Sal 58
58
Re' reey David xupahqaaj ree Dios chi chuyeew taqe chutojariik i kimahk i yiib' wach kina'ojb'al
1Raaj taq i hat i wilik taq awajaawriik,
¿Mi parub'ehel taq inaq'at i q'orik?
¿Mi parub'ehel taq i nayeew chutojariik i ru mahk i ju'jun?
2Ma' je' taj, re' taq i hat juneliik re' i ma' holohik ta taq i na a'n,
xa re' i tikij peleto taq inawaaj kuuk' i tinamit.
3Eh chu'nchel i yiib' wach kina'ojb'al xanoq wo' kiq'eb' kiib' noq xitzuhkrik chaloq.
Eh xanoq wo' xkitoq'aa' cho chukuj q'orik noq aasjinaq taqe chaloq.
4Eh je' rukab' i rukiih i aaq' i kiq'oral.
Eh ma' jaruuj ki-ib'irinik, xa je' tz'aplik i kixikin
je' kikab' i aaq' ma' nib'irinik taj tz'aplik i xikin.
5Eh ma' nkib'iraj ta wo' hoq i rutz'uuy i aj tz'uyineel,
atoob' ta nchol wo' naq tz'uuy chi korik.
6QaJaaw Dios, chawisaj i kajaawriik taqe re',
chapaxib'eej chu'nchel ikehruum je' kijosq'iil i kaq b'ahlam.
7Eh nee ta naq inasach kiwach,
je' rukab' noq inooj sahchoq wach i ha' i rutz'ir reje riib'.
Eh noq neenkikut reje i kiflecha nee ta naq intoqib'ik.
8Neeta naq insahchik kiwach je' rukab' noq insahchik
wach i rupuril i ha'. Oon je' rukab' i ruk'ul i k'isa ha'lak'un
kamnaq noq inaasjik ma' rilow ta wach i saqum.
9Eh nee ta naq insacharik kiwach chi jumehq'iil,
xa chi ma' keht'al, je' rukab' noq ink'atarik i k'iix.
Eh je' ta naq kichuq'arik reje rax ch'ahn panab'iix.
10Eh re' taqe korik wach kik'ux naa rusuqb'iik kik'ux
na' kilow chi xq'ajarik wach keh inki a'n i yiib' wach kina'ojb'al.
Eh na' kilow chi wilkeeb' chik pan kikik'eel taqe re'.
11Eh je' wili naa kiq'orom i tinamit:
Xti korik chi q'e' holohik i kitojb'aal inkik'ul i korik wach kik'ux.
Eh wilik jinaj i Dios inq'atwik q'orik chikinaah i tinamit, inko'q taqe.
Currently Selected:
Sal 58: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
