Sal 57
57
Re' reey David xupahqaaj parutiij chi naa rutoob'jiik ruum i Dios
(Sal 108.1-5)
1Chaketelaaj tii nuwach QaJaaw Dios,
chaketelaaj nuwach kinatoob'eej.
Ruum xa awuuk' wo' hat i nusik' ko'lemb'al wiib',
kinako'leej ruuk' awajaawriik ri'si-aaxiik' kinayeew
korehtaal inik'ik chi wiij i yohb'aal.
2Re' hin i nupahqaaj i rotob'il
i nuDios wilik cho pan taxaaj,
ruum xa re' wo' reh intoob'inik weh.
3Re' reh kopan taxaaj naa rutaq'aam chaloq
i ruk'axb'al, je' wo' hoq i korik,
reh chi naa kiiruk'oleem pan kiq'ab'
i ki-ixowanik nuwach.
4Re' hin ayu' wilkiin chi kixilak
i tinamit xiik' naah kijosq'iil.
Xa je' chik q'as ju' ch'ihch' i keeh,
xa je' chik flecha, eh re' kaaq' xa je' chik q'aslaj ch'ihch'.
Eh je' kijosq'iil i kaaq b'ahlam.
5QaJaaw Dios, nee ta naq inak'uhtaaj awajaawriik pan taxaaj.
Eh nee ta naq inye'arik aloq'il chinaah chu'nchel wach ak'al.
6Re' taqe ki-ixowanik nuwach i xkikoj i xirob' chi nujunsuut,
re' naq inkaaj chi xyoj nuk'ux.
Eh xkik'ot i chaamlaj jul panub'eeh,
xanaah re' xa re' wo' keh xiq'ehb'ik ar.
7QaJaaw Dios, re' hin nuye'em nuk'ux awuuk'.
Eh naa nutz'uyem awach chu'nchel nuk'ux.
8Re' hin naa wik'raam wiib' noq naa rusaq'iik.
Eh chu'nchel nuk'ux naa nutz'uyem wach i nuDios
ruuk' taqe nuq'ooj, ruuk' i warpa.
9Naa kaat nuloq'em chikiwach i tinamit QaJaaw Dios.
Eh naa nuye'em runimaal awach ruuk' i nutz'uuy chikiwach chu'nchel i tinamit.
10Ruum re' ketelinik wachiis i na a'n imponik kopan taxaaj.
Eh re' rukorkiil wach ak'ux
imponik wilik cho wii' i suutz'.
11QaJaaw Dios nee ta naq i inak'uhtaaj i runimaal awajaawriik pan taxaaj.
Eh nee ta naq inye'arik aloq'il chinaah chu'nchel i wach ak'al.
Currently Selected:
Sal 57: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
