Sal 139
139
Re' QaJaaw Dios reht'al chu'nchel chib'ih imb'aan
1QaJaaw Dios, re' hat inawilow, eh aweht'al nik' wach noq wilkiin.
2Eh aweht'al noq kinwuktik. Je' wo' noq kintzuhnik,
ko chi najt i nanaab'eej aha' wilik taqe i nukapaaj.
3Re' hat aweht'al chib'ih taqe nub'an noq kinhi'lik.
Eh aweht'al chib'ih jariik taqe i nub'an panuk'achariik.
4QaJaaw Dios, atoob' ta komajaa' i nelik i q'orik ju' waaq'
re' hat aweht'al chik chib'ih i naa nuq'orom.
5Re' hat i peet chi nuwach, re' hat i xam chi wiij,
eh i nayeew aaq'ab' chi nunaah.
6Re' ana'ojb'al xiik' naah loq'il chi wee hin, xiik' naah nimaal wach,
ma' nureq ta chi riij nik' wach noq i na a'n.
7¿Mi neerub'an re' chi nee nukeb'aa' wiib' chuwach aawuxlaab'al?
¿Mi neerub'an re' chi nenooj nukeb'aa' wiib' chawach?
8Neeta kinjohtik pan taxaaj nee wo' kinawilow ar.
Eh nee ta kinooj ko paruchamiil ak'al kiye'aab' i kamnaq, nee wo' kinawilow ar.
9Eh nee ta nuq'or reh i teew chi nee kiruk'am reje chi patinik
ko chi juntar i palaw wilik parelb'aal q'iij.
10Xa nee wo' kinawilow ar ruuk' awajaawriik.
Eh xama' nee ta wo' kinakanaa'.
11Eh nee ta nooj nukeb'aa' wiib' panq'equm,
nee ta nsutinik chi q'equm aq'ab' i saqum wilik chi nujunsuut.
12Re' q'equm xama' nee ta wo' kirukeb'aa' chawach.
Ruum chawee hat xa eliik wach chaq'ab' ruuk' pan i q'iij.
Xa eliik wach q'equm ruuk' saqum cha weh i hat.
13Re' wo' hat xatyej-anik cho reh chu'nchel i nuti'jolal.
Eh re' wo' hat xatz'uhkrisanik cho weh ruuk' i nutuut.
14Re' hin tinuloq'ej ruum insahchik nuk'ux
i rub'an taqe akamaj a'nam.
Eh xiik' naah loq'il chu'nchel i a'nam, xti nunimaj chi je' re'.
15Re' hat xawilow
noq xkorjik chu'nchel i nuti'jolal.
Ma' re' ta nkiwii' chi ma' eht'alimaj xintz'uhkrik chaloq ruuk' i nutuut.
16Re' hat xawilow noq xkorjik i nuti'jolal,
chu'nchel i re' xanoq wo' atz'ihb'aam chaloq.
Xa noq wo' awajlaam cho riij
i nuq'ijil noq komajaa' kin-aasjik.
17QaJaaw Dios, yohb'aal inche wach
nimaal wach taqe akapeew chi wee hin.
Xiik' naah loq'il chu'nchel noq inooj taqe ruk'ul riib'.
18Eh nee ta naq inwajlaaj ma' nee ta naq i nukuy
rajaljiik ruum ma' xata je' k'ihaal i saniib',
eh noq inwik'raaj wiib' xa wilkaat wo' wuuk'.
19QaJaaw Dios nee ta naq inasach kiwach i yiib' wach kina'ojb'al,
chawesaj taqe chi nuwach i aj kansan kas kichaaq.
20Re' taqe i ma' holohik ta kiq'orik chawiij,
eh inkiq'or ab'ihnaal chi xama' xta rub'ehel.
21QaJaaw Dios, re' hin inwixowaaj kiwach i ki-ixowanik awach i hat.
Ma' nwaaj ta kiwach taqe inkiq'ehtaaj kiib' chawach.
22Ma' imponik ta chi nuwach inki a'n
ma' k'isiin ta inwixowaaj kiwach.
23QaJaaw Dios, chawilow chib'ih taqe jariik i wilik cho pan wánima,
kinapaj reh chi nee nanaab'eej i nukapeb'aal.
24Eh kinawilow, wila' re' i yiib' wach b'eeh inuk'am,
kinak'am tii chupaam i b'eeh ma' naa ta rusahchiik wach.
Currently Selected:
Sal 139: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
