Sal 105
105
Re' ruk'axb'al i Dios xub'an cho kuuk' i aj Israel
(1 Cron 16.7-22)
1Chaloq'ej taq i QaJaaw Dios. Chaq'or taq rib'iral i loq'laj rub'ihnaal.
Eh chayeew taq keh chi naab'jik i tinamit taqe i rub'anam.
2Cha a'n taq atz'uuy ye'b'al ruloq'il.
Chawesaj taq ruq'orkiil i nimaq wach na'ojb'al rub'anam.
3Chayeew taq ruloq'il i rusantolaj b'ihnaal.
Eh chawunchelaal taq i hat i tisik'wik taq reh i QaJaaw Dios suuqb'oq taq ak'ux.
4Chasik' taq i rajaawriik i QaJaaw Dios,
juneliik taq cha pahqaaj i rotob'il.
5Mansahchik taq panak'ux i nimaq wach rukamaj
rub'anam, je' wo' taqe i ma' ilooj taj rub'anam.
K'oloq taq panak'ux i q'ataj Q'orik xub'an.
6Re' taq i hat, i hat taq riih rumaam
i Abraham re' rumoso chee Dios.
Hat taq rak'uun rixq'uun chaloq i Jacob i rusik'im cho wach.
7Re' reh i QaJaaw, i qaDios.
Re' wo' reh wilik chi taaq'anik chinaah chu'nchel i wach ak'al.
8Re' reh wilik paruk'ux chi juneliik i ruq'orom chaloq chi naa rub'anam ruuk' i tinamit.
Xa jarub' pa' ch'iht i k'acharik neenik'ik xama' naa ta wo' rik'iik paruk'ux.
9Eh ma' nsahchik ta paruk'ux i ruyejaam cho wach ruuk' i Abraham.
Je' wo' xti korik xuq'or cho chi riij i Isaac.
10Je' wo' xuyejaa' cho wach ruuk' i Jacob xukanaa' chi jinaj k'uhb'aal,
je' wo' i xuyejaa' cho wach ruuk' i Israel.
11Re' noq xuq'or chi je' wili: Re' hin naa taq nuye'em aweh i ye'aab' Canaán
naa taq nuye'em aweh chi akooch, inki Dios.
12Eh i xq'orarik keh, ma' re' ta nkiwii' chi xama' k'ih ta taqe,
xa je' taqe aj patal ponoq chupaam i ye'aab' re' re'.
13Eh xata wo' jarub' chi tinamit ki-ik'ik wii', chi je' pankok' tinamit,
chi je' panimaq tinamit.
14Re' Dios ma' xuyeew ta q'ab' chi awach ta xb'anik ti' k'axik keh,
xuq'il la' taqe i reey je' wili xuq'or keh:
15Maa a'n taq ti' k'axik keh i nusik'im cho kiwach.
Ma' chih taq awuchej taqe i jalal nuq'oral, inki.
16Re' QaJaaw Dios xuyeew chaloq i wi'jaleel chikinaah i aj Israel.
Ma' xuyeew ta chik cho k'uxumb'al keh.
17Eh xutaq'aaj reje Egipto i José chi peet,
re' xkik'ayej reje pankowlaj kamanik.
18Re' reh xkib'ak' i rooq chi karena.
Eh xkian ti' k'axik reh pantz'ilom.
19Eh korehtaal xooj eloq wach i ruq'orom rib'iral i José pampeet.
Re' ruq'oral i Dios xk'uhtanik reh chi korik i xuq'or chaloq.
20Eh re' i wilik chi reyil chikinaah i
ma' k'isa tinamit xuq'or chi xkoq'taaj reje i José.
21Eh re' reey xupab'aa' i José chi cha'jen reh i rupaat i rub'an wii' taaq'anik.
Eh xupab'aa' chi ajaab'esil chikinaah i tinamit.
22Re' i José xwihik rajaawriik chikinaah i xi kamanik ruuk' i reey.
Eh chi xukoj kina'ojb'al i k'amal b'eeh, taqe i nimaq wach kikamaj.
23Eh koq'uun chik xiooj Egipto taqe i aj Israel, re' taqe i rak'uun rixq'uun i Jacob.
Ar xi okik chi patinik chupaam i ye'aab' Cam rub'ihnaal.
24Re' QaJaaw Dios xuk'ihaaxb'isaj i rutinamiit,
yohb'aal wach k'ihaal xi ponik, q'e' chik kow kiib' chikiwach i aj Egipto.
25Je' re' noq xtohq'ik rixowjiik kiwach kuum aj Egipto.
Eh xuyeew q'ab' i Dios chi xb'aan ti' k'axik keh i rumoso ar.
26Eh xrilow chi je' re' i Dios, xutaq'aaj reje Egipto i rumoso Moisés,
ruch'ihil i Aarón rusik'im cho kiwach.
27Eh parub'ihnaal i Dios xkik'uhtaaj taqe i ma' ilooj taj ar Egipto.
Eh xkik'uhtaaj wo' nimaq wach sahchb'al k'uxliis ar Cam.
28Eh re' Dios chi xuyeew i runimaal q'equm chikinaah i aj Egipto.
Xa re' la' re' keh xama' xkinimaj ta wo' hoq i xuq'or i Dios.
29Eh xusutej wo' chi kik' taqe i nim ha'
xukansaj taqe kar wilkeeb' chupaam.
30Xunujisaj chi tuhtz' paam chu'nchel i tinamit Egipto
xnujik chi tuhtz' paam i paat inwirik wii' i kireey.
31Eh xa ruuk' i ruq'oral i Dios i xa sib' chik paam i nimaq utz',
i kok' utz' xkipuhkaaj kiib' chupaam i tinamit Egipto.
32Xuyeew wo' i nimaq taq saq b'och chi jilow jab' chinaah i tinamit.
Eh xuyeew wo' i ma' k'isa xaq q'aaq'.
33Ruuk' i taqe re' xsacharik wach i ki uuva, i ki higo,
i xitoqib'ik taqe i chee wilkeeb' chupaam ar Egipto.
34Eh xa ruuk' ruq'oral i QaJaaw Dios
xnujik i nimaq taq chili'l chupaam i tinamit re' re', ma' xata ajlamaj taqe.
35Re' taqe chikop re' re' kik'uxib'eej taqe ch'ahn,
je' wo' chu'nchel i kitik i nelik chinaah i wach ak'al.
36Eh xukansaj wo' taqe chu'nchel i peet kak'uun i aj Egipto,
re' taqe i q'e' naq suq kik'ux chi riij.
37Eh xresaj taqe chaloq Egipto i aj Israel,
xkik'am chaloq i ki oro, i ki plata.
Eh jar ch'uq chi kiib' ma' jino'q i yowaab' chi kixilak.
38Eh re' taqe i aj Egipto xsuuqb'ik kik'ux noq xi elik chaloq i aj Israel,
ruum xiyo'jik ruum i xkik'ul.
39Eh xuyeew chaloq i suutz' chikinaah muujb'al keh pan q'iij.
Eh chaq'ab' xuyeew chaloq i q'aaq' chikinaah sihq'b'al keh.
40Eh noq xkipahqaaj kitiib', re' Dios xutaq'aaj chaloq k'oot reh chi xkik'ux.
Xutaq'aaj chaloq i kaxlanwi'k pan taxaaj, korehtaal xinujik.
41Xutar wo' hoq i saqrehp ab'aj, eh xelik chaloq i ha',
xa je' chik nim ha' noq xb'ehik chupaam i ye'aab' chiq yuuq reh chi xkian kihaa'.
42Je' re' xub'an i Dios,
ruum xk'ulik cho paruk'ux i q'e' looq' ruq'orom
cho reh i rumoso Abraham chi naa rub'anam ruuk'.
43Eh xresaj chaloq Egipto i rutinamiit rusik'im cho kiwach
ruuk' rusuqkiil k'uxliis xi elik chaloq.
44Eh xuyeew keh i aj Israel i kiye'aab' i ma' kinimanik ta ree Dios,
re' chik i keh xib'anik rusuqkiil i kitik.
45Reh naq chi naa kinimam i ruk'uhb'aal,
eh chi naa kik'amam naah i kitijiik i rub'an.
Loq'imaj ta naq i QaJaaw Dios.
Currently Selected:
Sal 105: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
