Sal 56
56
Re' reey David xuq'or parutiij ree Dios chi ruye'em i ruk'ux ruuk'
1QaJaaw Dios, chaketelaaj tii nuwach,
ruum ma' k'isiin taqe i kib'anik ti' k'axik weh.
Eh chu'nchel i q'iij inkiq'at panub'eeh, inkaaj kianam weh.
2Re' taqe ki-ixowanik nuwach,
chu'nchel q'iij k'ahchi' kiin
kisik'im reh i nukanteesjiik.
Eh yohb'aal kiwach i peleto
inki a'n wuuk'xiik'naah i kijosq'iil.
3QaJaaw Dios, noq neenchalik nuyo'jiik kuum,
awuuk' i hat neenuyeew nuk'ux.
4Re' hin awuuk' i hat nuye'em nuk'ux,
i nuyeew ruloq'il aq'oral. Ruum i re'
ma' nee ta kinyo'jik ruum i neenkian weh taqe i xa winaq.
5Re' keh xa chu'nchel i q'iij inkitib'isaj nuk'ux ruuk' i kiq'oral,
xa re' inujot'ariik inkikapaaj rub'aan.
6Eh inkimol kiib' xak'ul chik kiooj chi keb'anik kiib',
reh i nutahariik aha' kinik'ik,
re' inkaaj chi naa kinkikansam.
7QaJaaw Dios, cha a'n jilow keh inki a'n weh.
Reh chi ma' nee ta nik'ik chikiij, chawesaj i kajaawriik ruuk' aajosq'iil.
8Re' hat aweht'al jarpech hin elenaq chikiwach,
eh jarpech i oq'ik nub'anam kuum.
Eh weht'al chi atz'ihb'aam rehtalil chupaam asantolaj huuj.
9QaJaaw Dios, nik' neenupahqaaj aawotob'il
nee kielik chikiij i ki-ixowanik nuwach.
Ruum re' hin weht'al chi re' hat naa atoob'iniik weh.
10Re' hin ruuk' i Dios i nuyeew nuk'ux, eh i nuyeew ruloq'il i ruq'oral.
Xti korik chi nuyeew ruloq'il i ruq'oral.
11Ruuk' i QaJaaw Dios i nuyeew nuk'ux,
ruum aj re' ma' nee ta kinyo'jik. Ni xata neekinyo'jik
ruum i neenkian weh taqe i xa winaq.
12QaJaaw Dios re' i nuq'orom chi naa nuye'em aweh,
naa nub'anam ruuk' alooq'jiik. Eh naa wo' nut'iosem aawotob'il.
13Ruum re' hat xat ko'linik weh
chuwach i kimik, eh chi ma' xinq'ehb'ik taj.
Reh chi konaa nuk'achariik pan saqum,
eh chi konaa kaat nuq'o'reem panutiij.
Currently Selected:
Sal 56: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
