Sal 140
140
Re' reey David xupahqaaj parutiij chi naa ruko'ljiik ruum i Dios
1QaJaaw Dios, kinako'leej pan q'ab' i yiib' wach runa'ojb'al.
Kinako'leej pan kiq'ab' i yohb'aal wach kijosq'iil.
2Re' taqe i xa re' wo' yiib' wach na'ojb'al wilik pankanima,
xa re' wo' peleto inki a'n chu'nchel q'iij.
3Re' ju' kaaq' ma' ahl ta chi q'orik, je' rukab' i raaq' i aaq'.
Re' kiq'oral xanoq wo' inkansanik je' rukab' i rub'an i rukiih i aaq'.
4QaJaaw Dios kinako'leej pan kiq'ab' i yiib' wach kina'ojb'al, je' wo'
pan kiq'ab' i yohb'aal wach kijosq'iil. Re' ikiyejaam wach i nukanteesjiik.
5Eh nimaq kiwach inki a'n kiib', inkikoj i xirob' panub'eeh,
xa nkisik' chik chi riij nik' wach noq naa kianam weh.
Eh inkiq'at panub'eeh reh chi naa nuq'ehb'iik.
6Re' hin je' wili i nuq'orom cho reh i QaJaaw:
Re' hat, i hat nuDios, chayeew ti weh i nupahqaaj aweh,
chu'nchel nuk'ux.
7QaJaaw Dios, nim awajaawriik hat aj ko'len weh,
eh xinako'leej pan kiq'ab' i aj q'aq'ineel reh chi ma' xta xinkuchej, kinki reh.
8QaJaaw Dios, maayeew q'ab' reh i yiib' wach runa'ojb'al chi neenelik korik
ruuk' taqe iraaj rub'anam, ruuk' taqe i rukapaaj.
Reh chi ma' nee ta runimb'isaj riib'.
9Re' taqe i re' k'ul kiokik chaloq chub'anariik weh.
Re' taqe i yiib' wach q'orik i nelik cho pan
kichii' naa ruk'amwiik chee ti' k'axik chikinaah.
10Re' taqe re' naq'wach q'aaq' qoplik
ruq'aq'al naa ruye'ariik chikinaah.
Eh naakikutariik chupaam i jul ma' jaruuj chik naakeliik cho ar.
11Re' ma' holohik ta nq'orik xama' najt ta naa ruk'achariik ayu' wach ak'al.
Re' i yohb'aal wach josq'iil re' ti' k'axik naa rusachwiik wach reh.
12Re' hin weht'al chi re' QaJaaw Dios naa ruketeliniik wach i ti' ruk'ux.
Eh re' reh naa rutoob'iniik reh i ma' xta wilik reh.
13QaJaaw Dios re' taqe i korik wach kik'ux naa kiloq'inik reh aab'ihnaal.
Re' taqe i holohik kina'ojb'al naa kik'achariik chawach.
Currently Selected:
Sal 140: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
