Sal 46
46
Re' QaJaaw Dios wilik quuk' chi qatoob'jiik nik' inchalik i ti' k'axik chi qanaah
1Re' QaJaaw Dios inko'linik qeh, re' reh inye'wik rukowiil qak'ux.
Re' reh intoob'inik qeh noq wilkooj panti' k'axik.
2Ruum aj re' ma' nee ta qohyo'jik,
atoob' ta nee nb'oqib'ik chu'nchel i wach ak'al,
atoob' ta nenooj qohoq taqe yuuq' paruchamiil i palaw.
3Atoob' ta nee nelik i palaw, atoob' ta neenk'uyu'jik
taqe yuuq' k'ixkaab' ruum i rujosq'iil i palaw
xama' nee ta wo' qohyo'jik.
4Re' QaJaaw Dios i ruyeew rusuqkiil ruk'ux
i rusantolaj tinamiit, ruuk' i jinaj rooq ha',
re' wilik wii' i rusantolaj ye'aab'.
5Re' Dios naa ruwihiik pankiyejaal pan kixilak
i rutinamiit, i ma' xta naa ruyojiik wii' kik'ux.
Re' reh naa rutoob'iniik keh
korehtaal inkilow wach i saqum.
6Re' tinamit yohb'aal wach i kijosq'iil, eh re' taqe ajaab'ees xakib'arb'otik chik.
Re' Dios xanik' nee ruq'or chi sacharoq wach i wach ak'al.
7Re' QaJaaw Dios nim rajaawriik, wilik quuk' chi qatoob'jiik.
Re' wo' reh inko'linik qeh re' ruDios i Jacob.
8Chab'iraj taq, chakoj taq rehtaal chib'ih jariik
i xub'an i Dios kuuk' i ki-ixowanik wach i rutinamiit.
9Re' reh xupab'aa' i q'aq'inik chi junsuut i wach ak'al,
xuyeew q'ab' chi xereb'ik i kiflecha.
Xitoq taqe i kiq'aslaj ch'ihch', eh xuk'at taqe i kikareta reh q'aq'inik.
10Re' QaJaaw Dios, je' wili ruq'or: Eh xmahyik
i q'aq'inik, chanab'eej taq chi re' hin, hin, Dios.
Eh chi wilik wajaawriik chikinaah taqe tinamit.
Je' wo' chinaah i rujunsuut i wach ak'al, inki.
11Re' QaJaaw Dios nim rajaawriik wilik quuk'.
Re' reh inko'linik qeh chuwach i ti' k'axik, re' i ruDios i Jacob.
Currently Selected:
Sal 46: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
