kú mɔ̃́lɛ kɔ́ su.
Ŋɔlii-ŋwânai è kúai a Eezuɛ-ŋai kúkêreŋ yɛ̂ɛ ŋɔŋ.
Kɛ́lɛ kúfe m̀ɛnii ŋá káa ní kɛ̀ kɛ̂i.
Kúfe mɛni da maa kɔ́ri ní a dɔnɔ kpîŋ.
Currently Selected:
Azaya 42: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
